Read nande 1 Samwelĩ 14 Bible Online

1 Samwelĩ 14 - nande bible

1 Samwelĩ 14

¹Neryo oko kiro kiguma, Yonatana mugala wa Saũlo mwabwira omũlwana oyo waheka ebindu byʼamalwa biwe, ati, Wase tusokere oko bateya bʼAbafĩlĩstĩnĩ abali eyisirya. Nĩkwa mwatabwira ĩse wuwe.

²Kandi Saũlo ĩnĩanĩkere oko muhana wʼeGĩbea oko ndĩna yʼomuti wʼekokomanga owali eMĩgronĩ. Nʼabandu ababya haguma naye babya balume nga magana ndatu (600);

³na Ahĩya, omugala wa Ahĩtũbũ, mugala wabo Ĩkabodĩ, mugala wa Fĩnehasĩ, mugala wa Elĩ, omũhererĩ wʼOmwami Mukulu eSĩlo, abya ambite eefodĩ. Nʼabandu mobataminya ngoko Yonatana abirigenda.

⁴Nʼomo mbatatanĩa yʼaho Yonatana asonda erisokera oko bateya bʼAbafĩlĩstĩnĩ, habya olukuka lwʼerĩbwe oko luhande luguma, nʼolukuka lwʼerĩbwe oko lundi luhande; nʼerĩna lyʼoluguma lwabya Bozezĩ, nʼerĩna lyʼolundi ryabya Sene.

⁵Olukuka luguma molwahangana elutambi lwʼendata embere syʼeMĩkĩmasĩ, nʼolundi elutambi lwʼeyĩkwa embere syʼeGeba.

⁶Neryo Yonatana mwabwira omũlwana oyo waheka ebindu byʼamalwa biwe ati, Wase, tusokere oko bateya batabwene aba; kwamũhwa Omwami Mukulu asyatukolera; kusangwa sihali ekyʼerĩkakĩrya Omwami Mukulu erĩlamya omo bangi kutse omo bake.

⁷Neryo omũhekĩ wʼebindu byʼamalwa biwe mwamubwira ati, Ukole ebyosĩ ebiri omo mutima wawe; ukebe, lebaya indi haguma nawe ngʼomutima wawe.

⁸Neryo Yonatana mwabũga ati, Lebaya, tukandisokera oko balume, ĩtwayĩkanganĩa kubo.

⁹Bamabũga netu bati, Mulinde aho twasyabahĩkĩrako; neryo twasyimana aho wetu, sitwendisyirukira kubo.

¹⁰Nĩkwa bamatubwira bati, Mwirukire eyo tuli; neryo twasyiruka; kusangwa Omwami Mukulu ĩnĩabĩrĩhĩrabo omo byala byetu nʼekĩ kyasyabya kiminyikalo ũkwʼĩtwe.

¹¹Nʼababiri abo mobayĩkanganĩa oko bateya bʼAbafĩlĩstĩnĩ; nʼAbafĩlĩstĩnĩ mobabũga bati, Lebaya Abaebrania bamalũa omo byũna aho bayĩbĩsa.

¹²Kandi abateya mobabwira Yonatana nʼomũhekĩ wuwe wʼebindu byʼamalwa, bati, Mwirukire aho tuli, netu tũkandĩbalolya oko mwatsi. Neryo Yonatana mwabwira omũhekĩ wʼebindu biwe byʼamalwa, ati, Uhetuke enyũma syage; kusangwa Omwami Mukulu abĩrĩhĩrabo omo byala byʼAbaĩsraelĩ.

¹³Na Yonatana mwahetuka omo byala biwe nʼebisando biwe, nʼomũhekĩ wuwe wʼebindu byʼamalwa enyũma wuwe; nabo mobawa embere sya Yonatana; nʼomũhekĩ wʼebyʼamalwa mwĩtabo enyũma siwe.

¹⁴Nʼerĩĩta eryo bayira lyʼerĩmbere, erya Yonatana nʼomũhekĩ wuwe wʼebindu byʼamalwa, lyabya nga bandu makũmĩ abiri omo kĩtĩngũ kyʼekibuga haraha nʼahangalimwa ekiro kiguma.

¹⁵Neryo mohabya erititimana omo kilaliriro, nʼomo malima, nʼomo katĩkatĩ kʼabandu. Abateya, nʼabanyeyĩ mobatitimana nibya; nʼekitaka mokyasũkana, mohabya omũsĩkĩ nʼerititimana lĩnene.

¹⁶Nʼabateya ba Saũlo eGĩbea ya Benyamĩna mobalangira; neryo, lebaya, endeko moyabulirana, mobaya eyĩ nʼeyĩ.

¹⁷Neryo Saũlo mwabwira bandu ababya haguma naye, ati, Muganze lino, mũlebaye nga nindi watũlũĩreko. Neryo babere baganza, lebaya Yonatana nʼomũhekĩ wuwe wʼebindu byʼamalwa isibaliho.

