Read nande 1 Samwelĩ 16 Bible Online

1 Samwelĩ 16 - nande bible

1 Samwelĩ 16

¹Neryo Omwami Mukulu mwabũga na Samwelĩ ati, Wasyakolyahi eriririra Saũlo ĩnũnasĩ ko nabirimugana eribya mwami wa Ĩsraelĩ kwehĩ? Wosũlaye omwʼĩhembe lyawe mwʼamagũta, ugende. Ngandikutuma eyiri Yese, Omunya Betelehemũ; kusangwa nabiriyibanira omwami omo bagala buwe.

²Neryo Samwelĩ mwabũga ati, Ngandigenda nyiti kwehĩ? Saũlo amowago, ĩnĩasyanyĩta. Kandi Omwami Mukulu mwabũga ati, Utwale enyana yʼende haguma nawe, ũbũge uti, Namasa eriherera Omwami Mukulu.

³Kandi ubirikire Yese ase oko buhere obo, kandi nasyakũkangya ebyo wasyakola; kandi wasyanyĩhakabĩrya oyo nasyakwahũlĩrya.

⁴Neryo Samwelĩ mwakola ebyo Mwami Mukulu abũga, neryo mwagenda eBetelehemũ. Nʼabakulu bʼomũyĩ oyo mobayahĩndana naye ibanemutitimana, bati, Unemwasira buholo kwehĩ?

⁵Naye mwabũga ati, Nina buholo; ngasa erisyaherera Omwami Mukulu. Muyisolole, mwase haguma nage oko buhere obo. Neryo mwasolola Yese nʼabagala buwe, kandi mwabirikirabo oko buhere obo.

⁶Neryo babere babĩhĩkamo, mwasamalira Elĩabũ neryo mwabũga ati, Kwenene omũhakabĩbwa wʼOmwami Mukulu ali embere siwe.

⁷Nĩkwa Omwami Mukulu mwabwira Samwelĩ ati, Susamalire obubuya buwe, kutse obuli bwʼolubu alirimo kusangwa nabirimugana; kusangwa Omwami Mukulu sialisamalira ngʼomundu kwʼakasamalira; kusangwa omundu akalangira erisosa lyʼeyĩhya, nĩkwa Omwami Mukulu akasamalira omo mutima.

⁸Neryo Yese mwabirikira Abĩnadabũ, mwamũlabya embere sya Samwelĩ. Naye mwabũga ati, Omwami Mukulu sialitayisoga oyũ.

⁹Neryo Yese mwalabya Sama. Neryo mwabũga, ati, Omwami Mukulu sialitayisoga nʼoyũ.

¹⁰Kandi Yese mwalabya abagala buwe balinda embere sya Samwelĩ. Na Samwelĩ mwabwira Yese ati, Omwami Mukulu sialitayisoga Ukwʼaba.

¹¹Neryo Samwelĩ mwabũlya Yese ati, Kwʼabana bawe bosĩ bane hano kwehĩ? Naye mwabũga ati, Yamasĩgalira Omulere wa kubo, neryo lebaya akalĩsaya esyombũlĩ. Neryo Samwelĩ mwabwira Yese ati, Tumayo bamulete; kusangwa sĩtwendĩkala ate ahĩka hano.

¹²Neryo mwamutumirako, mwamuletamo. Neryo abya akomerere ini mubuya omo meso, abya nʼobusose bowene. Neryo Omwami Mukulu mwabũga ati, Hangana, ũmũhakabaye amagũta; kusangwa yoyũ.

¹³Neryo Samwelĩ mwĩmya erĩhembe eriri mwʼamagũta, mwamũhakabya omo katĩkatĩ kʼabagala babo. NʼOmũlĩmũ wʼOmwami Mukulu mwahĩka uku Dawĩdĩ ko kutsibu erĩtsũka oko kiro ekyo. Neryo Samwelĩ mwahangana mwaya eRama.

¹⁴Neryo Omũlĩmũ wʼOmwami Mukulu mwalũa uku Saũlo, nʼekĩrĩmũ kibi Omwami Mukulu atuma mokyamũhahũkya.

¹⁵Neryo abagombe ba Saũlo mobamubwira bati, Talebaya, ekĩrĩmũ kibi kikatumawa na Nyamuhanga kĩkakũhahũkaya.

¹⁶Omukama wetu ahane abagombe bawe abali embere syawe, basondaye omundu oyo wasĩ eriwata enanga yo ndeke, neryo omugulu ekĩrĩmũ kibi kĩkalũa ewa Nyamuhanga kyamakũhĩkako, neryo asyawata enanga omo byala biwe, nawe iwalama.

¹⁷Neryo Saũlo mwabũga nʼabagombe buwe ati, Munyisondere omundu oyukawatayo ndeke, neryo mundetereye.

¹⁸Neryo omũlwana muguma mwasũbĩrya ati, Talebaya, nabirilangira mugala wa Yese Munya Betelehemũ, asĩ eriwatayo ndeke, kandi nĩ mbangĩ yʼamaka, kandi ni mundu wʼamalwa, kandi nĩ mbũyĩ, nʼomundu mubuya; kandi Omwami Mukulu ali haguma naye.

¹⁹Kyaleka Saũlo iniatuma abakwenda ewa Yese, ati, Unyitumire Dawĩdĩ omugala wawe oyũkalĩsaya esyombũlĩ.

²⁰Neryo Yese mwĩmya epunda mwahekyayo amandu, nʼakasya kʼebĩnyũ, nʼekyana kyʼembene mwatumirabyo Saũlo haguma na mugala wuwe Dawĩdĩ.

²¹Neryo Dawĩdĩ mwahĩka eyiri Saũlo, mwahangana embere siwe. Neryo Saũlo mwamwanza kutsibu; kandi Dawĩdĩ mwabya mũhekĩ wʼebindu biwe byʼamalwa.

²²Na Saũlo mwatumira Yese ati, Uleke Dawĩdĩ ahangane embere syage; kusangwa abĩrĩsĩmwa omo meso wage.

²³Neryo omugulu ekĩrĩmũ kibi Nyamuhanga atuma kyabya uku Saũlo, Dawĩdĩ mwĩmya enanga, neryo mwawatayo omo byala biwe. Neryo Saũlo mwakĩranĩbwa, mwalama, nʼekĩrĩmũ kibi ekyo mokyamũlũako.