Read nande Erĩbĩsũlĩrwa 11 Bible Online

Erĩbĩsũlĩrwa 11 - nande bible

Erĩbĩsũlĩrwa 11

¹Neryo monahabwa oluseke olwʼerirengamo, lwabya ngʼomũtso, neryo monabwirwa ambu, Hangana, ulenge eHekalũ ya Nyamuhanga nʼekiherero, kandi uganze abakaramaya omo Hekalũ omo.

²Nĩkwa Ũsĩge ekibuga ekiri eyĩhya oko Hekalũ. Sulengekyo, kusangwa kyabirihabwa oko bihanda, nabo basyalyatangirira Omũyĩ Abũyĩrĩre emikera makũmĩ ani nʼeyĩbĩrĩ.

³Nage nasyaha abalangĩrĩ bage babiri ehamũlĩ, nabo basyatũla omwatsi wa Nyamuhanga ebiro elfu nguma nʼamagana abiri nʼamakũmĩ ndatu (1,260), ibambite emisarandwe.

⁴Abalangĩrĩ babiri aba ni miti ĩbĩrĩ yʼeMĩzeĩtũnĩ, kandi ni tala ĩbĩrĩ abimene embere syʼOmukama wʼekihugo.

⁵Kandi omundu amalenga erikolabo nabi, omuliro akalũa omo muno wabo nʼerĩhĩsya esyonzĩgũ syabo. Neryo omundu amasonda erikolabo nabi, asyĩtwa atya.

⁶Aba bawite obũtokĩ bwʼerĩrĩba ekyanya, embũla initasyawa oko mugulu ogo bakatũla omwatsi wa Nyamuhanga. Kandi bawite ehamũlĩ oko magetsi erihindulago mo musasi, kandi bawite ehamũlĩ yʼerĩĩta ekihugo omo mĩsĩndo yosĩ yʼesyondwala oko migulu yosĩ banzĩre.

⁷Neryo omugulu abalangĩrĩ babiri abo bamabibuga erĩtũlago lyabo, enyama eyĩkalũa omo buhya obutawite kabuno yasyalwa nabo, nʼerĩkĩndabo, nʼerĩĩtabo.

⁸Nĩkwa ebĩnda byabo byasyabya omo nzira yʼomũyĩ mukulu aho Mukama abambirawa oko musalaba. Omũyĩ oyo akahulawa omwʼĩkũmbo mo Sodomo nʼeMĩsĩrĩ.

⁹Neryo abandu, nʼEbihanda, nʼemĩbũge, nʼebĩtũnga byʼabandu, basyasamalira ebĩnda byabo ebiro bisatu nʼembindi yʼekiro, isibendĩsyalĩga ebĩnda byabo bĩkahĩrwa omwʼisinda.

¹⁰Kandi esyondũlanĩ syʼekihugo basyatsemera oluholo lwʼabalangĩrĩ babiri aba. Basyatsanga nʼerĩhereranĩa olũsũnzo, kusangwa abamĩnyererĩ babiri aba mobagalya abandu abĩkere omo kihugo.

¹¹Nʼenyũma wʼebiro bisatu nʼembindi, omuka wʼengebe akalũa uku Nyamuhanga mwahĩka mubo, nabo mobahangana, neryo eriubaha ĩnene molyahĩka oko bandu abalangirabo.

¹²Neryo abamĩnyererĩ abo mobowa omulenge munene owakalũa elubula, akabwirabo ati, Mwase endata eno! Neryo esyonzĩgũ syabo mosyalangirabo bakahetukira omo lubula omo kĩtũ.

¹³Nʼoko ndambĩ eyo nyisa-nyisa mohabya omũsĩkĩ munene, akahindi kaguma kʼomwʼĩkũmĩ kʼomũyĩ mokatera, nʼabandu maelfu alinda (7,000), mobakwa omo mũsĩkĩ oyo. Neryo abandi bandu mobakwa obuba, mobapipa obukulu bwa Nyamuhanga wʼelubula.

¹⁴Obũlĩge bwʼakabiri bwabirilaba, nĩkwa lebaya, obũlĩge bwʼakasatu bukasa lũba.

¹⁵Neryo omũlaĩka wʼakalinda mwabuha engubi yiwe, neryo emirenge minene-minene omo lubula moyabũga iti, Obwami bwʼekihugo bwabiribya bwami bwʼomukama wetu, nʼobwa Kristo wuwe, naye asyatabala kera na kera!

¹⁶Neryo abakulu makũmĩ abiri nʼabani abakĩkala oko bĩtumbĩ byabo byʼobwami embere sya Nyamuhanga, mobatũlama ahisi oko mũsũ wabo, mobaramya Nyamuhanga

¹⁷bati, Omukama Nyamuhanga, Omũtokĩ Wʼebyosĩ, oyuli, nʼoyutula! Tukakuha ewasĩngya kusangwa wabĩrĩmya obũtokĩ bwawe bunene, Kandi wabĩrĩtsũka erĩsĩnga!

¹⁸Nʼebihanda mobyahitana, Nʼerihitana lyawe molyahĩka, Nʼomugulu mwahĩka owʼeritswera abaholĩ, Kandi omugulu mwahĩka owʼerihemba abagombe bawe abamĩnyererĩ, Nʼabandu bawe bosĩ, abakulu, nʼabake-bake, Nʼabakubaha erĩna lyawe, Kandi omugulu mwahĩka busana nʼerĩtogotya Abandu abakatsandaya ekihugo!

¹⁹Kandi eHekalũ ya Nyamuhanga omo lubula moyakingulwa, nʼerĩsandũko lyʼendagano yiwe molyabutuka omo Hekalũ yiwe. Neryo mohabya erĩpalya, nʼemirenge, nʼemĩlũmo, nʼomũsĩkĩ, nʼamatwa manene-manene.