Read nande 1 Samwelĩ 7 Bible Online

1 Samwelĩ 7 - nande bible

1 Samwelĩ 7

¹Nʼabandu bʼeKĩrĩatĩ-yearĩmũ mobasa, mobatwala erĩsandũko lyʼOmwami Mukulu, mobaletalyo omo nyũmba ya Abĩnadabũ oko kitwa, mobayisoga Eleazarĩ, mugala wuwe erĩteya erĩsandũko lyʼOmwami Mukulu.

²Neryo erĩtsũka ekiro erĩsandũko lĩkala eKĩrĩatĩ-yearĩmũ abya mugulu muli; kusangwa yabya myaka makũmĩ abiri. Nʼenyũmba yosĩ ya Ĩsraelĩ moyakukubalira Omwami Mukulu.

³Neryo Samwelĩ mwabũga nʼenyũmba yosĩ ya Ĩsraelĩ ati, Mwamasuba oko Mwami Mukulu nʼomutima gosĩ, ego, mũhĩre esindi nyamuhanga syo hali, na Astarotĩ sĩlũe omo katĩkatĩ kenyũ, mũhĩre emitima yenyũ oko Mwami Mukulu, nʼerimukolera ĩyowene; naye akandĩbalamya omo byala byʼAbafĩlĩstĩnĩ.

⁴Neryo abana ba Ĩsraelĩ mobahĩra Baalĩ na Astarotĩ syo hali, mobakolera Omwami Mukulu ĩyowene.

⁵Na Samwelĩ mwabũga ati, Mũhĩndanaye Abaĩsraelĩ bosĩ eMĩsĩpa, nage ngandibasabira oko Mwami Mukulu.

⁶Neryo mobahĩndana eMĩsĩpa, mobateha magetsi, mobũtago embere syʼOmwami Mukulu, nʼekiro ekyo mobatsira akalyo mobabũga bati, Twabĩrĩhalya oko Mwami Mukulu. Na Samwelĩ mwatswera abana ba Ĩsraelĩ eMĩsĩpa.

⁷Nʼomugulu Abafĩlĩstĩnĩ bowa ngoko abana ba Ĩsraelĩ bamahĩndana eMĩsĩpa, abakama bʼAbafĩlĩstĩnĩ mobayalwa na Ĩsraelĩ. Kandi omugulu abana ba Ĩsraelĩ bowa ekyo, mobũbaha Abafĩlĩstĩnĩ.

⁸Nʼabana ba Ĩsraelĩ mobabwira Samwelĩ bati, Sĩgũmbaye erilakira Omwami Mukulu busana netu, atũlamaye omo byala byʼAbafĩlĩstĩnĩ.

⁹Na Samwelĩ mwĩmya ekyana kyʼembũlĩ ekikonga, mwaherakyo mo buhere bwʼerĩokererya oko Mwami Mukulu. Na Samwelĩ mwalakira Omwami Mukulu busana na Ĩsraelĩ; Omwami Mukulu mwamũsũbĩrya.

¹⁰Nʼomugulu Samwelĩ abya akahera obuhere bwʼerĩokererya, Abafĩlĩstĩnĩ mobasegera hakũhĩ erilwa na Ĩsraelĩ; nĩkwa Omwami Mukulu mwapura nʼomulenge munene oko Bafĩlĩstĩnĩ ekiro ekyo, mũbahyabo; nabo mobĩtĩrwa embere sya Ĩsraelĩ.

¹¹Nʼabalume bʼAbaĩsraelĩ mobalũa eMĩsĩpa, mobakwama Abafĩlĩstĩnĩ, mobĩtabo, erĩhĩka eyĩkwa yʼeBetĩ-karĩ.

¹²Neryo Samwelĩ mwĩmya erĩbwe mwasingikalyo omo katĩkatĩ kʼeMĩsĩpa nʼeSenĩ, mwahula erĩna lyalyo mo Ebenĩezerĩ, lyʼerĩbũga ambu, Erĩhĩka lino Omwami Mukulu abĩrĩtũwatĩkya.

¹³NʼAbafĩlĩstĩnĩ mobakĩndwa batya, mobataswahĩka omo mitano ya Ĩsraelĩ. Nʼebyala byʼOmwami Mukulu mobyalwa nʼAbafĩlĩstĩnĩ oko biro byosĩ bya Samwelĩ.

¹⁴Nʼemĩyĩ eyo Abafĩlĩstĩnĩ banyega oko Baĩsraelĩ moyasũbĩbwa oko Baĩsraelĩ, erĩtsũka eEkronĩ erĩhĩka eGatĩ; na Ĩsraelĩ mwalũsya Omutano oyo omo byala byʼAbafĩlĩstĩnĩ. Kandi mohabya Obuholo omo katĩkatĩ kʼAbaĩsraelĩ nʼAbaamorĩ.

¹⁵Kandi Samwelĩ mwatswera Abaĩsraelĩ ebiro byosĩ byʼeribyaho liwe.

¹⁶Neryo mwagenda obuli mwaka erĩtĩmba eBetelĩ, nʼeGĩlgalĩ, nʼeMĩsĩpa; ehosĩ eyo mwatswera Ĩsraelĩ.

¹⁷Kandi mwasuba eRama, kusangwa yo yabya enyũmba yiwe; nʼeyo mwatswera Ĩsraelĩ, kandi mwahĩmbayo ekiherero oko Mwami Mukulu.