Read nande Erĩbĩsũlĩrwa 21 Bible Online

Erĩbĩsũlĩrwa 21 - nande bible

Erĩbĩsũlĩrwa 21

¹Neryo monalangira olubula luhya-luhya nʼekihugo kihya-kihya, kusangwa olubula lwʼerĩmbere nʼekihugo kyʼerĩmbere mobyalenga, nʼengetsi isiyikiriyo.

²Nage monalangira omũyĩ abũyĩrĩre, eYerũsalema, omũyĩ muhya-muhya, akandagala akalũa elubula ewa Nyamuhanga, ĩnĩabĩrĩyĩtegekanĩa ngʼomũherũkĩ oyũyĩsũgĩre busana nʼĩba wuwe.

³Kandi monowa omulenge akalũa oko kĩtũmbĩ kyʼobwami ati, Lebaya! eHema ya Nyamuhanga iri omo katĩkatĩ kʼabandu! Naye asyĩkala haguma nabo, basyabya bandu buwe. Kandi Nyamuhanga ĩyowene asyabya haguma nabo, nʼeribya Nyamuhanga wabo.

⁴Nĩkwa asyasangula emĩsonĩa yosĩ oko meso wabo. Kandi oluholo silwendisyaswabyaho, erĩsũsũmana kutse eririra, kutse eriagalwa. Emyatsi yʼerĩmbere yabirirenga.

⁵Nʼoyo wĩkere oko kĩtũmbĩ kyʼobwami mwabũga ati, Lebaya! Lino ngayira emyatsi yosĩ mo mihya-mihya. Neryo mwabũga ati, Usake ebĩ kusangwa ebĩnywa ebĩ ni byʼeriyiketera nʼebyʼekwenene.

⁶Kandi mwabũga ati, Byamakoleka! Ĩngye indi Alfa na Omega, erĩtsũka nʼendũlĩ. Oyũkwĩre enyota nasyamuha oko magetsi wʼengũnũnũko yʼamagetsi wʼengebe butsira erigula.

⁷Oyũkakĩnda nasyamuha emyatsi eyĩ: Nasyabya Nyamuhanga wuwe, naye asyabya mugala wage.

⁸Nĩkwa abuba, nʼabatĩkĩrĩrye, nʼabʼesyonye, nʼabĩtĩ, nʼabasĩngĩrĩ, nʼabakũmũ, nʼabakasaba esyosanamu, nʼababehĩ, omwanya wabo asyabya omo ngetsi eyikaka nʼomuliro nʼekirimi, olo lo luholo lwʼakabiri.

⁹Neryo omuguma wʼoko bamalaĩka balinda ababya bawite ebibindi birinda ebyoswĩre mwʼamalĩge alinda wʼenyũmanyũma mwambĩkako, mwakanĩa nage ati, Wase hano, ngandĩkũkangya Omũherũkĩ, omũkalĩ wʼEkyana kyʼEmbũlĩ.

¹⁰Neryo omũlaĩka mwanyitwala omo Mũlĩmũ oko kitwa kinene kiri-kiri, mwanyĩkangya omũyĩ abũyĩrĩre, ye Yerũsalema, owakandagala akalũa elubula ewa Nyamuhanga.

¹¹Omũyĩ oyo mwakangabasanĩa omo lukengerwa lwa Nyamuhanga. Erĩkangabasanĩa lyago lyabya lĩsosĩre erĩbwe lyʼobũgũlĩ bunene, ngʼerĩbwe erĩhenĩrye, lyʼeYaspĩ ngʼekĩrlaũlĩ.

¹²Omũyĩ oyo abya awite ekĩyĩte kinene kiri-kiri, nʼesyonyũyĩ erĩkũmĩ nʼesĩbĩrĩ, nʼoko syonyũyĩ esyo habya abamalaĩka erĩkũmĩ nʼababiri. Kandi oko syonyũyĩ habya hasakĩre amena wʼebihanda erĩkũmĩ nʼebibiri bya Ĩsraelĩ.

¹³Kandi habya esyonyũyĩ ĩsatu oko luhande lwʼeyo ryuba likasira, nʼesyonyũyĩ ĩsatu elutambi lwʼendata, nʼesyonyũyĩ ĩsatu elutambi lwʼeyĩkwa, nʼesyonyũyĩ ĩsatu eluhande lwʼeyĩkwa.