¹⁸Neryo Saũlo mwabwira Ahĩya ati, Ulete hano erĩsandũko lya Nyamuhanga. Kusangwa erĩsandũko lya Nyamuhanga lyabya oko mugulu oyo haguma nʼabana ba Ĩsraelĩ.

¹⁹Neryo mokyabya, omugulu Saũlo akanaya nʼomũhererĩ, olukanda olwabya omo kambĩ yʼAbafĩlĩstĩnĩ molwasa lukakanya; neryo Saũlo mwabwira omũhererĩ, ati, Lũsayaho ebyala byawe.

²⁰Na Saũlo nʼabandu bosĩ ababya haguma naye mobahĩndanĩbwa haguma, mobahĩka omo malwa; neryo lebaya, omũyalĩ wʼobuli mundu iniali uku mũlĩkyabo erĩĩtana, habya erĩsambĩkanĩa lĩnene.

²¹Nĩkwa Abaebrania ababya haguma nʼAbafĩlĩstĩnĩ kera, abahetuka haguma nabo omo kambĩ oko mbande syosĩ, nabo mobabũnũkala mobabya haguma nʼAbaĩsraelĩ ababya haguma na Saũlo na Yonatana.

²²Nibya abalume bosĩ ba Ĩsraelĩ babya babĩsamĩre omo kihugo kyʼebitwa kya Efũraĩmũ, omugulu bowa kwʼAbafĩlĩstĩnĩ basayĩre, nabo mobakwamirirabo kutsibu omo malwa.

²³Neryo Omwami Mukulu kwʼalamaya Ĩsraelĩ atya ekiro ekyo; nʼamalwa mwalaba hakũhĩ nʼeBetĩavenĩ.

²⁴Nʼabandu ba Ĩsraelĩ mobanamira ekiro ekyo; kusangwa Saũlo mwasema bandu, ati, Atakirawe omundu oyukandirya kalyo erĩhĩka omwʼĩgolo, erĩhĩka aho ngandĩkĩsĩrya esyonzĩgũ syage. Neryo mohatabya muguma oko bandu oyo wageraya kalyo.

²⁵Nʼabandu bosĩ mobaya omo mũsĩtũ; kandi habya obuki oko kitaka.

²⁶Nʼomugulu abandu bahĩka omo mũsĩtũ, lebaya, obuki bwabya bukatogonga; nĩkwa mohatabya mundu oyo walya kubo; kusangwa bandu mobubaha ekisemo.

²⁷Nĩkwa Yonatana mwatowa omugulu tata wuwe ahĩra bandu omwʼisema; neryo mwakolya obusongera bʼomũtso wuwe owabya omo byala biwe mwahĩrabo omo kisese kyʼobuki, neryo mwalya oko buki; neryo ameso wuwe mwabana maka.

²⁸Neryo omuguma gʼoko bandu mwabũga, ati, Tata wawe mwahana bandu bo kutsibu omo kisemo ati, Atakirawe omundu ukandirya kalyo mũnabwĩre. Nĩkwa bandu mobawira kutsibu.

²⁹Neryo Yonatana mwasũbĩrya, ati, Tata wage amagalya bandu. Lebaya, ngoko namabana maka kusangwa nabĩrĩgerya hake oko buki obũ.

³⁰Kumbe abandu balyalya oko binyegwa byʼesyonzĩgũ syabo ebyo balyegaya! Kusangwa lino sihetabya ekĩto omo katĩkatĩ kʼAbafĩlĩstĩnĩ.

³¹Neryo mobĩta Abafĩlĩstĩnĩ ekiro ekyo erĩtsũka eMĩkĩmasĩ erihĩka eAyalonĩ. Nʼabandu mobaluha kutsibu.

³²Kandi abandu mobagulukira ebinyegwa mobĩmya esyombũlĩ, nʼesyonume syʼesyonde, nʼehyana hyʼesyonde, mobakererasyo ahisi; nʼabandu mobalyasyo haguma nʼomusasi.

³³Neryo mobabwira Saũlo, bati, Lebaya, abandu bakahalaya oko Mwami Mukulu, kusangwa bakalya enyama haguma nʼomusasi. Naye mwabũga ati, Mwamahalya nʼobũgobya. Mũnyĩkũmbagalĩraye kwʼerĩbwe ĩnene mũnabwĩre.

³⁴Neryo Saũlo mwabũga ati, Mupanzikirane omo bandu, mubwirebo muti, Obuli mundu anyiretere hano enume yiwe yʼende, nʼobuli mundu embũlĩ yiwe, mukereresyo hano, mulye; sĩmũhalaye oko Mwami Mukulu erirya enyama haguma nʼomusasi. Nʼabandu bosĩ mobaleta obuli mundu enume yiwe yʼende omo kiro ekyo mobakerera syʼaho.

³⁵Na Saũlo mwahĩmbĩra Omwami Mukulu ekiherero; ni kiherero kyʼerĩmbere ekyo ahĩmbĩra Omwami Mukulu.

