Read nande 1 Samwelĩ 20 Bible Online

1 Samwelĩ 20 - nande bible

1 Samwelĩ 20

¹Neryo Dawĩdĩ mwasaga mwalũa eNayotĩ eRama, mwasa mwabũga na Yonatana, ati, Namakolakĩ kwehĩ? Nʼamalolo wage ni wahi kwehĩ? Nʼerĩhalya lyage ni ryahi embere sya tata wawe, ati akasonda-sonda engebe yage kwehĩ?

²Neryo mwamubwira ati, Lero iyihi, siwendisyahola; lebaya tata wage sialikola kindu kinene kutse kike, atetanyĩkũmbũlĩrakyo. Ko busana nakĩ tata wage akanyĩbĩsa kʼomwatsi oyũ kwehĩ? Ko bite bitya.

³Neryo Dawĩdĩ mwaswalahĩrya ati, Tata wawe anasĩ ndeke ko nabĩrĩsĩmwa omo meso wawe; neryo akabũga ati, Yonatana siaminye omwatsi oyũ akasyakwa bũlĩge. Nĩkwa kwenene ngoko Mwami Mukulu aliho, kandi ngoko ekĩrĩmũ kyawe kiriho, hali ngʼeribasula liguma lisa omo katĩkatĩ kage nʼoluholo.

⁴Neryo Yonatana mwabwira Dawĩdĩ ati, Ekyo mutima wawe akabũga, kyo ngandikukolera.

⁵Neryo Dawĩdĩ mwabũga na Yonatana ati, Lebaya, omungya omukera iniatwa, nage sinangabula erĩĩkala haguma nʼomwami okwʼirya. Nĩkwa Uleke nyĩyabĩsame omo kisuki erĩhĩka omwʼĩgologolo lyʼekiro kyʼakasatu.

⁶Kandi tata wawe amanyibula, neryo ũbũge uti, Dawĩdĩ ka mwakanyisaba olugendo lwʼeriya eBetelehemũ eka wuwe; kusangwa iri obuhere bwʼomwaka busana nʼekĩtũnga kyosĩ.

⁷Amabũga ati, lyowene; omugombe wawe asyabya nʼobuholo. Nĩkwa amahitana iwaminya kwʼakandayĩrĩre erĩtwa omwaga.

⁸Neryo ukolere omugombe wawe yʼekibuya; kusangwa wabirilagana nʼomugombe wawe omo ndagano nʼOmwami Mukulu; nĩkwa namabya indi mwʼerĩlolo, ĩwanyĩta ĩwowene-wene; kusangwa busana nakĩ ukasyanyitwala eyiri tata wawe kwehĩ?

⁹Neryo Yonatana mwabũga ati, Sikikubyeko; kusangwa kumbe ngʼĩndwe nyasĩ ko tata wage akandayĩrĩre erikukola nabi nga sinditakubwira kwehĩ?

¹⁰Neryo Dawĩdĩ mwabwira Yonatana ati, Nindi wasyambwira ko tata wawe asyakũsũbĩrya nabi kwehĩ?

¹¹Neryo Yonatana mwabwira Dawĩdĩ, ati, Wase tuye omolĩ. Neryo ababiri bosĩ mobaya omolĩ.

¹²Neryo Yonatana mwabwira Dawĩdĩ, ati, Omwami Mukulu, Nyamuhanga wa Ĩsraelĩ, abye mũlangĩrĩ omugulu namabĩbũlĩrĩrya tata ngʼesaa eno omungya kutse mwalindi, lebaya, hamabya ekĩnywa kibuya kitolere Dawĩdĩ, kwe sindiendikulayirako nʼerĩkũkũmbũlĩrakyo kwehĩ?

¹³Omwami Mukulu akole Yonatana atya na kwilaba aho nibya, tata wage amanza erikukola nabi, namatendĩkũkũmbũlĩrakyo, nʼerĩkũkwamanĩsya, iwatoka erigenda buholo; kandi Omwami Mukulu abye nawe, ngoko abiribya na tata wage.

¹⁴Neryo namabya nyikineho sĩwendĩsyanyĩkangya obwenge bwʼomwami Mukulu, isinahola kwehĩ?

¹⁵Kandi nibya sũsyelũsaya obubuya bwawe bʼoko kĩtũnga kyage na kera; kutse omo mugulu Omwami Mukulu asyĩta esyonzĩgũ sya Dawĩdĩ oko kihugo kyosĩ.

¹⁶Ko Yonatana ayira atya endagano nʼekĩtũnga kya Dawĩdĩ, ati, Omwami Mukulu akĩsayeyo omo byala byʼesyonzĩgũ sya Dawĩdĩ.

¹⁷Kandi Yonatana mwaswalahĩsya Dawĩdĩ busana nʼolwanzo abya nalo busana naye; kusangwa amwanza ngoko abya anzĩre engebe yiwe.

¹⁸Neryo Yonatana mwamubwira ati; Omungya ni ʼtwa lyʼomugenda; neryo wasyabula, kusangwa ekĩtũmbĩ kyawe kyasyabya busa.

¹⁹Wasyabya wabuga yo biro bisatu, wasyandagala lũba, wasyahĩka aho wayĩbĩsa omugulu omwatsi abyaho, neryo Wasyĩkala hakũhĩ nʼerĩbwe Ezelĩ.

²⁰Nage nasyalasa emisoha ĩsatu oko mũsĩke walyo, nga ngasonda erilasa erirengerera.

²¹Neryo, nasyatuma omũlwana nyiti, Ugende ũsondaye emisoha. Namabwira omũlwana oyo nyiti, Talebaya, emisoha iri oko luhande uliko; utoleyo neryo wase; obo ni buholo kuwe isihali mwaga, ngoko Mwami Mukulu aliho.

