Read nande 1 Samwelĩ 3 Bible Online

1 Samwelĩ 3 - nande bible

1 Samwelĩ 3

¹Nʼomwana ye Samwelĩ mwakolera Omwami Mukulu iniane na Elĩ. Nʼekĩnywa kyʼOmwami Mukulu oko biro ebyo kyabya isikyebanika lũba; nʼesyonzolĩ isi nyingi.

²Neryo oko mugulu oyo, Elĩ abere abigotsera aho wuwe nĩkwa ameso wuwe ĩnĩabĩrĩtsũka erĩrĩbana, isiakitoka erilangira ndeke,

³Nʼetala ya Nyamuhanga yabya isiriyahumbera, na Samwelĩ ĩnĩanagalamĩre omo Hekalũ yʼOmwami Mukulu, ahali erĩsandũkũ lya Nyamuhanga;

⁴neryo Omwami Mukulu mwabirikira Samwelĩ, naye mwabũga ati, Nandi hano.

⁵Neryo mwanguha eriya eyiri Elĩ ati, Nandi hano; kusangwa uliambirikira. Naye mwabũga ati, Sinditakubirikira; uyagotsere kandi. Naye mwayagotsera kandi.

⁶Neryo Omwami Mukulu mwaswabirikira ati, Samwelĩ, na Samwelĩ mwahangana, mwaya eyiri Elĩ, mwabũga ati, Nandi hano; kusangwa uliambirikira. Naye mwamũsũbĩrya ati, Sinditakubirikira, mugala wage, uyagotsere kandi.

⁷Nĩkwa Samwelĩ abya isialiaminya Omwami Mukulu, kutse ekĩnywa kyʼOmwami Mukulu isikiri kyabĩsũlĩrwa ukwʼiye.

⁸Neryo Omwami Mukulu mwabirikira Samwelĩ kandi engendo yʼakasatu. Neryo Samwelĩ mwahangana mwaya eyiri Elĩ mwabũga ati, Nandi hano; kusangwa uliambirikira. Neryo Elĩ mwaminya Omwami Mukulu ko yuliabirikira omwana.

⁹Kyaleka Elĩ iniabwira Samwelĩ ati, Genda ugotsere; neryo amasyakubirikira, ĩwabũga uti, Ũbũge, Mwami Mukulu; kusangwa omugombe wawe anahũlĩkĩrĩre. Neryo Samwelĩ mwayagotsera aho wuwe.

¹⁰Neryo Omwami Mukulu mwasa, mwahangana, mwabirikira ngoko abya akabirikira ati, Samwelĩ, Samwelĩ. Neryo Samwelĩ mwabũga ati, Ũbũge, kusangwa omugombe wawe anowĩre.

¹¹Neryo Omwami Mukulu mwabwira Samwelĩ ati, Lebaya, nasyakola omwatsi omo Ĩsraelĩ, amatwĩ abiri gosĩ wʼabandu bosĩ abakowago asyatunayira.

¹²Oko kiro ekyo, nasyakolera Elĩ yʼebyosĩ ebyo nabũga busana nʼekĩtũnga kiwe, eritandika oko nzũko erĩhĩka oko ndũlĩ.

¹³Kusangwa monamubwira nyiti, Nasyatswera ekĩtũnga kiwe kera na kera, busana nʼekibi ekyo abya asĩ, kusangwa abagala buwe mobayiretera eritakira, naye mwatakungabo.

¹⁴Kandi busana nʼekyo, nabĩrĩlahĩrya oko kĩtũnga kya Elĩ nyiti erĩlolo lyʼekĩtũnga kya Elĩ siryendisyalihirwa embanulo omo hongo kutse omo buhere kera na kera.

¹⁵Neryo Samwelĩ mwayagotsera erĩhĩka engyakya. Neryo mwakingula esyonyũyĩ syʼenyũmba yʼOmwami Mukulu. Nĩkwa Samwelĩ mubaha erĩkangya esyonzolĩ esyo.

¹⁶Neryo Elĩ mwabirikira Samwelĩ, mwabũga ati, Samwelĩ, mugala wage. Naye mwabũga ati, Nandi hano.

¹⁷Neryo mwabũga ati, Nĩ kĩnywa kyahi alĩabũga nawe kwehĩ? Kĩsĩ-kĩsĩ, sũmbĩsekyo. Nyamuhanga akukolere atya na kwilaba aho, wamanyĩbĩsa kindu oko myatsi yosĩ aliakubwira.

¹⁸Neryo Samwelĩ mwamubwira ebyosĩ-ĩbyosĩ, mwatamũbĩsako nʼekiguma. Neryo Elĩ mwabũga, ati, Yo nʼOmwami Mukulu. Akole ekyowene omo meso wuwe.

¹⁹Neryo Samwelĩ mwakula, nʼOmwami Mukulu mwabya haguma naye, mwataleka ekĩnywa kiwe nʼekiguma kikabulirana.

²⁰Neryo Abaĩsraelĩ bosĩ erĩtsũka eDanĩ erĩhĩka eBerĩ-seba mobaminya ko Samwelĩ abĩrĩhanganĩbwa eribya mũmĩnyererĩ wʼOmwami Mukulu.

²¹Kandi Omwami Mukulu mwaswabutukira eSĩlo; kusangwa Omwami Mukulu mwayĩbĩsũla uku Samwelĩ eSĩlo omo kĩnywa kyʼOmwami Mukulu.