Read nande 1 Samwelĩ 30 Bible Online

1 Samwelĩ 30 - nande bible

1 Samwelĩ 30

¹Neryo omugulu Dawĩdĩ nʼabalume buwe bahĩka eZĩklagĩ oko kiro kyʼebisatu, Abamalekĩ ĩbamabĩhũnga ebwanga bwʼeNegevĩ nʼeZĩklagĩ, ĩbamabĩherya eZĩklagĩ nʼerĩhĩsyako omo muliro,

²kandi ibamabinyega abakalĩ nʼabosĩ ababyako, abalere nʼabakulu, mobatĩta nʼomuguma, nĩkwa mobahekabo, mobayigendera.

³Neryo omugulu Dawĩdĩ nʼabalume buwe bahĩka eka, lebaya, ĩkwabĩrĩhĩsĩbwa omo muliro; nʼabakalĩ babo, nʼabagala, nʼabali, ibamabinyegwa.

⁴Neryo Dawĩdĩ nʼabandu ababya naye, mobasumba emirenge yabo, mobalira, erĩhĩka okwʼiluha ndeke.

⁵Nʼabakalĩ babiri ba Dawĩdĩ ibamabinyegwa, Ahĩnoamũ Omũyezreelĩ, na Abĩgaĩlĩ muka Nabalĩ Omũkarmelĩ.

⁶Kandi Dawĩdĩ mwasĩsĩkana kusangwa bandu mobabũga bati bamwĩte omo mabwe, kusangwa emitima yʼabandu bosĩ moyasĩrĩkalĩra, obuli mundu busana nʼabagala buwe na busana nʼabali buwe; nĩkwa Dawĩdĩ mwayibanira maka omo Mwami Mukulu Nyamuhanga wuwe.

⁷Kandi Dawĩdĩ mwabwira Abĩatarĩ omũhererĩ, mugala wa Ahĩmelekĩ, ati, Kĩsĩ-kĩsĩ, undetere eefodĩ yo hano. Na Abiatarĩ mwaletera Dawĩdĩ yʼeefodĩ.

⁸Neryo Dawĩdĩ mwabũlya Omwami Mukulu ati, Nyikwame omulondo oyũ kwehĩ? Ngandĩhĩka kubo kwehĩ? Naye mwamũsũbĩrya, ati, Kwamabo; kusangwa kwenene ũkandĩhĩka kubo, kandi kwenene wasyaswabana ebyosĩ.

⁹Neryo Dawĩdĩ mwahongoka, iye nʼabalume buwe magana ndatu ababya haguma naye, mobahĩka oko lũsĩ lwʼeBesorĩ, aho abasĩgala enyũma bĩkala.

¹⁰Nĩkwa Dawĩdĩ mwayitsinga erikwamirira, iye nʼabalume magana ani; kusangwa amagana abiri abasĩgala enyũma, babya ibamabiluha nʼerirembera mobataluka okwʼisoka olũsĩ lwʼeBesorĩ.

¹¹Neryo mobeya Omũmĩsĩrĩ omolĩ, mobamuleta ahali Dawĩdĩ, mobamuha ebyalya naye mwalya; kandi mobamuha magetsi wʼerĩpũlya.

¹²Neryo mobamuha akatswe kʼomusamo wʼomũtĩnĩ, nʼemikololo ĩbĩrĩ yʼebĩgũma byʼebĩnyũ; neryo mwalyabyo; neryo ekĩrĩmũ kiwe mokyamusubako. Kusangwa iniamabuga emisibo ĩsatu nʼebiro bisatu isialitalya kalyo kutse erĩpũlya magetsi.

¹³Neryo Dawĩdĩ mwamũbũlya, ati, Uli wandi kwehĩ? kandi uli wa kuhi kwehĩ? Naye mwabũga ati, Ĩngye indi mũlwana wʼeMĩsĩrĩ, omugombe wʼOmũmalekĩ; nʼomukama wage abĩrĩnyĩsĩganĩa, kusangwa hamatakya biro bisatu inyinalwere.

¹⁴Motwayasambula eNegevĩ yʼAbanya Keretĩ, nʼekyʼAbayũda, nʼeNegevĩ ya Kalebũ; kandi motwahĩsya eZĩklagĩ.