²²Nĩkwa namabwira omũlwana nyiti, Lebaya emisoha iri embere syawe; uyigendere; kusangwa Omwami Mukulu abĩrĩkũhongokya erigenda.

²³Nĩkwa eriahula omwatsi ogo twalagana tunawe, talebaya, Omwami Mukulu ali omo katĩkatĩ ketu tunawe kera na kera.

²⁴Kandi Dawĩdĩ mwayĩbĩsa omolĩ; nʼomugulu eritwa lyʼomugenda lyahĩka, omwami mwĩkala ahisi erirya akalyo.

²⁵Nʼomwami mwĩkala oko kĩtũmbĩ kiwe ngʼebindi biro, oko kĩtũmbĩ ekyabya hakũhĩ nʼolũhĩmbo; neryo Yonatana mwahangana, na Abĩnerĩ mwĩkala hakũhĩ na Saũlo; nĩkwa ekĩtũmbĩ kya Dawĩdĩ mokyabya busa.

²⁶Nĩkwa Saũlo mwatabũgakĩ ekiro ekyo; kusangwa aganĩraya ati, Awite ekyo akwĩre, sĩerĩre; kwenene sĩerĩre.

²⁷Neryo engyakya enyũma wʼeritwa lyʼomugenda kye kiro kyʼebibiri, omwanya wa Dawĩdĩ abya busa; neryo Saũlo mwabũga na Yonatana mugala wuwe, ati, Ekyaleka mugala wa Yese atasa okwʼirya mũlĩgolo kutse mũnabwĩre nĩkĩ kwehĩ?

²⁸Na Yonatana mwasũbĩrya Saũlo, ati, anyisaba olugendo lwʼeriya eBetelehemũ;

²⁹mwabũga ati, Leka nyigende, kĩsĩ-kĩsĩ; kusangwa ekĩtũnga kyetu kiwite obuhere omo mũyĩ; na mugala wetu abĩrĩnyĩbũlya eriyayo. Na lino, namabana erĩsĩmwa omo meso wawe, kĩsĩ-kĩsĩ leka ngende, eriyalola oko bagala betu. Kyo kyalekĩre ĩnĩatahĩka oko mesa yʼOmwami.

³⁰Neryo erihitana lya Saũlo molyagulumira uku Yonatana, neryo mwamubwira ati, Uwe mugala wʼomũkalĩ wʼomwaga nʼoyukapona! Uti Sĩnyasĩ ko wabiriyisoga mugala wa Yese erikuhemula, nʼerihemula koyo wawe kwehĩ?

³¹Kusangwa omugulu gosĩ mugala wa Yese akineho omo kihugo, uwe, kutse obwami bwawe sibwendisyahangana. Neryo lino umutumireko undetereye, kusangwa kwenene atolere iniahola.

³²Neryo Yonatana mwasũbĩrya ĩse wuwe ye Saũlo, mwamubwira ati, Ĩtawe busana nakĩ kwehĩ? Akolĩrekĩ kwehĩ?

³³Neryo Saũlo mwamugusako erĩtũmo liwe erimutsimita; kyaleka Yonatana iniaminyira aho ĩse wuwe kwʼarũtĩrwe erĩĩta Dawĩdĩ.

³⁴Neryo Yonatana mwahangana erĩlũa oko mesa nʼerihitana lĩkalĩre, kandi mwatalya kalyo ekiro kyʼakabiri kyʼomukera; kusangwa mwakwĩra ye Dawĩdĩ yʼobũlĩge, kusangwa ĩse wuwe iniamabimuhemula.

³⁵Neryo engyakya wʼaho, Yonatana mwaya omolĩ oko saa alagana na Dawĩdĩ, nʼakalwana haguma naye.

³⁶Neryo mwabwira omũlwana wuwe ati, Tibita, utole emisoha eyo ngalasa. Nʼomugulu omũlwana atibita, mwalasa omusoha mwamũtwanganĩa goko.

³⁷Nʼomũlwana abere ahĩka aho Yonatana alasa omusoha, Yonatana mwabirikira omũlwana ati, Omusoha siali embere syawe kwehĩ?

³⁸Kandi Yonatana mwabirikira omũlwana ati, Anguha, genda-genda, sulindirire. Neryo omũlwana wa Yonatana mwakuma-kuma emisoha mwahĩka eyiri omukama wuwe.

³⁹Nĩkwa omũlwana oyo mwataminyakĩ. Yonatana na Dawĩdĩ bo banabya basĩ omwatsi oyo.

⁴⁰Neryo Yonatana mwaha omũlwana wuwe yʼebindu biwe byʼamalwa, mwamubwira ati, Genda, utwalebyo omo mũyĩ mwʼeka.

⁴¹Neryo omũlwana abere abigenda, Dawĩdĩ mwasosokala ebwanga bwʼelutambi lwʼeyĩkwa, kandi mwayĩtũlĩka ahisi, mwayũnamya kasatu; neryo mobalyatsirirana, mobaliriranako, nĩkwa Dawĩdĩ mwabya nʼobũlĩge kutsibu.

⁴²Kandi Yonatana mwabwira Dawĩdĩ ati, Uyigendere buholo, kusangwa twabĩrĩlahĩrĩranĩa ĩtwe babiri omo lĩna lyʼOmwami Mukulu, tuti, Omwami Mukulu asyabya omo katĩkatĩ kage nawe, nʼomo katĩkatĩ kʼabana bage nʼabana bawe, erĩsyahĩka kera na kera. Neryo Dawĩdĩ mwahangana mwagenda. Na Yonatana mwasuba eka omo mũyĩ.