Read nande 1 Samwelĩ 9 Bible Online

1 Samwelĩ 9 - nande bible

1 Samwelĩ 9

¹Neryo habya omundu wa Benyamĩna, erĩna liwe lyabya Kĩsĩ, mugala wa Abĩelĩ, mugala wa Serorĩ, mugala wa Bekoratĩ, mugala wa Afĩa, mugala wʼOmũbenyamina, omundu mbangĩ owʼamaka.

²Naye abya nʼomugala, erĩna liwe lyabya Saũlo, omũlwana mubuya; kandi omo katĩkatĩ kʼabana bʼAbaĩsraelĩ sihabya mundu mubuya kwilaba ye. Erĩtsũka oko bitigo biwe erĩlolya endata abya muli kwilaba bandu bosĩ.

³Neryo esyopunda sya Kĩsĩ, ĩse wa Saũlo, mosyatala. Neryo Kĩsĩ mwabwira Saũlo mugala wuwe, ati, Ego, twala omuguma gʼoko bagombe haguma nawe, uhangane, ũyasondaye esyopunda.

⁴Neryo mwalaba omo kihugo kyʼebitwa kya Efũraĩmũ, kandi mwalaba omo kihugo kyʼeSalĩsa, nĩkwa mobatabanasyo. Neryo mobalaba omo kihugo kyʼeSalĩmũ, nasyo isisiriyo. Neryo mwalaba omo kihugo kyʼAbabenyamĩna, nĩkwa mobatabanasyo.

⁵Nʼomugulu bahĩka omo kihugo kyʼeZũfi, Saũlo mwabwira omugombe wuwe oyo wabya haguma naye ati, Wase, tusubule, tata wage akasyaleka erĩganĩrya esyopunda, ĩnĩahahũkya omutima busana netu.

⁶Neryo mugombe mwamubwira ati, Lebaya lino, omo mũyĩ oyũ muli omundu wa Nyamuhanga, naye ni mundu oyũsĩkĩbwe; ebyosĩ akabũga bikabererera kwenene; neryo tuyeyo; kwamũhwa anganatoka eritubwira omwatsi wʼolugendo lwetu olo tuliko.

⁷Neryo Saũlo mwabwira omugombe wuwe ati, Nĩkwa, lebaya twamayayo, twasyatwalira omundu oyo yokĩ kwehĩ? Kusangwa akalyo kamahwa omo ngunza syetu, isihali mugero wʼeritwalira omundu wa Nyamuhanga oyo; tuwitekĩ kwehĩ?

⁸Nʼomugombe mwasũbĩrya Saũlo kandi ati, Lebaya, ngwite omo byala byage akahande kaguma kʼakani kʼesekelĩ yʼebĩtsĩpa; ngandihako omundu wa Nyamuhanga, asyatubwira olugendo lwetu. [

⁹Erĩmbere omo Baĩsraelĩ, omugulu omundu agenda akayabũlya Nyamuhanga, ĩnĩakabũga ati, Wase, tukaya eyiri omũlangĩrĩ; kusangwa oyukahulawa lino mo mũmĩnyererĩ agenda akahulwa mo mũlangĩrĩ.]

¹⁰Neryo Saũlo mwabwira omugombe wuwe ati, Ekĩnywa kyawe kyowene; wase, tugende. Neryo mobagenda oko mũyĩ aho mundu wa Nyamuhanga abya.

¹¹Nʼomugulu birukira oko mũyĩ, mobeya abana-bato bakayateha magetsi, mobabũlyabo bati, Omũlangĩrĩ ane hano kwehĩ?

¹²Nabo mobasũbĩryabo bati, Aneyo, lebaya, ane embere syenyũ. Mwanguhe lino, kusangwa akabĩhĩka omo mũyĩ mũnabwĩre; kusangwa bandu bawite obuhere mũnabwĩre ahʼendata.

¹³Mwamabĩhĩka omo mũyĩ mũkandĩmweya neryo-neryo, ate ahetukira ahʼendata akayalya; kusangwa bandu sibendirya ate ahĩka, kusangwa akatsumula obuhere; nʼenyũma wʼaho ababirikirawa ibalya. Neryo muhetuke lino; kusangwa mukandimubana lino-lino.

