Read nande 1 Samwelĩ 11 Bible Online

1 Samwelĩ 11 - nande bible

1 Samwelĩ 11

¹Neryo Nahasĩ Omũamonĩ mwasa mwahanda ekambĩ eYabesĩgĩleadĩ. Nʼabalume bosĩ bʼeYabesĩ-gĩleadĩ mobabwira Nahasĩ bati, Ũhĩre endagano netu, neryo twasyakukolera.

²Neryo Nahasĩ Omũamonĩ mwabwirabo ati, Ngandilagana nenyũ omo mwatsi muguma ono, nyiti ameso wenyũ gosĩ wʼamali gʼobuli mundu alolawe; kandi nasyayirakyo mo kĩtsũmĩ oko Baĩsraelĩ bosĩ.

³Nʼabakulu bʼeYabesĩ-gĩleadĩ mobamubwira bati, Utuhe biro birinda tutume abakwenda oko mitano yosĩ yʼAbaĩsraelĩ; neryo hamabula oyo wangatũlamya twasyakuhulukira.

⁴Neryo abakwenda mobahĩka eGĩbea ewa Saũlo, mobatũlĩra ebĩnywa ebyo omo matwĩ wʼabandu; nʼabandu bosĩ mobasumba emirenge yabo mobalira.

⁵Neryo, lebaya, Saũlo mwasa ĩnĩakwamĩre esyonde esikalima sĩkalũa omwʼiri-rima; neryo Saũlo mwabuga ati, Abandu bakwĩrekĩ kikaleka ibalira kwehĩ; Neryo mobamubwira ebĩnywa byʼabandu bʼeYabesĩ.

⁶Neryo Omũlĩmũ wa Nyamuhanga mwahĩka uku Saũlo nʼamaka omugulu owa ebĩnywa ebyo, nʼerihitana liwe molyagulumira kutsibu.

⁷Neryo mwĩmya esyonde ĩbĩrĩ, mwatsũtsangasyo mo bitswe-bitswe, mwatumabyo omo mitano yosĩ yʼAbaĩsraelĩ omo byala byʼabakwenda, ati, Omundundi oyutendisyahuluka akakwama Saũlo na Samwelĩ, esyonde siwe syasyakolwa sitya. Nʼeriubaha lyʼOmwami Mukulu molyawa oko bandu, mobahuluka ngʼomundu muguma.

⁸Neryo mwaganzirabo eBezekĩ; nʼabana ba Ĩsraelĩ babya elfu magana asatu (300,000), nʼabalume ba Yũda elfu makũmĩ asatu (30,000).

⁹Neryo mobabwira bakwenda abasa bati, Mwasyabwira bandu bʼeYabesĩ-gĩleadĩ, muti, Omo ngyakya, omugulu eryuba lyasyasingirira, mwasyabana erilama. Nʼabakwenda mobagenda mobabwira abalume bʼeYabesĩ; nabo mobatsema.

¹⁰Neryo abalume bʼeYabesĩ mobabũga bati, Omo ngyakya twasyabahulukira, nenyũ mwasyatukola ebyosĩ ebyo mwanzĩre.

¹¹Neryo engyakya, Saũlo mwahĩra bandu omo milondo ĩsatu; mobingira omo kambĩ omo muhuho, mobĩta Abaamonĩ erĩhĩka omwʼitungi-tsibu. Neryo ababala mobapanzapanzwa, isihali ababiri ba kubo abasĩgala haguma.

¹²Nʼabandu mobabwira Samwelĩ, bati, Nindi yo wabũga ati, Saũlo asyatutabalira kwehĩ? Mulete abandu abo twĩtebo.

¹³Neryo Saũlo mwabũga ati, Sihali mundu ũkandĩtwa mũnabwĩre; kusangwa mũnabwĩre Omwami Mukulu abirikola omulamo omo Baĩsraelĩ.

¹⁴Neryo Samwelĩ mwabwira bandu ati, Mwase tuye eGĩlgalĩ, tfihanganaye obwami bo kandi.

¹⁵Nʼabandu bosĩ mobaya eGĩlgalĩ; nʼeyo mobayira Saũlo mo mwami embere syʼOmwami Mukulu eGĩlgalĩ; nʼeyo nibya mobakera amahere wʼesyohongo syʼobuholo embere syʼOmwami Mukulu; nʼeyo Saũlo nʼabandu bosĩ ba Ĩsraelĩ mobatsema kutsibu.