Read nande Yũda 1 Bible Online

Yũda 1 - nande bible

Yũda 1

¹Ĩngye Yũda, omugombe wa Yesu Kristo, nʼomugala wabo Yakobo, ngabasakira ĩnywe mwabirikirawa, abanzĩrwe na Nyamuhanga Tata, kandi abakalemberawa busana na Yesu Kristo.

²Eriganyira, nʼobuholo, nʼolwanzo bikanye ũkwʼĩnywe.

³Abanze betu, nabya ngalenga kutsibu eribasakira omwatsi wʼerilama lyetu eryo tũsangĩre. Kandi naganĩraya nyiti litolere inabasakira eribalemba-lemba nyiti, Mulwire erĩkĩrĩrya eryo Nyamuhanga abiriha abandu buwe busana na kera na kera.

⁴Kusangwa abandi bandu, abatekenga Nyamuhanga, babiringira omo katĩkatĩ ketu mo bũbĩso-bĩso. Abandu aba bakahengemaya olukogo lwa Nyamuhanga wetu omo nzira yʼerikwama esyongumbu nyibi, ibakagana Omukama muguma wetu nʼomukulu wetu Yesu Kristo. Kera Amasako mwahula omusango wabo oyũ.

⁵Nomo mũnasĩ emyatsi yosĩ, lino ngasonda erĩbĩbũkya, ngoko Mukama mwalamya bandu omo kihugo kyʼeMĩsĩrĩ, nĩkwa enyũma mwaherya abatĩkĩrĩraya.

⁶Kandi ngabĩbũkaya ngoko abamalaĩka abayisamambula, abatswa aho wabo, Nyamuhanga abiribikabo omo mwĩrĩmya nʼomo mũlĩkĩ Wʼerikota busana nʼEkiro kikulu kyʼeritswera.

⁷Ngʼabandu bʼeSodomo nʼeGomora, nʼemĩyĩ eyo yabya hakũhĩ nayo, mobahalya ngʼabamalaĩka abo. Mobayiha okwʼĩsĩngĩra libi, kandi mobakwama esyongumbu syʼesĩsonĩ omo mibiri yabo. Aba babirisuyirwa omo muliro Wʼerikota, ibakabya kĩmĩnyĩsyo oko bandu bosĩ.

⁸Kandi abandu aba bakakola batya. Busana nʼerilota lyabo bakatsandaya emibiri yabo. Kandi bakagana ehamũlĩ ya Nyamuhanga, ibakatsuma abali nʼolukengerwa endata.

⁹Nĩkwa Mĩkaelĩ omũlaĩka mukulu, ekiro alwa nʼeSatanĩ nʼerikuba obuhaka nayo busana nʼomubiri wa Musa, mwatalĩga eritswera Satanĩ omo bĩnywa byʼerimutsuma, nĩkwa mwabwirayo ati, Omwami Mukulu akukunge.

¹⁰Nĩkwa kandi abandu aba bakatsuma emyatsi eyo batasĩ. Kandi emyatsi yosĩ eyo basĩ omo mĩbĩrĩ yabo, ngʼesyonyama esitawite obũlengekanĩa, emyatsi eyo yo yĩkaherayabo.

¹¹Obũlĩge kubo! Kusangwa babirikwama enzira ya Kaĩna, kandi bakanguha erikwama eritala lya Balama busana nʼebihembo, kandi babirihera omwʼiyisamambula lya Kora.

¹²Abandu aba ni bandu bʼemĩtĩndũ omwʼirya lyenyũ lyʼAbakristo, ibakalya haguma nenyũ butsira eriubaha, ibakayirembera ĩbobene. Bali ngʼebĩtũ ebite mo mbũla, ibakahekawa nʼerihunga. Bali ngʼemiti eyitawite ebĩgũma oko mugulu atolere. Kandi bali ngʼemiti eyũmĩre kabiri, eyabirikulangwa nʼemĩrĩhĩ yayo.

¹³Bali ngʼebisunda byʼengetsi ebitekũbĩbawa, abakahũlũkaya emĩbĩrĩ yabo yʼesĩsonĩ ngʼerĩhũlo. Bali ngʼesyongũnũnũ esikagalaganda. Nyamuhanga abiribikirabo omwĩrĩmya wʼomũhĩndanĩa Wʼerikota.

¹⁴Kandi Enoka oyo wabya wʼolulengo lwa Adamu, mwaminyerera busana nʼabandu aba ati, Lebaya, Omukama asyasa haguma nʼabamalaĩka babũyĩrĩre buwe maelfu nʼamaelfu,

¹⁵eritswera abosĩ, nʼerĩsĩnga abosĩ abatekenga Nyamuhanga busana nʼemĩbĩrĩ yabo eyitekenga Nyamuhanga, eyo bakahalayamo, kandi asyasĩnga abakola-nabi abo abatekenga Nyamuhanga busana nʼemyatsi yosĩ eyĩkalĩre eyo babĩrĩbũga omwʼimunegulira.

¹⁶Abandu aba bakatonga, nʼerirega abandi, ibakakwama esyongumbu syabo nyibi. Bakabũga nʼerĩyĩhamya, kandi bakapipa abandu busana nʼeribana kubo kwʼendũndĩ.

¹⁷Nĩkwa ĩnywe, abanze betu, mwibuke ebĩnywa byabũgawa erĩmbere nʼabakwenda bʼOmukama wetu Yesu Kristo.

¹⁸Babya bakababwira bati, Oko migulu yʼenyũma-nyũma hasyabya abasegemetererya, abakakwama esyongumbu syabo nyibi.

¹⁹Aba ni bandu bakaleta erigabana, bakakwama amalengekanĩa wʼekihugo, isibawite Omũlĩmũ wa Nyamuhanga.

²⁰Nĩkwa ĩnywe, abanze betu, mũyĩhĩmbe okwʼĩkĩrĩrya lyenyũ erĩbũyĩrĩre kutsibu; kandi musabe omo bũtokĩ bwʼOmũlĩmũ Abũyĩrĩre.

²¹Muyibike omo lwanzo lwa Nyamuhanga, imukalindirira eriganyira lyʼomukama wetu Yesu Kristo, erikaleta engebe yʼerikota.

²²Muganyire abandu abakatika-tika.

²³Mũlayebo, imukabakulabo omo muliro. Kandi muganyire abandi, imukubaha, nʼeripona esyongimba syabo esĩtũnda-tũndĩre omo mĩtĩndũ yʼomubiri.

²⁴Neryo ukwʼoyukatoka erĩbateya okwʼitoga, kandi akatoka eribaleta omo lukengerwa lwʼembere siwe omo butseme bunene, isimuwite ekyʼerĩhandĩkĩrĩrĩbwa.

²⁵Uku Nyamuhanga muguma musa, Omũlamya wetu, omwisi wa Yesu Kristo Omukama wetu, ukwʼiye habye olukengerwa, nʼobukulu, nʼobũtokĩ bosĩ, nʼehamũlĩ, erĩtsũka oko migulu yosĩ ya kera, na lino-lino, na kera na kera. Amina.