Read nande 1 Samwelĩ 15 Bible Online

1 Samwelĩ 15 - nande bible

1 Samwelĩ 15

¹Neryo Samwelĩ mwabwira Saũlo ati, Omwami Mukulu mwanyituma erĩkũhakabya amagũta eribya mwami oko bandu buwe, Abaĩsraelĩ. Neryo lino uhulikirire omulenge wʼebĩnywa byʼOmwami Mukulu.

²Omwami Mukulu wʼemilondo ati, Nabirilangira ekyo Abamalekĩ bakolera Abaĩsraelĩ, ngoko ayihanda erilwa naye omo nzira, omugulu alũa eMĩsĩrĩ.

³Lino ugende wĩte Abamalekĩ, kandi ũheraye ebyosĩ bawite, kandi sũbalayebo, nĩkwa mwĩte abalume nʼabakalĩ, omwana oyukonga, ende nʼembũlĩ, engamia nʼepunda.

⁴Na Saũlo mwabirikira bandu, mwaganzirabo eTelaĩmũ, abandu abakagenda omo bisando elfu magana abiri (200,000), nʼabalume ba Yũda elfu ĩkũmĩ (10,000).

⁵Na Saũlo mwahĩka oko mũyĩ wʼAbamalekĩ, kandi mwalambirabo omo musya.

⁶Neryo Saũlo mwabwira Abakenĩ, Mugende, mũlũeho, mwandagale erĩlũa omo Bamalekĩ, ngasyabaherya haguma nabo; kusangwa momwakola ekibuya oko bana bosĩ ba Ĩsraelĩ, omugulu bahetuka bakalũa eMĩsĩrĩ. Neryo Abakenĩ mobalũa omo katĩkatĩ kʼAbamalekĩ.

⁷Neryo Saũlo mwĩta Abamalekĩ, erĩtsũka eHavĩla omo nzira eyikalolera eSũrĩ owali embere syʼeMĩsĩrĩ.

⁸Neryo mwahamba Agagĩ omwami wʼAbamalekĩ inianeho, kandi mwĩta abandu bosĩ omo boya bʼomũyalĩ.

⁹Nĩkwa Saũlo nʼabandu buwe mobabalya Agagĩ, nʼesyowene-wene syʼesyombũlĩ, nʼesyʼesyonde, nʼesyʼesyosabwe, nʼehyana hyʼembũlĩ, nʼebyosĩ ebyabya byowene, mobatalĩga erĩheryabyo kutsibu. Nĩkwa obuli kindu ekyabya kibi nʼekyʼesyonye, mobaheryabyo kutsibu.

¹⁰Neryo ekĩnywa kyʼOmwami Mukulu mokyahĩka uku Samwelĩ, kiti,

¹¹Namayĩkũbya bomo erĩhĩra Saũlo eribya mwami; kusangwa abirisuba enyũma butanyikwama, kandi sĩalĩtaberererya ebihano byage. Neryo Samwelĩ mwakwa obũlĩge, kandi mwalakira Omwami Mukulu omo kiro kyosĩ.

¹²Na Samwelĩ mwahangana omo ngyakya-ngyakya erĩyahĩndana na Saũlo; na Samwelĩ mwabwirwa ambu, Saũlo ahĩkĩre eKaramelĩ, neryo mwayĩhanganĩrya erĩbwe ryʼerimwibuka, kandi mwabũnũkala, mwandagalira eGĩlgalĩ.

¹³Neryo Samwelĩ mwahĩka uku Saũlo; na Saũlo mwamubwira ati, Utsumulawe nʼOmwami Mukulu, nabĩrĩberererya ekihano kyʼOmwami Mukulu.

¹⁴Nĩkwa Samwelĩ mwabũlya ati, Eryama lyʼesyombũlĩ nʼesyonde eryo ngowa, nĩ ryakĩ kwehĩ?

¹⁵Na Saũlo mwasũbĩrya ati, Bamalũsyasyo oko Bamalekĩ; kusangwa bandu babalaya ebyowene byʼesyombũlĩ nʼebyʼesyonde, erihongera Omwami Mukulu Nyamuhanga wawe; nĩkwa ebindi twabĩrĩheryabyo kutsibu.

¹⁶Neryo Samwelĩ mwabwira Saũlo, ati, Ulinde, nage ngandikubwira ebyo Mwami Mukulu aliambwira omo kiro. Naye mwamubwira ati, Ego bũga.

¹⁷Neryo Samwelĩ mwabũga ati, Nomo wanabya muke omo meso wawe, mutayirwa mo mukulu wʼebihanda byʼAbaĩsraelĩ kwehĩ? NʼOmwami Mukulu mwakũhakabya amagũta eribya mwami wa Ĩsraelĩ;

¹⁸nʼOmwami Mukulu mwakutuma oko lugendo, ati, Ugende wĩte abakola-nabi Abamalekĩ, nʼerilwa nabo erĩhĩka okwʼibugabo.

