Read nande 1 Samwelĩ 31 Bible Online

1 Samwelĩ 31 - nande bible

1 Samwelĩ 31

¹Kandi Abafĩlĩstĩnĩ mobalwa nʼAbaĩsraelĩ; nʼabandu ba Ĩsraelĩ mobasaga Abafĩlĩstĩnĩ, mobawa ĩbamabĩtĩrwa oko kitwa kyʼeGĩlboa.

²NʼAbafĩlĩstĩnĩ mobakwamirira Saũlo yo kutsibu nʼabagala buwe; nʼAbafĩlĩstĩnĩ mobĩta Yonatana, na Abĩnadabũ, na Malĩkĩ-sũa, abagala ba Saũlo.

³Nʼamalwa mwakala kutsibu uku Saũlo, nʼabalasĩ bʼobuta mobamubana; nʼabalasĩ bʼobuta mobamũhũtalya kutsibu.

⁴Neryo Saũlo mwabwira omũhekĩ wuwe wʼebindu byʼamalwa, ati, Kula omũyalĩ wawe, ũnyĩlũbe gomo, abatabwene aba bakasyanyĩlũba gomo, nʼerĩnyĩsekererya. Nĩkwa omũhekĩ wuwe wʼebindu byʼamalwa mwagana; kusangwa mubaha kutsibu. Kyaleka Saũlo ĩnĩmya omũyalĩ wuwe mwawa mugo.

⁵Kandi omũhekĩ wuwe wʼebindu byʼamalwa, abere alebya ko Saũlo amabihola, naye mwawa omo mũyalĩ wuwe nibya, mwahola haguma naye.

⁶Neryo Saũlo kwʼahola atya, nʼabagala buwe basatu, nʼomũhekĩ wuwe wʼebindu byʼamalwa, nʼabandu buwe bosĩ, haguma naye oko kiro ekyo.

⁷Kandi omugulu abandu ba Ĩsraelĩ ababya eyisirya wʼomusya oyo, nʼababya eyisirya wʼeYorodanĩ, babere balangira bandu ba Ĩsraelĩ bakasaga, kandi ngoko Saũlo nʼabagala buwe ko bamabihola, mobasĩga emĩyĩ yabo mobatibita; nʼAbafĩlĩstĩnĩ mobahĩka mobĩkala omo mĩyĩ eyo.

⁸Neryo engyakya wʼaho, omugulu Abafĩlĩstĩnĩ basa erĩtũtũla ebinyego oko bĩnda, mobeya Saũlo nʼabagala buwe basatu ibabiriwa oko kitwa kyʼeGĩlboa.

⁹Neryo mobamũtwa kʼomutwe, mobamũtũtũla kwʼebindu biwe byʼamalwa, mobatumabyo omo kihugo kyʼAbafĩlĩstĩnĩ omo mbande syosĩ, erĩyatũla engulu oko nyũmba yʼesyosanamu syabo, nʼoko bandu.

¹⁰Kandi mobahĩra ebindu byʼamalwa biwe byʼomo nyũmba ya Astarotĩ; nʼekĩnda kiwe mobabambakyo oko lũhĩmbo lwʼeBetĩ-sanĩ.

¹¹Kandi esyondũlanĩ syʼeYabesĩ-gĩleadĩ babere bowa ebyo Bafĩlĩstĩnĩ bakolera Saũlo,

¹²esyombangĩ syosĩ mosyahangana, mosyagenda omo kiro kyosĩ, mobĩmya omubiri wa Saũlo nʼemibiri yʼabagala buwe oko lũhĩmbo lwʼeBetĩ-sanĩ; mobahĩka eYabesĩ, mobahĩsĩrya yoho.

¹³Neryo mobĩmya amakũha wabo, mobatago omo ndĩna yʼomuti wʼomugenge eYabesĩ, kandi mobusa ebiro birinda isibetalya.