¹⁴Ekĩyĩte ekyo kyʼomũyĩ kyabya kĩhĩmbĩre omo mabwe ĩkũmĩ nʼawabiri, awasakĩre kwʼamena ĩkũmĩ nʼabiri wʼabakwenda erĩkũmĩ nʼababiri bʼEkyana kyʼEmbũlĩ.

¹⁵Nʼomũlaĩka oyo wabya akabũga nage abya nʼolulengo lwʼesyamagetsi busana nʼerirenga omũyĩ oyo, nʼerirenga esyonyũyĩ syago, nʼekĩyĩte kyago.

¹⁶Nĩkwa omũyĩ oyo inialingirirene oko syombande syosĩ, obuli bwago inialingirirene nʼobugali bwago. Neryo omũlaĩka mwalenga omũyĩ omo lulengo luwe. Obuli bwago bwabya ebilometere elfu ĩbĩrĩ nʼamagana ani (2,400). Obuli bwago nʼobugali bwago, nʼobuli bwago bwʼendata ibiringirirene.

¹⁷Kandi omũlaĩka oyo mwalenga ekĩyĩte kyago ini metere makũmĩ alinda omo buli bwʼendata, ngʼolulengo abandu bakalengamo, kandi ini lulengo lwʼabamalaĩka nibya.

¹⁸Ekĩyĩte ekyo kyabya kyʼamabwe wʼeYaspĩ, nʼomũyĩ abya wʼesyamagetsi nyibuya, esĩhenĩrye ngʼekĩraũlĩ.

¹⁹Amabwe wʼekibanza kyʼekĩyĩte kyʼomũyĩ abya abambĩre kwʼamabwe wʼemĩsĩndo yosĩ yʼobũgũlĩ bunene. Erĩbwe lyʼerĩtsũka lyʼekibanza lyabya Yaspĩ. Eryʼakabiri lyabya Safĩro, nʼeryʼakasatu lyabya Kaledonĩ, nʼeryʼakani lyabya lyʼeZũmarĩdĩ.

²⁰Eryʼakatanu lyʼeSadonĩkĩ, eryʼendatu lyʼeSardĩo, nʼeryʼakalinda lyʼeKrĩsolĩto, nʼeryʼomunani lyʼeBerĩlo, nʼeryʼomwenda lyʼeTopazĩo, nʼeryʼerĩkũmĩ kyʼeKrĩsopũraso, nʼeryʼerĩkũmĩ nʼeriguma lyʼeHaĩkĩnto, nʼeryʼerĩkũmĩ nʼawabiri lyʼeAmazĩsĩto.

²¹Kandi esyonyũyĩ erĩkũmĩ nʼesĩbĩrĩ syabya lulu ĩkũmĩ nʼĩbĩrĩ, obuli lũyĩ lwabya lũkalũa mo lulu nguma. Neryo embalu yʼomũyĩ yabya yʼesyamagetsi nyibuya-buya, ngʼekiyo ekikalabangana mwʼameso.

²²Nĩkwa mondalangira eHekalũ omo mũyĩ oyo, kusangwa Omukama Nyamuhanga, Omũtokĩ Wʼebyosĩ, nʼEkyana kyʼEmbũlĩ bo Hekalũ yʼomũyĩ oyo.

²³Kandi omũyĩ oyo siali nʼobwaga bwʼeryuba kutse omukera byʼerĩkolerya mugo, kusangwa olukengerwa lwa Nyamuhanga lũkakolerayago nʼetala yago ni Kyana kyʼEmbũlĩ.

²⁴Nĩkwa ebihanda, byasyalendera omo kyakakala kyago, nʼabami bʼekihugo basyaleta olukengerwa lwabo mugo.

²⁵Neryo esyongyo syʼomũyĩ Sĩsyendisyakingwa na kera omugulu bũnalolĩre, kandi eyo sĩbwendĩsĩra.

²⁶Nĩkwa erĩkangabasanĩa nʼerĩsĩkya lyʼebihanda byasyaletwa omo mũyĩ oyo.

²⁷Kandi sihali ekĩtĩsĩrĩre, kutse omundu oyukakola esyonye, kutse oyukabiha. Nĩkwa ba nʼabandu amena wabo awasakĩre omo kitabu kyʼengebe kyʼEkyana kyʼEmbũlĩ, basyingira omo mũyĩ oyo.