Read nande 1 Samwelĩ 22 Bible Online

1 Samwelĩ 22 - nande bible

1 Samwelĩ 22

¹Litya Dawĩdĩ mwalũayo, mwabalira omo mwangalũ wʼeAdũlamũ; nʼomugulu bagala babo nʼekĩtũnga kyosĩ kyʼĩse bowago, mobamwandagalira kwʼeyo.

²Nʼobuli mundu oyo wabya omo bũlĩge, nʼobuli mundu wabya mwʼemĩnda, nʼobuli mundu oyo wabya nʼobunube, mobayĩhĩndanĩa aho ali; naye mwabya mũsondolĩ wabo. Nʼababya haguma naye babya nga bandu magana ani.

³Neryo Dawĩdĩ mwalũayo mwaya eMĩsĩpa yʼeMoabũ; neryo mwabwira omwami wʼeMoabũ ati, Ngakusaba ũlĩgĩre tata na koyo balũe eyo bali bĩkale enawenyũ, erĩhĩka aho nasyaminyira ekyo Nyamuhanga asyanyikolera.

⁴Neryo mwaletabo embere syʼOmwami wʼeMoabũ; neryo mobĩkala naye omugulu gosĩ Dawĩdĩ abya ahakagatĩre.

⁵Nʼomũmĩnyererĩ Gadĩ mwabwira Dawĩdĩ ati, Sĩwĩkale ahakagatĩre; ũlũeho, ugende omo kihugo kya Yũda. Neryo Dawĩdĩ mwahongoka mwahĩka omo mũsĩtũ wʼeHeretĩ.

⁶Neryo Saũlo mowa ko Dawĩdĩ amabanika nʼabandu ababya naye. Neryo Saũlo abya ĩkere eGĩbea, omo ndĩna yʼomuti wʼomugenge eRama, iniawite okwʼĩtũmo omo byala biwe, nʼabagombe buwe bosĩ babya bimeme ĩbanamũtĩmbĩreko.

⁷Neryo Saũlo mwabwira bagombe buwe ababya bamũtĩmbĩreko, ati, Mowe lino, ĩnywe Babenyamĩna; omugala wa Yese anasyaha obuli mundu kwĩnywe amalima nʼamalima wʼebĩnyũ, asyabayira mo basondolĩ bʼamaelfu nʼabasondolĩ bʼamagana kwehĩ?

⁸Kusangwa ĩnywe bosĩ mukanyiyira embĩta, isihali nʼomuguma oyũkanyombomberaya nʼerĩnyĩkũmbũlĩra omugulu mugala wage akalagana na mugala wa Yese, kandi sihali nʼomuguma gʼũkwʼĩnywe ũkanyĩkwĩra bũlĩge, kutse erĩnyombomberyako mugala wage abĩrĩtsotsya omugombe wage erilwa nage, nʼerĩnyĩrĩmbya, nga mũnabwĩre.

⁹Neryo Doegĩ Omunya Edomũ, oyo wabya imene hakũhĩ nʼabagombe ba Saũlo mwasũbĩrya, ati, Monalangira mugala wa Yese akaya eNobĩ, ewa Ahĩmelekĩ mugala wa Ahĩtũbũ.

¹⁰Neryo mwamũbũganganira oko Mwami Mukulu, kandi mwamuha nʼebyalya, kandi mwamuha omũyalĩ wa Golĩata Omũfĩlĩstĩnĩ.

¹¹Neryo omwami mwatuma eriyabirikira Ahĩmelekĩ omũhererĩ, omugala wa Ahĩtũbũ, nʼekĩtũnga kyosĩ kyʼĩse wuwe, abahererĩ ababya eNobĩ. Neryo abosĩ mobasa ahali omwami.

¹²Neryo Saũlo mwabũga, ati, Hulikirira lino, uwe mugala wa Ahĩtũbũ. Naye mwasũbĩrya ati, Ĩngye yono, mukama wage.

¹³Neryo Saũlo mwamubwira ati, Busana nakĩ mwabirinyiyira embĩta, uwe na mugala wa Yese, kundi wabirimuha mandu, nʼomũyalĩ, kandi wabĩrĩmũbũganganira uku Nyamuhanga, uti anyihulukireko nʼerĩnyĩrĩmbya, nga mũnabwĩre kwehĩ?

¹⁴Neryo Ahĩmelekĩ mwasũbĩrya omwami, ati, Ko nindi yuteregula omo katĩkatĩ kʼabagombe bawe bosĩ nga Dawĩdĩ, Omukwe wʼOmwami, nʼoyukabya omo mbĩta yawe, nʼoyũsĩkĩbwe omo kĩtũnga kyawe kwehĩ?

¹⁵Ko mũnabwĩre monamatsũka erĩmũbũganganira na Nyamuhanga kwehĩ? Sikinyibyeko! Omwami sĩahĩre oko mugombe wuwe ko mwatsi nʼomuguma, kutse nʼoko kĩtũnga kyosĩ kya tata wage; kusangwa omugombe wawe sĩasĩ ebyosĩ ebĩ nʼahake, kutse nʼehwehwelĩ.

¹⁶Neryo omwami mwabũga ati, Uwe Ahĩmelekĩ kwenene ukandihola, nʼekĩtũnga kyosĩ kya tata wawe.

¹⁷Neryo omwami mwabwira abateya ababya bahangene bakamũteya, ati, Mubinduke, mwĩte abahererĩ bʼOmwami Mukulu, kusangwa bali omo mbĩta ya Dawĩdĩ, kandi banabya basĩ kwʼatibita, mobatanyombomberya. Nĩkwa bagombe bʼomwami mobatalĩga erisumbirabo ebyala nʼerĩĩta abahererĩ bʼOmwami Mukulu.

¹⁸Neryo omwami mwabwira Doegĩ ati, ubinduke, wĩte abahererĩ. Neryo Doegĩ Omũedomũ mwabũnũkala mwagulukira oko bahererĩ, ekiro ekyo mwĩta bandu makũmĩ munani nʼabatanu, abambite eefodĩ yʼekĩtanĩ.

¹⁹Kandi mwĩta eNobĩ omũyĩ wʼabahererĩ omo boya bʼomũyalĩ, abalume nʼabakalĩ, abana, nʼesyomekeke, nʼesyonde nibya nʼesyopunda nʼesyombũlĩ, omo boya bʼomũyalĩ.

²⁰Nĩkwa omuguma gʼoko bagala ba Ahĩmelekĩ mugala wa Ahĩtũbũ, oyukahulawa mo Abĩatarĩ, mwabala, mwasagira eyiri Dawĩdĩ.

²¹Kandi Abĩatarĩ mwabwira Dawĩdĩ ngoko Saũlo abĩrĩta abahererĩ bʼOmwami Mukulu.

²²Neryo Dawĩdĩ mwabwira Abĩatarĩ ati, Oko kiro ekyo Doegĩ Omũedomũ abyaho monaminya kwenene kwʼakandibwira Saũlo. Ĩngye nalekĩre abandu bosĩ bʼekĩtũnga kyosĩ kya tata wawe ibahola.

²³Wĩkale haguma nage, Sigubahe; kusangwa oyukasonda-sonda engebe yage iniakasonda-sonda engebe yawe; kusangwa Wasyabana Obuholo haguma nage.