¹⁵Neryo Dawĩdĩ mwamũbũlya ati, Wanganatũkolya oko mulondo oyũ kwehĩ? Naye mwabũga, ati, Mũnyĩlahĩrĩraye uku Nyamuhanga, muti sĩmwendĩsyanyĩta, kutse erĩnyĩhĩra omo byala byʼomukama wage, nage ngandĩkũkolya oko mulondo oyo.

¹⁶Neryo abere abĩkolyabo eyĩkwa eyo, lebaya, ibamabiyisanza ehosĩ oko kitaka, ibakalya nʼerĩpũlya, nʼerisata, busana nʼebinyegwa bingi ebyosĩ bahũnga omo kihugo kyʼAbafĩlĩstĩnĩ, nʼomo kihugo kya Yũda.

¹⁷Neryo Dawĩdĩ mwĩtabo erĩtsũka omo hĩrĩmya hyangu-hyangu erĩhĩka omwʼĩgolo-golo lyʼengyakya; kandi mohatabala mundu nʼomuguma wa kubo, ba nʼabalwana magana ani, abagenda oko syongamia nʼeritibita.

¹⁸Neryo Dawĩdĩ mwabũnũla ebyosĩ ebyo Abamalekĩ banyega; kandi Dawĩdĩ mwanyegũlya abakalĩ buwe babiri.

¹⁹Kandi mohatatala kindu nʼekiguma, kike kutse kinene, kutse bagala, kutse bali, kutse eminyego, kutse kindu bahũnga busana nabo; Dawĩdĩ mwasũbũlya ebyosĩ.

²⁰Kandi Dawĩdĩ mwĩmya esyombũlĩ syosĩ nʼesyonde esyo babinga embere syʼesindi nde, bati, Ebĩ ni minyego ya Dawĩdĩ.

²¹Neryo Dawĩdĩ mwahĩka oko balume magana abiri abaluha ibakataluka erikwama Dawĩdĩ, abo basĩga oko lũsĩ lwʼeBesorĩ, nabo mobahongoka bakayahĩndana na Dawĩdĩ, nʼerĩyahĩndana nʼabandu ababya haguma naye; neryo Dawĩdĩ mwahĩka hakũhĩ nʼabandu abo mwakeryabo.

²²Neryo abandu babi bosĩ nʼabandu batya-batya abʼoko babya bakagenda na Dawĩdĩ, mobabũga bati, Kusangwa mobatagenda netu, sitwendihabo oko minyego eyo twayayĩbũnũlĩra, yo nʼomũkalĩ wʼobuli mundu, nʼabana buwe, iniatoka erisondolabo nʼerigenda.

²³Neryo Dawĩdĩ mwabũga ati, Simukole mutya, balĩkyetu, umwʼekyo Mwami Mukulu abirituha, oyo watũtegaya, nʼerĩhĩra omulondo owahĩka erilwa netu, omo byala byetu.

²⁴Kandi nindi wasyabahulikirira omo mwatsi oyũ kwehĩ? Kusangwa erĩgabo lyʼoyuliagenda omo malwa Ukandibya ngʼerĩgabo lyʼoyũlĩasĩgala nʼebindu; basyasangira nʼerĩrĩngĩrĩranĩa.

²⁵Neryo mobyabya bitya erĩtsũka oko kiro ekyo nʼerĩhĩka enyũma ukwʼaho, mwayirakyo mo mugambo nʼekilayiro omo Baĩsraelĩ erĩhĩka na mũnabwĩre.

²⁶Neryo omugulu Dawĩdĩ ahĩka eZĩklagĩ, mwatuma eminyego yʼoko bakulu ba Yũda, oko bĩra buwe, ati, Lebaya, olũsũnzo busana nenyũ oko minyego yʼesyonzĩgũ syʼOmwami Mukulu.

²⁷Oko bandu babya eBetelĩ, nʼoko babya eRamotĩ yʼeLutambi lwʼeyĩkwa nʼoko bandu babya eYatĩrĩ,

²⁸nʼoko bandu babya eAroerĩ, nʼoko babya eSĩfũmotĩ, nʼoko babya eEstamoa,

²⁹nʼoko babya eRakalĩ, nʼoko babya omo mĩyĩ yʼAbayeremelĩ, nʼoko babya omo mĩyĩ yʼAbakenĩ,

³⁰nʼoko bandu babya eHorma, nʼoko babya eBora-sanĩ, nʼoko babya eAtakĩ,

³¹nʼoko bandu babya eHebũronĩ, nʼoko hosĩ aho Dawĩdĩ nʼabandu buwe babya babegere erĩhĩka.