Read nande 1 Samwelĩ 29 Bible Online

1 Samwelĩ 29 - nande bible

1 Samwelĩ 29

¹Nĩkwa Abafĩlĩstĩnĩ mobahĩndanĩa emilondo yʼamalwa yabo yosĩ eAfekĩ; nʼAbaĩsraelĩ mobahanda ekilaliriro hakũhĩ nʼeyĩsoko eyiri eYezreelĩ.

²Nʼabakama bʼAbafĩlĩstĩnĩ mobatwangana embere amagana oko magana, nʼamaelfu oko maelfu; na Dawĩdĩ nʼabalume buwe mobalaba enyũma-nyũma haguma na Akĩsĩ.

³Neryo abasondolĩ bʼAbafĩlĩstĩnĩ mobabũga bati, Abaebrania aba bakakola hano hokĩ kwehĩ? Na Akĩsĩ mwabwira abasondolĩ bʼAbafĩlĩstĩnĩ ati, Oyũ sĩ Dawĩdĩ, omugombe wa Saũlo omwami wa Ĩsraelĩ, oyo wabiribya haguma nage oko biro ebĩ, kutse emyaka eyĩ kwehĩ? Nage sinditabana oluhabo umwʼiye erĩtsũka ekiro ambĩkako nʼerĩhĩka mũnabwĩre.

⁴Nĩkwa abasondolĩ bʼAbafĩlĩstĩnĩ mobamuhitanako; nʼabasondolĩ bʼAbafĩlĩstĩnĩ mobamubwira bati, Sũbũlaya omundu oyũ, asube aho wamũhĩra, kandi siandagale haguma netu okwʼiyalwa, akasyayabya nzĩgũ yetu yʼomo malwa; kusangwa omundu oyũ angayĩsanganĩa ũmũkĩ nʼomukama wuwe kwehĩ? Isi ye mitwe yʼabalume aba kwehĩ?

⁵Dawĩdĩ oyũ siye oyo basatira nʼeriimba bati, Saũlo abĩrĩta amaelfu wuwe, Na Dawĩdĩ amaelfu wuwe makũmĩ kwehĩ?

⁶Neryo Akĩsĩ mwabirikira Dawĩdĩ mwamubwira ati, Ngoko Mwami Mukulu aliho, Wabiribya oyutunganene, kandi erihuluka lyawe nʼeriswingira lyawe haguma nage omo mulondo wʼamalwa nĩ byʼerĩsĩmwa omo meso wage; kusangwa sinditabana obubi umʼuwe erĩtsũka ekiro wambĩkako nʼerĩhĩka mũnabwĩre. Nĩkwa abakama sibetakũsĩma omo meso wabo.

⁷Neryo lino Usubule, ugende buholo, ũkasyahĩtanĩa abakama bʼAbafĩlĩstĩnĩ.

⁸Neryo, Dawĩdĩ mwabwira Akĩsĩ ati, Nĩkwa nakolĩrekĩ kwehĩ? Kandi, wamatabanakĩ omo mugombe wawe erĩtsũka ekiro nahĩka embere syawe erĩhĩka mũnabwĩre; kyangaleka inindayalwa nʼesyonzĩgũ syʼOmukama wage omwami kwehĩ?

⁹Neryo Akĩsĩ mwasũbĩrya mwabwira Dawĩdĩ ati, Nyĩnasĩ ngoko ngakũsĩma omo meso wage, ngʼomũlaĩka wa Nyamuhanga; nĩkwa abasondolĩ bʼAbafĩlĩstĩnĩ babĩrĩbũga bati, Siendisyahetukira oko malwa haguma netu.

¹⁰Neryo lino utsinduke omo ngyakya-ngyakya haguma nʼabagombe bʼomukama wawe abasa haguma nawe; neryo imwatsinduka omo tũtũtũ, imwagenda.

¹¹Neryo Dawĩdĩ mwatsinduka omo ngyakya-ngyakya, iye nʼabalume buwe, erihongoka omo tũtũtũ, erisuba omo kihugo kyʼAbafĩlĩstĩnĩ. NʼAbafĩlĩstĩnĩ mobahetukira eYezreelĩ.