Read nande Erĩbĩsũlĩrwa 8 Bible Online

Erĩbĩsũlĩrwa 8 - nande bible

Erĩbĩsũlĩrwa 8

¹Neryo Ekyana kyʼEmbũlĩ kyabere kyatũa ekĩbohĩ kyʼakalinda, mohahita ĩsyerere omo lubula oko mbindi yʼesaa.

²Neryo monalangira abamalaĩka balinda abakahangana embere sya Nyamuhanga; nabo mobahabwa esyongubi sirinda.

³Neryo ogundi mũlaĩka mwasa mwahangana hakũhĩ nʼekiherero ĩnĩahambĩre ekibindi kyʼesyamagetsi. Naye mwahabwa obukwa bunene atomekebo okwʼisaba lyʼabandu bosĩ ba Nyamuhanga oko kiherero kyʼesyamagetsi, ekyabya embere wʼekĩtũmbĩ kyʼobwami.

⁴Kandi omũkĩ wʼobukwa mwahetuka embere sya Nyamuhanga haguma nʼerisaba lyʼabandu ba Nyamuhanga bĩkalũa omo byala byʼomũlaĩka.

⁵Neryo omũlaĩka mwahamba ekibindi, kandi mũsũlyakyo omo muliro wʼekiherero, neryo mwagusakyo omo kihugo. Neryo emĩlũmo, nʼemirenge, nʼerĩpalya, nʼomũsĩkĩ mobyakwamana.

⁶Nĩkwa abamalaĩka balinda ababya bawite esyongubi sirinda mobayĩtegekanĩa eribuha esyongubi.

⁷Neryo omũlaĩka wʼerĩmbere mwabuha engubi yiwe. Neryo amatwa nʼomuliro, ĩbĩtũlũngene nʼomusasi, mobyaguswa omo kihugo. Nʼekihande kiguma kyʼomo bisatu kyʼekihugo mokyahya, nʼekiguma kyʼomo bisatu kyʼemiti mokyahya, nʼebiti bibisi byosĩ mobyahya.

⁸Nʼomũlaĩka wʼakabiri mwabuha engubi yiwe. Neryo ekindu ekĩsosĩre ekitwa kinene ekikaka mʼomuliro mokyaguswa omo ngetsi. Nʼekiguma kyʼomo bisatu kyʼengetsi mokyahinduka musasi,

⁹nʼekiguma kyʼomo bisatu kyʼesyonyama esiriho omo ngetsi, mosyahola; nʼekiguma kyʼomo bisatu kyʼamato mokyaherĩbwa.

¹⁰Neryo omũlaĩka wʼakasatu mwabuha engubi yiwe. Neryo engũnũnũ nene, eyikaka ngʼolumole, moyatoga ĩkalũa elubula, moyatogera oko kiguma kyʼomo bisatu kyʼesyonyũsĩ, nʼoko syongũnũnũko syʼamagetsi.

¹¹Erĩna lyʼengũnũnũ eyo ni Engalihira. Nʼekiguma kyʼomo bisatu kyʼamagetsi mokyakaliha; kandi abandu bangi mobahola busana nʼerĩpũlya amagetsi ayo, kusangwa abirikalĩhĩbwa.

¹²Neryo omũlaĩka wʼakani mwabuha engubi yiwe. Neryo ekiguma kyʼomo bisatu kyʼeryuba, nʼekiguma kyʼomo bisatu kyʼomo mukera, nʼekiguma kyʼomo bisatu kyʼesyongũnũnũ mobyabandwako, kyaleka ekiguma kyʼomo bisatu kyʼerĩkolerya lyabo ikyabya mwĩrĩmya. Kandi ekiguma kyʼomo bisatu kyʼomusibo mokĩtakolerya, nʼekiguma kyʼomo bisatu omo kiro mokyabya kitya.

¹³Neryo monalangira, kandi monowa erĩsamba likaguluka omo kyanya, erĩkabũga nʼomulenge munene liti, Obũlĩge! Obũlĩge! Obũlĩge oko bĩkere omo kihugo busana nʼeribuha lyʼesyongubi syʼabamalaĩka basatu abakĩsĩya ibabuha esyongubi syabo!