Read nande Erĩbĩsũlĩrwa 15 Bible Online

Erĩbĩsũlĩrwa 15 - nande bible

Erĩbĩsũlĩrwa 15

¹Kandi monalangira ekindi kitikotiko kinene nʼekyʼeriswekera elubula. Mohabya abamalaĩka balinda, ababya bawite amalĩge alinda. Aya nĩ malĩge wʼenyũma-nyũma, kusangwa Nyamuhanga akabugira mugo erihitana liwe.

²Neryo monalangira ekĩsosĩre engetsi yʼekiyo eyĩtũlũngene nʼomuliro. Kandi monalangira abandu abakĩnda enyama eyo nʼesanamu yayo, nʼeriganza lyʼerĩna lyayo. Babya bimene oko ngetsi yʼekiyo, ĩbahambĩre esyonanga sya Nyamuhanga.

³Babya bakimba Olwimbo lwa Musa, omugombe wa Nyamuhanga, nʼolwimbo lwʼEkyana kyʼEmbũlĩ, bati, Uwe Mwami Mukulu Nyamuhanga, Omũtokĩ Wʼebyosĩ, Emĩbĩrĩ yawe ni minene-minene, nʼeyʼeriswekera! Uwe Mwami wʼebihanda, Esyonzira syawe situnganene, kandi ni syʼekwenene!

⁴Uwe Mwami Mukulu nindi utesyakubaha kwehĩ? Nindi oyutesyapipa eriasa lyawe kwehĩ? Kusangwa uwe wowene ũbũyĩrĩre. Ebihanda byosĩ basyasa, Nʼerĩramya embere syawe, Kusangwa emĩbĩrĩ yawe itunganene yabĩrĩbĩsũlwa.

⁵Enyũma wʼemyatsi eyĩ, monalangira eHekalũ iyikingukere elubula, nʼeHema yʼahʼerĩĩkala ha Nyamuhanga yabya muyo.

⁶Neryo abamalaĩka balinda ababya nʼamalĩge alinda, mobalũa omo Hekalũ, ibambite esyongimba syʼekĩtanĩ esyerĩre, esĩkangabasenĩe. Kandi ibambite amupa wʼesyamagetsi oko bĩkũba byabo.

⁷Neryo ekiguma oko bĩhangĩkĩrwe ebiriho bini mokyaha oko bamalaĩka balinda ebibindi birinda byʼesyamagetsi ĩbyoswĩre mwʼerihitana lya Nyamuhanga, oyuliho kera na kera.

⁸NʼeHekalũ moyũsũla mwʼomũkĩ akalũa omo lukengerwa nʼobũtokĩ bya Nyamuhanga. Kandi sihabya mundu oyukatoka eriingira omo Hekalũ, amalĩge alinda ate ahwa, awaletawa nʼabamalaĩka balinda.