Read nande 1 Samwelĩ 28 Bible Online

1 Samwelĩ 28 - nande bible

1 Samwelĩ 28

¹Neryo oko biro ebyo, Abafĩlĩstĩnĩ mobahĩndanĩa emilondo yabo yʼamalwa haguma busana nʼeriyalwa nʼAbaĩsraelĩ. Na Akĩsĩ mwabwira Dawĩdĩ ati, Uminye ndeke ko wasyahongoka haguma nage omo mulondo wʼamalwa, uwe, haguma nʼabalume bawe.

²Neryo Dawĩdĩ mwabwira Akĩsĩ ati, Wasyaminya ekyo mugombe wawe asyakola. Neryo Akĩsĩ mwabwira Dawĩdĩ ati, Ngandikuyira mo mũteya wʼomubiri wage ebiro byosĩ.

³Neryo Samwelĩ abya iniabirihola, nʼAbaĩsraelĩ bosĩ ibamabimulira, neryo mobamuta eRama, omo mũyĩ wuwe. Kandi Saũlo iniabirihiga abosĩ ababya mbandwa, nʼabakũmũ erĩlũa omo kihugo.

⁴NʼAbafĩlĩstĩnĩ mobayĩhĩndanĩa haguma, mobasa mobateka ekilaliriro eSũnemũ; kandi Saũlo mwahĩndanĩa Abaĩsraelĩ bosĩ bo haguma, nabo mobateka ekilaliriro eGĩlboa.

⁵Neryo omugulu Saũlo alangira emilondo yʼAbafĩlĩstĩnĩ, mubaha, nʼomutima wuwe mwatitimana kutsibu.

⁶Nʼomugulu Saũlo abũlaya Omwami Mukulu, Omwami Mukulu mwatamũsũbĩrya, kutse nʼomo nzolĩ, kutse omo Ũrĩmũ,[1] kutse nʼomo bamĩnyererĩ.

⁷Neryo Saũlo mwabwira bagombe buwe, ati, Mũnyĩsonderaye omũkalĩ oyuli kwʼembandwa, inatoka eriya eyo ali, nʼerĩmũbũlĩrĩrya. Nʼabagombe buwe mobamubwira bati, Lebaya hali mũkalĩ oyuli mbandwa eEndorĩ.

⁸Neryo Saũlo mwayihindula, mwambala esindi ngimba, neryo mwagenda, iye nʼabalume babiri haguma naye, mobahĩkĩra omũkalĩ oyo omo kiro; neryo mwabũga ati, kĩsĩ-kĩsĩ nyiti, undagule, unyiretere oyo ngandĩkwahũlĩrya.

⁹Nʼomũkalĩ oyo mwamubwira ati, Ũnasĩ ebyo Saũlo abirikola, ngoko abirihiga abʼesyombandwa, nʼabakũmũ bo munakihugo; neryo busana nakĩ ukatega engebe yage busana nʼerireka inahola kwehĩ?

¹⁰Neryo Saũlo mwamũlahĩrĩrya omo Mwami Mukulu, ati, Ngoko Mwami Mukulu aliho, siwendisyasuyirwa busana nʼomwatsi oyũ.

¹¹Neryo omũkalĩ oyo mwabũga ati, Ko nindi oyo ngandikuletera kwehĩ? Naye mwabũga ati, Unyiretere Samwelĩ.

¹²Nʼomugulu omũkalĩ oyo alangira Samwelĩ, mwalaka nʼomulenge munene; nʼomũkalĩ oyo mwabwira Saũlo ati, Busana nakĩ wabirinyiteba kwehĩ? kusangwa uwe uli Saũlo.

¹³Nʼomwami mwamubwira ati, Sigubahe; kusangwa wamalola kũkĩ kwehĩ? Nʼomũkalĩ mwabwira Saũlo ati, Ngalangira Omũlĩmũ akalũa omo kitaka.

