Read nande Abatswerĩ 8 Bible Online

Abatswerĩ 8 - nande bible

Abatswerĩ 8

¹Nʼabandu ba Efũraĩmũ mobamubwira bati, Busana nakĩ wamatukola utya mutatubirikira, omugulu wayalwa na Mĩdĩanĩ kwehĩ? Mobamuhayira kutsibu.

²Naye mwabũga nabo ati, Namatakolakĩ ebiri ngʼekyo mwakola kwehĩ? Amasĩgalira wʼebĩgũma byʼebĩnyũ bya Efũraĩmũ si mabuya kwilaba ebĩnyũ byʼeAbĩezerĩ kwehĩ?

³Nyamuhanga abĩrĩhĩra omo byala byenyũ abasondolĩ ba Mĩdĩanĩ, Orebũ na Zebũ. Nage monatoka erikolakĩ ngʼebyo mwakola kwehĩ? Neryo erihitana lyabo molyũmbya busana naye, omugulu abũga ebyo.

⁴Neryo Gĩdeonĩ mwahĩka eYorodanĩ, mwasokera eyisirya, iye nʼabandu magana asatu (300) ababya haguma naye, ibamabiluha, nĩkwa ibakinakwamirira.

⁵Kandi mwabũga nʼabandu bʼeSũkotĩ, ati, Kĩsĩ-kĩsĩ, muhe abandu abangwamĩre bʼamandu; kusangwa bamaluha, kandi ngakwamirira Zeba na Salmũna, abami bʼeMĩdĩanĩ.

⁶Neryo abasondolĩ bʼeSũkotĩ mobabũga bati, Ebyala bya Zeba na Salmũna biri lino omo byala byawe, uti tuhe abasĩrĩkanĩ bawe bʼobundu kwehĩ?

⁷Neryo Gĩdeonĩ mwabũga ati, Busana nʼekyo omugulu Omwami Mukulu abĩrĩhĩra Zeba na Salmũna omo byala byage, neryo nasyaswĩrya emibiri yenyũ omo misaki-saki nʼamahwa byʼomo mbwarara.

⁸Kandi mwahetukira ePenũelĩ mwabũga nabo atya nibya; nʼabandu bʼePenũelĩ mobamũsũbĩrya ngʼabandu bʼeSũkotĩ ko bamũsũbĩraya.

⁹Naye mwabũga nʼabandu bʼePenũelĩ ati, Omugulu nasyasubula nʼobuholo nasyaterya enyũmba eyĩsũngũlĩkĩre eyĩ.

¹⁰Nĩkwa Zeba na Salmũna babya eKarkorĩ, haguma nʼabasĩrĩkanĩ babo, abandu nga elfu ĩkũmĩ nʼĩtanu (15,000), abosĩ abasaka oko basĩrĩkanĩ bʼabandu bʼendata; kusangwa mohawa bandu abakakula omũyalĩ elfu erĩgana nʼamakũmĩ abiri (120,000).

¹¹Kandi Gĩdeonĩ mwahetuka omo nzira yʼabandu ababya bĩkere omo mahema ebwanga bwʼendata bwʼeNoba nʼeYogĩbeha, kandi mobabambira endwiro, omugulu endwiro ĩtasĩ.

¹²Omugulu Zeba na Salmũna batibita; Gĩdeonĩ mwakwamabo; neryo mwahamba abami babiri bʼeMĩdĩanĩ, Zeba na Salmũna, neryo mwakĩnda abasĩrĩkanĩ babo bosĩ.

¹³Na Gĩdeonĩ mwasubula erĩlũa oko malwa eyiri obwiruka bwʼeHeresĩ.

¹⁴Neryo mwahamba omũlwana wʼabandu bʼeSũkotĩ, neryo mwamũbũlya ewahi; naye mwamũmĩnyĩsya emyatsi yʼabanya-mwami bʼeSũkotĩ, nʼabakulu bayo, abandu makũmĩ alinda.

¹⁵Neryo mwahĩka oko bandu bʼeSũkotĩ, mwabũga ati, Lebaya Zeba na Salmũna, abo mwanyitenyerako, muti, Ebyala bya Zeba na Salmũna bane omo byala byawe, uti tuhe abandu bawe abalũhĩre obundu kwehĩ?

¹⁶Neryo mwĩmya abakulu bʼomũyĩ, neryo mwasuyira abandu bʼeSũkotĩ omo misaki-saki nʼamahwa wʼembwarara.

¹⁷Kandi mwaterya enyũmba eyĩsũngũlĩkĩre yʼePenũelĩ, kandi mwĩta abalume bʼomũyĩ oyo.

