Read nande 1 Samwelĩ 2 Bible Online

1 Samwelĩ 2 - nande bible

1 Samwelĩ 2

¹Neryo Hana mwasaba, ati, Omutima wage akatsemera Omwami Mukulu; Amaka wage akapipawa omo Mwami Mukulu; Obuno bwage bwamasanzukala oko nzĩgũ syage; Kusangwa ngatsemera erĩlamya lyawe.

²Sihali oyũbũyĩrĩre ngʼOmwami Mukulu; Kusangwa sihali gundi butsira we, Kutse sihali gundi mwĩmĩrĩ nga Nyamuhanga wetu.

³Simuyihalambe kandi nʼeriyanza mutya; Eriyihandika sirihuluke omo buno bwenyũ; Kusangwa Omwami Mukulu ni Nyamuhanga wʼeriminya, Naye akalenga emikolere.

⁴Amata wʼesyombangĩ abĩrĩtsũtsangika; Nĩkwa abandu bolo bakayĩsũnga nʼamaka.

⁵Ababya bũgũtĩre bakayakolera ebyʼerirya; Nĩkwa ababya nʼenzala babĩrĩũmbya erĩkwayo. Ega, omugumba abiributa abalinda; Nĩkwa oyuwite abana bangi akakonongoka.

⁶Omwami Mukulu akĩta, kandi akaha engebe. Akandagalĩraya eKũlĩmũ, kandi akahanganaya.

⁷Omwami Mukulu akahĩra abera, nʼabateke. Akakehaya, akahamaya nibya.

⁸Akahanganaya abera erĩlũa omo lũtũtũ, Akasumba owʼobwaga erĩlũa omo kyabũ, Erĩĩkalyabo haguma nʼabanya-mwami, Nʼerĩsĩgalya ekĩtũmbĩ kyʼeripipwa. Kusangwa esyondũyĩ syʼekihugo ni syʼOmwami Mukulu, Kandi mwasingika ekihugo kyo kusyo

⁹Asyateya ebisando byʼabandu buwe abakamukenga. Nĩkwa ababi basyagasamĩbwa omo mwĩrĩmya; Kusangwa omo maka sihali mundu wasyasĩngana.

¹⁰Abakalwa nʼOmwami Mukulu, basyatsũtsangwa mo hitswe-hitswe; Asyahũtĩryabo omũlũmo erĩlũa elubula. Omwami Mukulu asyatswera esyondũlĩ syʼekihugo; Asyaha omwami wuwe yʼamaka, Nʼerĩhamya amaka wʼomũhakabĩbwa wuwe.

¹¹Neryo Elkana mwaya eRama eka wuwe, Nʼomwana oyo mwakolera Omwami Mukulu iniane nʼomũhererĩ Elĩ.

¹²Nĩkwa abagala ba Elĩ babya bandu batya-batya; ĩsĩbasĩ Omwami Mukulu,

¹³nʼemitsye yʼabahererĩ oko bandu ko yabya itya. Omugulu omundu akahera obuhere, omugombe wʼomũhererĩ iniasa omugulu esĩswĩ sikinabera, inianawite oko kyuma kyʼemigera ĩsatu omo byala biwe.

¹⁴Ĩnĩakolyakyo kinya-maka omo kabindi kutse omo munaga, kutse omo kibindi, kutse omo nyungu; neryo esĩswĩ syosĩ esikasumbawa nʼekyuma ekyo, omũhererĩ ĩnĩakĩmayasyo busana naye. Mobakola batya eSĩlo oko Baĩsraelĩ bosĩ abahĩkayo.

¹⁵Ega, embere wʼerĩokererya ebĩsabũ omugombe wʼomũhererĩ iniakasa iniabwira omundu oyukaherera ati, Umbe esĩswĩ syʼerĩokererya busana nʼomũhererĩ, kusangwa sialikusonda kwʼĩswĩ sĩhũkĩre, nĩkwa esyombisi nyisa.

¹⁶Nʼomundu oyo amamubwira ati, Bakandĩtsũka kwenene erĩokererya ebĩsabũ, neryo ĩwĩmya ebyosĩ ebyo mutima wawe anganza; neryo iniamubwira ati, Iyihi, nĩkwa ukandimbasyo lino; bite bitya, ĩnayĩmĩryasyo nʼamaka.

¹⁷Nʼekibi kyʼabalwana kyabya kinene kutsibu embere syʼOmwami Mukulu kusangwa abandu mobapona obuhere bʼOmwami Mukulu.

¹⁸Nĩkwa Samwelĩ mwakolera Omwami Mukulu, inina mwana, kandi inianambite eefodĩ yʼekĩtanĩ.

¹⁹Kandi nyĩnya wuwe mwamulukira akakanzu, mwamuleterako obuli mwaka, omugulu ahetuka nʼĩba wuwe erihera obuhere bwʼobuli mwaka.