¹⁴Kandi Saũlo mwabũga naye, ati, Erisosa, asosĩre ati kwehĩ? Naye mwabũga ati, Omũsyakulu akahetuka; kandi aswĩkĩrwe ekanzu. Neryo Saũlo mwaminya kwʼali Samwelĩ, neryo mũnamĩrya obũsũ buwe bwʼahisi, kandi mwamũnamira.

¹⁵Neryo Samwelĩ mwabwira Saũlo ati, Busana nakĩ ũkanyĩlũhaya erĩnyĩhetũkya kwehĩ? Na Saũlo mwabũga ati, Indi omo bũlĩge bunene; kusangwa Abafĩlĩstĩnĩ bakalwa nage, na Nyamuhanga abĩrĩnyĩlũako, sĩakĩnyĩsũbĩraya kandi, kutse omo bamĩnyererĩ, kutse nʼomo nzolĩ; kyo kikaleka inakubirikira, iwatoka erĩnyĩmĩnyĩsya ebyo nangakola.

¹⁶Kandi Samwelĩ mwabũga ati, Busana nakĩ ũkanyĩbũlaya kwehĩ? Omwami Mukulu amabya abĩrĩkũlũako naye iniabiribya nzĩgũ yawe.

¹⁷Omwami Mukulu abirikukolera, ngoko abũgĩra ũmwʼĩngye; kandi Omwami Mukulu abĩrĩlũsya obwami bʼomo byala byawe, abirihabo uku mũlĩkyenyũ, ye Dawĩdĩ.

¹⁸Kusangwa mũtowa omulenge wʼOmwami Mukulu, kandi mũtaberererya erihitana liwe erĩkalĩre oko Bamalekĩ, kyalekĩre Omwami Mukulu iniakukolera omwatsi oyũ mũnabwĩre.

¹⁹Kandi Omwami Mukulu asyahĩra Ĩsraelĩ haguma nawe omo byala byʼAbafĩlĩstĩnĩ; nʼomo ngyakya uwe nʼabagala bawe mwasyabya haguma nage. Omwami Mukulu asyahĩra emilondo yʼamalwa ya Ĩsraelĩ omo byala byʼAbafĩlĩstĩnĩ nibya.

²⁰Neryo Saũlo mwayĩtũlĩka ahisi oko kitaka, kandi mubaha kutsibu, busana nʼebĩnywa bya Samwelĩ; kandi mwataswayira maka; kusangwa isialitalya omo musibo gosĩ nʼomo kiro kyosĩ.

²¹Neryo omũkalĩ oyo mwahĩka uku Saũlo, mwalangira kwʼakubaha kutsibu, neryo mwamubwira ati, Lebaya, omutsana wawe abirihulikirira omulenge wawe, neryo nabĩrĩhĩra engebe yage omo bwĩko, neryo nabirihulikirira ebĩnywa byawe ebyo wambwira.

²²Na lino, kĩsĩ-kĩsĩ, ũhũlĩkĩrĩraye omulenge wʼomutsana wawe, Uleke nyĩhĩre ehyalya embere syawe; ulye, imowatoka eribana maka, omugulu ukagenda.

²³Nĩkwa iye mwagana, ati, Sindiendirya. Nĩkwa abagombe buwe, haguma nʼomũkalĩ oyo, mobamuhatikana; naye mwowa omulenge wabo. Neryo mwahangana akalũa oko kitaka, mwĩkala oko ngyingo.

²⁴Nʼomũkalĩ oyo abya awite ekyana kyʼende ekĩnenehĩre omo nyũmba; neryo mwanguha, mwakerakyo, kandi mwĩmya nʼeyĩsyano mwatsumbayo, mwokya kuyo kʼobundu bute mo kĩhamya.

²⁵Neryo mwaleterabyo Saũlo, nʼabagombe buwe; nabo mobalya. Neryo mobahangana, mobahongoka omo kiro ekyo.