¹⁸Neryo mwabũlya Zeba na Salmũna ati, Kwʼabandu mwĩtĩra eTaborĩ babya bandu ba muhandakĩ kwehĩ? Nabo mobamũsũbĩrya bati, Ko banabya nga we; obuli muguma wa kubo abya asosĩre omwana wʼOmwami.

¹⁹Naye mwabũga nabo ati, Abo babya bagala betu, abagala ba koyo wage. Ngoko Mwami Mukulu aliho, kumbe mwalĩbalayabo eribyaho, nage sĩnangabĩta nenyũ.

²⁰Neryo mwabwira Yeterĩ akambere kuwe ati, Hangana wĩtebo. Nĩkwa omũlwana mwatakula omũyalĩ wuwe; kusangwa mubaha, kusangwa abya iniakine mũlwana.

²¹Neryo Zeba na Salmũna mobabũga bati, Uwe, uhangane utuweko; kusangwa ngoko mulume ali, nʼamaka wuwe kwʼane atya. Neryo Gĩdeonĩ mwahangana, mwĩta Zeba na Salmũna, kandi mwĩmya obutega obwabya omo bĩkya byʼesyongamia syabo.

²²Neryo abandu ba Ĩsraelĩ mobabwira Gĩdeonĩ bati, Ututabaleko, uwe na mugala wawe, nʼomwitsikulu wawe; kusangwa wabĩrĩtũlamya omo byala bya Mĩdĩanĩ.

²³Na Gĩdeonĩ mwabwirabo ati, Sindiendibatabalako, kutse omugala wage siendisyabatabalako. Omwami Mukulu asyabatabalako.

²⁴Kandi Gĩdeonĩ mwabwirabo ati, Ngasonda erĩbabũlya, obuli mundu ambe esyombũka siwe syʼomo matwĩ esyo anyega. (Kusangwa babya nʼesyombũka syʼamatwĩ syʼesyamagetsi, kusangwa babya Abaĩsmaelĩ.)

²⁵Mobasũbĩrya bati, Tukandikuhasyo kwenene. Neryo mobasesa olukimba, obuli mundu mwagusa mulo esyombũka siwe syʼamatwĩ esyo ahũnga.

²⁶Nʼobũlĩto bwʼesyombũka syʼomo matwĩ syʼesyamagetsi esyo abũlaya syabya esyosekelĩ syʼesyamagetsi elfu nguma nʼamagana alinda (1,700); butaganza emisege, nʼamalingita, nʼemyenda yʼolubono eyabya oko bami bʼeMĩdĩanĩ, kandi butaganza amahulula awabya oko bĩkya byʼesyongamia syabo.

²⁷Neryo Gĩdeonĩ mwakokotya eefodĩ musyo, mwahĩrayo omo mũyĩ wuwe, eOfra. Na Ĩsraelĩ bosĩ mobayakwamayo omo luteto eyo; neryo moyabya ngʼekitego busana na Gĩdeonĩ nʼoko kĩtũnga kiwe.

²⁸Neryo Mĩdĩanĩ moyakĩndwa itya embere syʼabana ba Ĩsraelĩ, mobataswasumba emitwe yabo. Nʼekihugo mokyahumula oko myaka makũmĩ ani oko biro bya Gĩdeonĩ.

²⁹Kandi Yerũbalĩ omugala wa Yoasĩ mwayĩkala omo nyũmba yiwe.

³⁰Na Gĩdeonĩ abya awite abagala makũmĩ alinda abo abuta; kusangwa abya awite abakalĩ bangi.

³¹Nʼomũhwekĩ wuwe oyo wabya eSekemũ, naye mwamubutira mugala, mwaluka erĩna liwe mo Abĩmelekĩ.

³²Neryo Gĩdeonĩ mugala wa Yoasĩ mwahola omo bũsyakulu bubuya, mwatabwa omo mahero wa tata wuwe Yoasĩ, eOfra wʼAbabĩezerĩ.

³³Neryo Gĩdeonĩ abere abihola, abana ba Ĩsraelĩ mobaswakwama Balĩ omo luteto, mobayira Balĩ-berĩtĩ mo nyamuhanga wabo.

³⁴Nʼabana ba Ĩsraelĩ mobataswibuka Omwami Mukulu Nyamuhanga wabo, oyo walamayabo omo byala byʼesyonzĩgũ syabo oko mbande syosĩ;

³⁵kutse mobatakola kibuya oko kĩtũnga kya Yerũbalĩ, ye Gĩdeonĩ, ngʼebibuya byosĩ ebyo akolera Ĩsraelĩ.