¹⁴Neryo bahetukira oko mũyĩ; nʼomugulu bahĩka omo mũyĩ, lebaya, Samwelĩ mwahulukirabo, akagenda ahʼendata.

¹⁵Neryo Omwami Mukulu abya ĩnĩabĩrĩbĩsũlĩra Samwelĩ ekiro kiguma embere wʼerĩhĩka lya Saũlo, ati,

¹⁶Omo ngyakya oko saa iri ngʼeyĩ nasyakutumira omundu akalũa omo kihugo kya Benyamĩna, nawe wasyamũhakabya magũta abye mũtabalĩ oko bandu bage Abaĩsraelĩ; naye asyalamya abandu bage omo byala byʼAbafĩlĩstĩnĩ; kusangwa nabĩrĩrebya abandu bage, kusangwa ekiriro kyabo kyabĩrĩnyĩhĩkako.

¹⁷Nʼomugulu Samwelĩ alangira Saũlo, Omwami Mukulu mwamubwira ati, Lebaya, omundu oyo nakubwira! Oyũ asyatabalira bandu bage.

¹⁸Neryo Saũlo mwasegera hakũhĩ na Samwelĩ oko lũkyo, mwabũga ati, Ngakusaba umbwire ahali enyũmba yʼomũlangĩrĩ.

¹⁹Na Samwelĩ mwasũbĩrya Saũlo ati, Nĩna ngye mũlangĩrĩ; Ũtsũke erihetukira ahʼendata, kusangwa mukandirya haguma nage mũnabwĩre; neryo omo ngyakya nasyakuha olugendo, kandi nasyakubwira ebyosĩ ebiri omo mutima wawe.

²⁰Nʼesyopunda syawe esitere oko biro bisatu, sũhahũke busana nasyo; kusangwa syabiribanika. Nʼamaha gosĩ wa Ĩsraelĩ ali kundi kwehĩ? Si kuwe nʼoko kĩtũnga kya tata wawe kwehĩ?

²¹Na Saũlo mwasũbĩrya mwabũga ati, Sindi Mũbenyamĩna, owʼekihanda kyike kwilaba ebyosĩ byʼAbaĩsraelĩ kwehĩ? Nʼekĩtũnga kyage si kyike kwilaba ebĩtũnga byosĩ bya Benyamĩna kwehĩ? Busana nakĩ ukambwira ebyʼomũsĩndo oyũ kwehĩ?

²²Neryo Samwelĩ mwĩmya Saũlo nʼomugombe wuwe mwaletabo omo nyũmba yʼabagenĩ, kandi mwĩkalyabo aho mbere-mbere wʼabandu ababirikirawa, nabo babya bandu makũmĩ asatu.

²³Na Samwelĩ mwabwira omũhũkĩ ati, Leta erĩgabo eryo nakuha, eryo nahula nyiti, ubikeryo hakũhĩ nawe.

²⁴Nʼomũhũkĩ mwĩmya ekihinga nʼebyalya haguma nakyo, mwahĩrabyo embere sya Saũlo. Neryo Samwelĩ mwabũga, ati, Lebaya, ebyabikawa byebĩ! Ũhĩrebyo embere syawe ulye; kusangwa byabikawa busana nawe oko mugulu ahulawa, kusangwa na bũga, nyiti, Nabiribirikira bandu. Neryo Saũlo mwalya haguma na Samwelĩ ekiro ekyo.

²⁵Nʼomugulu bandagala erĩlũa ahʼendata erĩhĩka oko mũyĩ, Samwelĩ mwakanĩrya na Saũlo oko lutwe.

²⁶Kandi mobabuka omo tũtũtũ; neryo bwabere bwakya Samwelĩ mwabirikira Saũlo oko lutwe ati, Hangana, ngakugosola. Neryo Saũlo mwahangana, mobahuluka ababiri bosĩ omo nzira iye na Samwelĩ.

²⁷Nʼomugulu babya bakandagalira oko ndũlĩ yʼomũyĩ, Samwelĩ mwabwira Saũlo ati, Ubwire omugombe wawe alabire embere syetu nĩkwa uwe watahangana hake ĩnakowĩsya ekĩnywa kya Nyamuhanga.