¹⁹Neryo busana nakĩ mũtowa omulenge wʼOmwami Mukulu, nĩkwa mowahahũkĩra ebinyegwa, nʼerikola ekyabya kibi omo meso wʼOmwami Mukulu kwehĩ?

²⁰Na Saũlo mwabwira Samwelĩ, ati, Ega, monowa omulenge wʼOmwami Mukulu, nabirikwama enzira eyo Mwami Mukulu anyitumamo, kandi nabirireta Agagĩ omwami wʼAbamalekĩ, kandi nabĩrĩherya kũndũ Abamalekĩ.

²¹Nĩkwa bandu mobĩmya oko binyegwa, esyombũlĩ nʼesyonde, ebibuya kũndũ oko bindu ebyasololawa busana nʼerĩherĩbwa, erihongera Omwami Mukulu Nyamuhanga wawe eGĩlgalĩ.

²²Neryo Samwelĩ mwabũga ati, Ko Mwami Mukulu asĩmĩre amahere wʼerĩokererya nʼamahere ngʼerikenga omulenge wʼOmwami Mukulu kwehĩ? Lebaya, erĩowa lyowene kwilaba amahere, nʼerihulikirira lĩlabĩre ebĩsabũ byʼesyombangale.

²³Kusangwa erĩlolo lyʼepono liri ngʼerĩlolo lyʼobulagu, nʼobutabwirika buli ngʼebibi nʼerisaba esyosanamu. Kusangwa wabirigana ekĩnywa kyʼOmwami Mukulu, naye abirikugana ati, Susyebya mwami.

²⁴Neryo Saũlo mwabũga na Samwelĩ, ati, Nabĩrĩhalya; kusangwa nabĩrĩtsandya ekihano kyʼOmwami Mukulu, nʼebĩnywa byawe, kusangwa monubaha bandu, neryo monowa omulenge wabo.

²⁵Neryo lino, kĩsĩ-kĩsĩ, ubuyire ebibi byage, uswesuba haguma nage, inatoka erĩramya Omwami Mukulu.

²⁶Nĩkwa Samwelĩ mwabũga na Saũlo ati, Sindiendiswasuba haguma nawe; kusangwa wabirigana ekĩnywa kyʼOmwami Mukulu, nʼOmwami Mukulu abirikugana eribya mwami wʼAbaĩsraelĩ.

²⁷Neryo Samwelĩ abere abũnũkala akagenda, Saũlo mwahamba omutsotso wʼekanzu yiwe, nayo moyatulika.

²⁸Na Samwelĩ mwamubwira ati, Mũnabwĩre Omwami Mukulu amakutulangirako obwami bwa Ĩsraelĩ, abirihabo uku mũlĩkyenyũ, omubuya kwilaba we.

²⁹Kandi Olukengerwa lwa Ĩsraelĩ silwendisyabiha kutse eribinduka; kusangwa iye si mundu ukayisubako.

³⁰Neryo Saũlo mwabũga ati, Namabĩhalya, nĩkwa kĩsĩ-kĩsĩ lino, ũnyĩsĩkaye embere syʼabakulu bʼomo bandu bage, nʼembere syʼAbaĩsraelĩ, uswesuba haguma nage, inatoka erĩramya Omwami Mukulu ye Nyamuhanga wawe.

³¹Litya Samwelĩ mwabũnũkala mwaswakwamana na Saũlo; na Saũlo naye mwaramya Omwami Mukulu.

³²Neryo Samwelĩ mwabũga ati, Munyiretere Agagĩ, omwami wʼAbamalekĩ yo hano. Neryo Agagĩ mwamũhĩkako nʼobutseme. Kandi Agagĩ mwabũga ati, Monzo obwagalĩ bwʼoluholo bwabirilaba.

³³Nĩkwa Samwelĩ mwabũga, ati, Ngoko mũyalĩ wawe abĩrĩsĩga bakalĩ bo bũmbũtete, litya koyo wawe akandĩsĩgala bũmbũtete omo katĩkatĩ kʼabandi bakalĩ. Neryo Samwelĩ mwakenzenga Agagĩ mo bitswe-bitswe embere syʼOmwami Mukulu eGĩlgalĩ.

³⁴Kandi Samwelĩ mwaya eRama; nĩkwa Saũlo mwahetukira eka wuwe eGĩbea ya Saũlo.

³⁵Kandi Samwelĩ mwataswalola uku Saũlo erĩhĩka oko kiro kyʼoluholo luwe; kusangwa Samwelĩ mwalirira Saũlo. NʼOmwami Mukulu mwayĩkũbya bomo eriyira Saũlo mo mwami wʼAbaĩsraelĩ.