²⁰Na Elĩ mwatsumula Elkana nʼomũkalĩ wuwe, mwabũga ati, Omwami Mukulu akuhe abana oko mũkalĩ oyũ omo mwanya wʼoyo aha Omwami Mukulu. Neryo mobaya eka wabo.

²¹Kandi Omwami Mukulu mwasyalũngũlĩra Hana, naye mwaheka amakule, mwabuta abagala basatu nʼabali babiri. Nʼomwana ye Samwelĩ mwakulira embere syʼOmwami Mukulu.

²²Nĩkwa Elĩ abya mũsyakulu kutsibu; neryo mowa ebyosĩ ebyo bagala buwe bakolera Abaĩsraelĩ bosĩ, kandi ngoko bagotsera nʼabakalĩ abakolĩ bʼoko lũkyo lwʼeHema yʼerĩhĩndanamo.

²³Neryo mwabwirabo ati, Busana nakĩ mukakola emyatsi yingaha kwehĩ? Kusangwa ngowa emikolere yenyũ mibi oko bandu bosĩ aba.

²⁴Koko, bagala bage; kusangwa si ngulu yowene eyo ngowa. Mukaleka abandu bʼOmwami Mukulu Ĩbahalya.

²⁵Omundu amahalya oko gundi, Nyamuhanga asyamutswera; nĩkwa omundu amahalya oko Mwami Mukulu, nindi wasyayamusabira kwehĩ? Nĩkwa mobatowa omulenge wa tata wabo, kusangwa Omwami Mukulu abya anzĩre erĩĩtabo.

²⁶Nʼomwana ye Samwelĩ mwakula, kandi mwakanya omwʼĩsĩmwa nʼOmwami Mukulu nʼabandu nibya.

²⁷Neryo omundu wa Nyamuhanga mwahĩka uku Elĩ, mwamubwira ati, Omwami Mukulu akabũga ati, Mondayĩkangya oko kĩtũnga kya tata wawe omugulu babya eMĩsĩrĩ omo mũlĩkĩ wʼekihanda kya Farao kwehĩ?

²⁸Kandi mondayisoga ye omo bihanda byosĩ bya Ĩsraelĩ eribya mũhererĩ wage, erihetuka oko kiherero kyage, nʼerĩhĩsya obukwa, nʼeriambala eefodĩ embere syage kwehĩ? Kandi mondaha ekĩtũnga kya tata wawe kyʼamahere gosĩ wʼabana ba Ĩsraelĩ awakayirawa omo muliro kwehĩ?

²⁹Neryo busana nakĩ mukakala oko hongo yage nʼobuhere bwage, ebyo nabirihamula omo nyũmba yage yʼerĩĩkalamo ĩmũkasĩkaya abagala bawe kwilaba ngye, erĩyĩnenehya omo mahere mabuya gosĩ wʼabandu bage Ĩsraelĩ kwehĩ?

³⁰Neryo Omwami Mukulu, Nyamuhanga wa Ĩsraelĩ ati, Kwenene monabũga nyiti ekĩtũnga kyawe, nʼekĩtũnga kya tata wawe, kyasyalendera embere syage emigulu yosĩ; nĩkwa lino Omwami Mukulu ati, Kinyihigukaleko. Kusangwa abakanyĩsĩkaya nasyasĩkyabo, nʼabakanyipona sĩbendĩsyasĩmwa ndeke.

³¹Lebaya, ebiro bikasa, nasyatwa amaka wawe, nʼamaka wʼekĩtũnga kya tata wawe, sihendisyabya omũsyakulu omo nyũmba yawe.

³²Kandi wasyalebya obũlĩge bwʼaho nyĩkere, nomo nangakola ebibuya byosĩ busana na Ĩsraelĩ; kandi sihendisyabya omũsyakulu omo nyũmba yawe na kera.

³³Nĩkwa, sindiendĩsyalũsya obuli mundu wawe oko kiherero kyage, ameso wawe akasyaluha busana nʼeririra, nʼomutima wawe iniagalwa. Kandi abakabutawa omo nyũmba yawe basyaholera omo musuko wabo.

³⁴Nʼekĩ kyasyabya kiminyikalo ukʼuwe, ekyasyahĩka oko bagala bawe babiri, ye Hofũnĩ na Fĩnehasĩ; ababiri bosĩ basyaholera kiro kiguma.

³⁵Nage nasyayĩhanganĩrya omũhererĩ oyuteregula oyo wasyakola ngʼebiri omo mutima wage nʼomo kĩrĩmũ kyage. Nage nasyamũhĩmbĩra enyũmba eyĩsĩkĩre; naye asyalendera embere syʼomũhakabĩbwa wage emigulu yosĩ.

³⁶Neryo oyo wasyasĩgalira omo nyũmba yawe asyasa nʼerĩũnama embere siwe busana nʼekĩtsĩpa kiguma nʼekihande kyʼobundu, kandi asyabũga ati, Kĩsĩ-kĩsĩ, ũmbĩre omo mũbĩrĩ muguma wʼabahererĩ, inatoka erirya akatole kaguma kʼobundu.