Read nande Erĩbĩsũlĩrwa 13 Bible Online

Erĩbĩsũlĩrwa 13 - nande bible

Erĩbĩsũlĩrwa 13

¹Neryo monalangira enyama ĩkalũa omo ngetsi. Enyama eyo yabya yiwite amahembe ĩkũmĩ nʼemitwe irinda, nʼesyombĩta ĩkũmĩ oko mahembe wayo, nʼoko mitwe yayo habya amena wʼebĩtsũmĩ.

²Enyama eyo nalangira yabya yĩsosĩre esoro, nʼebisando byayo ĩbĩsosĩre ebisando byʼedubu, nʼobuno bwayo ĩbũsosĩre obuno bwʼendale. Kandi ekiyoka ekyo mokyaha enyama eyo amaka wakyo, nʼekĩtũmbĩ kyakyo kyʼobwami, nʼehamũlĩ nene.

³Nĩkwa omutwe muguma wʼenyama eyo, abya ahutere ekironda kyʼerĩholya, nĩkwa ekironda kyayo kyʼerĩholya mokyalamĩbwa. Nʼekihugo kyosĩ mokyasweka, mokyakwama enyama eyo.

⁴Neryo abandu mobaramya ekiyoka ekyo kusangwa mokyaha enyama eyo ehamũlĩ yakyo. Kandi mobaramya enyama eyo bati, Nindi ali ngʼenyama eyo kwehĩ? Kandi nindi wangatoka erilwa nayo kwehĩ?

⁵Enyama eyo moyahabwa obuno bwʼerĩbũgamo ebĩnywa byʼeriyiheka nʼebĩtsũmĩ, kandi moyahabwa ehamũlĩ yʼerikola emikera makũmĩ ani nʼeyĩbĩrĩ.

⁶Neryo moyatsũka eritsuma Nyamuhanga, nʼeritsuma erĩna lya Nyamuhanga, nʼaho Nyamuhanga ĩkere, nʼabosĩ abĩkere elubula.

⁷Neryo moyahabwa ehamũlĩ yʼerilwa nʼabandu ba Nyamuhanga nʼerĩkĩndabo; kandi ehamũlĩ oko buli kihanda, nʼabandu, nʼemĩbũge, nʼobuli kĩtũnga kyʼabandu.

⁸Nʼabandu bosĩ abĩkere omo kihugo basyaramyayo, obuli mundu oyuwite erĩna lĩtasakĩre embere wʼerĩtsũka lyʼekihugo, omo kitabu kyʼengebe kyʼEkyana kyʼEmbũlĩ ekyakerawa.

⁹Oyuwite amatwĩ, owe!

¹⁰Omundu oyo wangahambwa mo mukobe, asyahambwa mo mukobe kwenene. Kandi oyo wangakwa omo mũyalĩ, naye ĩnĩakwa omo mũyalĩ. Erĩ niʼyitsingirira nʼerĩkĩrĩrya lyʼabandu ba Nyamuhanga.

¹¹Neryo monalangira eyindi nyama ĩkalũa omo kihugo. Yabya yiwite amahembe abiri ngʼekyana kyʼembũlĩ, kandi moyabũga ngʼekiyoka.

¹²Nayo ikakola omo hamũlĩ yosĩ yʼenyama yʼerĩmbere embere wayo. Ikaleka ekihugo nʼabosĩ abĩkere mukyo ĩbaramya enyama eyo yʼerĩmbere eyo yabya nʼekironda kyʼerĩholyayo, ekyalamĩbawa.

¹³Nʼenyama eyĩ yʼakabiri ikakola ebitiko-tiko binene. Kandi ikaleka omuliro ĩnĩalũa elubula nʼerĩhĩka oko kihugo embere wʼabandu bosĩ.

¹⁴Nĩkwa ikateba abandu bosĩ abĩkere omo kihugo busana nʼebitiko-tiko ebyo yahabawa erikola embere wʼenyama yʼerĩmbere. Enyama eyĩ moyabwira abandu bosĩ abĩkere munakihugo iti, bakokotaye esanamu busana nʼenyama eyahutala ekironda kyʼomo mũyalĩ, nʼeriswabyaho.

¹⁵Enyama eyĩ yʼakabiri moyahabwa ehamũlĩ yʼeriha omuka oko sanamu yʼenyama eyo, nʼesanamu yʼenyama iyatoka erĩbũga, nʼerĩĩta abosĩ abagana erĩramya esanamu yʼenyama eyo.

¹⁶Enyama eyo ikaleka abandu bosĩ, abake-bake nʼabakulu-bakulu, abateke nʼabera, abagombe nʼabandu bʼobwĩranda, bahĩrawe kʼolusako oko byala byabo byʼamali, nʼoko mbũmo syabo.

¹⁷Omundu syasyegula kutse erĩgũlya, yo nʼoyũsakĩre olusako olo, lye rĩna lyʼenyama eyo, kutse eriganza lyʼerĩna lyayo.

¹⁸Amenge waya. Oyuwite eriminya aganze erĩna lyʼenyama eyo, kusangwa niʼganza lyʼomundu, nʼeriganza liwe ni magana ndatu nʼamakũmĩ ndatu nʼendatu (666).