³⁶Neryo Saũlo mwabũga ati, Twandagalire Abafĩlĩstĩnĩ omo kiro, tũhũnge ebindu omo katĩkatĩ kabo erĩhĩka omo mwĩtsange, kandi sĩtũsĩge nʼomundu nʼomuguma wa kubo. Nabo mobabũga, bati, Ukole ekĩndũkĩ ekyo wanzĩre. Neryo omũhererĩ mwabũga ati, Tũyĩtũnde hakũhĩ na Nyamuhanga hano.

³⁷Neryo Saũlo mwabũlya Nyamuhanga, ati, Nyandagale erikwama Abafĩlĩstĩnĩ kwehĩ? Ũnemwendĩhĩrabo omo byala byʼAbaĩsraelĩ kwehĩ? Nĩkwa mwatamũsũbĩrya oko kiro ekyo.

³⁸Neryo Saũlo mwabũga ati, Mũyĩtũnde hano ĩnywe bakulu bosĩ bʼabandu; muminye nʼerilangira aho erĩlolo eryabere mũnabwĩre lyasĩrĩre.

³⁹Kusangwa, ngoko Mwami Mukulu aneho, oyũkalamaya Ĩsraelĩ, nʼomo erĩlolo eryo lyangabya uku Yonatana mugala wage, asyahola kwenene. Nĩkwa mohatabya mundu nʼomuguma omo katĩkatĩ kʼabandu bosĩ oyo wamũsũbĩraya.

⁴⁰Neryo mwabwira Abaĩsraelĩ bosĩ, ati, mubye oko luhande luguma, nage tuna Yonatana mugala wage tukandibya oko lundi luhande. Nʼabandu mobabwira Saũlo bati, Ukole ekyo wamasĩma.

⁴¹Neryo Saũlo mwabwira Omwami Mukulu, Nyamuhanga wa Ĩsraelĩ ati, Ũkangaye omugereko owahĩkene. Na Yonatana na Saũlo mwabawirako; nʼabandu mobabala.

⁴²Neryo Saũlo mwabũga ati, Mũtogaye omugereko omo katĩkatĩ kage na Yonatana mugala wage. Neryo mwawira Yonatana.

⁴³Neryo Saũlo mwabwira Yonatana, ati, Umbwire ekyo wakolĩre. Neryo Yonatana mwamubwira ati, Kwenene monagerya obuki buke oko busongera bʼomũtso owabya omo byala byage; neryo, ĩngye yono, litolere inahola!

⁴⁴Na Saũlo mwabũga ati, Nyamuhanga anyikole atya, na kwilaba aho kusangwa kwenene wasyahola Yonatana.

⁴⁵Nĩkwa bandu mobabwira Saũlo, bati, Yonatana asyahola kwehĩ? Oyo wakola erilama lĩnene erĩ omo Ĩsraelĩ? Lero iyihi! Ngoko Mwami Mukulu aliho, sihenditogera ahisi oluywiri luguma lwʼomutwe wuwe; kusangwa abirikola haguma na Nyamuhanga mũnabwĩre. Nʼabandu mobalamya Yonatana yo batya, siahole.

⁴⁶Neryo Saũlo mwaleka erikwama Abafĩlĩstĩnĩ; nʼAbafĩlĩstĩnĩ mobagenda ewabo.

⁴⁷Kandi Saũlo abere abĩmya obwami oko Baĩsraelĩ, mwalwa nʼesyonzĩgũ siwe syosĩ oko mbande syosĩ, oko Bamoabũ, nʼoko bagala ba Amonĩ, nʼAbaedomũ, nʼoko bami bʼeSoba, nʼAbafĩlĩstĩnĩ; nʼehosĩ agenda, mwakĩndabo.

⁴⁸Neryo mwakola nʼamaka, kandi mwĩta Abamalekĩ, nʼerĩlamya Abaĩsraelĩ omo byala byʼabandu abanyegabo.

⁴⁹Nĩkwa abagala ba Saũlo babya Yonatana, na Ĩswĩ, na Malĩkĩsũa; nʼamena wʼabali buwe babiri waya: erĩna lyʼakanyere iyo Merabũ, nʼerĩna lyʼomulere wa kubo iyo Mĩkalĩ.

⁵⁰Nʼerĩna lyʼomũkalĩ wa Saũlo yo Ahĩnoamũ mwali wa Ahĩmasĩ. Nʼerĩna lyʼomukulu wʼemilondo yiwe lyabya Abĩnerĩ mugala wa Nerĩ, ĩsemulere wa Saũlo.

⁵¹Na Kĩsĩ abya ĩse wa Saũlo; na Nerĩ ĩse wa Abĩnerĩ abya mugala wa Abĩelĩ.

⁵²Kandi mohabya amalwa awakalĩre nʼAbafĩlĩstĩnĩ ebiro byosĩ bya Saũlo. Kandi omugulu Saũlo alangira omundu wʼamaka, kutse embangĩ, mwamũhĩra oko basĩrĩkanĩ buwe.