Read ngakarimojong Akisy. 11 Bible Online

Akisy. 11 - ngakarimojong bible

Akisy. 11

¹Akitodol apaki ŋin, erworosi ŋituŋa a akwap a daadaŋ aŋajep apei ka ŋakiro ŋapei.

²Ani apaki ŋina awotuniata ikes alo Kide, todolut nadipo ŋina a Sinar, toloma nen.

³Tolimok ŋinituŋanan ikidunyet keŋ tema, “Bua etiyautu ŋamatapali, ido ecunya ejok.” Kisitiyata ikes ŋamatapali akilo ŋamoru, kisitiyata eminae akilo ecoto.

⁴Temasi, “Potu, odukutu etaun yok, odukokisi aduketait ŋina aoyan ŋina edoli aita keŋ nakuj, ikotere ikiruwor iwon ŋulu ikiyenen alotuŋa, ido nyikielar iwon nakwapin daadaŋ.”

⁵Abu Ekapolon bu kwap akiŋolikin etaun ŋol ka aduketait ŋin ŋina potu ŋituŋa ŋul toduko.

⁶Tolimu Ekapolon tema, “Kiŋolikisi, erae ikes ŋituŋa ŋipei, ka irworosi ikes aŋajep apei, erae na akisyakinet a ŋuna elosete ikes akitiya, nyipiyori tokona ikes ibore daadaŋ ŋini ecamito ikes akitiya.

⁷Potu oloto kwap, enyala aŋajep kec, ikotere tojoŋoto apupo make.”

⁸Kiela Ekapolon ikes anakibois a ŋin nakwapin daadaŋ, kiteesik ikes akiduk etaun.

⁹Aŋun, aponi tonyarae etaun ŋol Babilon, anerae abu Ekapolon kinyalak aŋajep ŋina sek arae apei anakwap, tojoŋoto ŋituŋa apupo make; tosodi kiela ikes nakiboisyo ŋuna ka akwap a daadaŋ.

¹⁰Erae lu ŋipapae a Sem. Ani apaki ŋina adolioto ŋikaru a Sem amiat, abu touru Aripakasad, ŋikaru ŋiarei ekaku ka akalele.

¹¹Kedau auruun Aripakasad, abu Sem kiboi ŋikaru ŋamiae ŋakan, touru ŋisapa ŋice ka ŋapesur.

¹²Kedau Aripakasad akiboi ŋikaru ŋatomoniuni ka ŋikan, abu touru Sela;

¹³kiboi Aripakasad ŋikaru ŋamiae ŋaomwon ka ŋiuni kedau auruun Sela. Touru ŋisapa ŋice ka ŋapesur.

¹⁴Kedau Sela akiboi ŋikaru ŋatomoniuni, abu touru Eber;

¹⁵kiboi Sela ŋikaru ŋamiae ŋaomwon ka ŋiuni kedau auruun Eber. Touru ŋisapa ka ŋapesur.

¹⁶Kiboi Eber ŋikaru ŋatomoniuni ka ŋiomwon, touru Peleg;

¹⁷kiboi Eber ŋikaru ŋamiae ŋaomwon ka ŋatomoniuni kedau auruun Peleg. Touru ŋisapa ŋice ka ŋapesur.

¹⁸Kedau Peleg akiboi ŋikaru ŋatomoniuni, abu touru Reu;

¹⁹kiboi Peleg ŋikaru ŋamiae ŋaarei ka ŋikanikaomwon kedau auruun Reu. Touru ŋisapa ka ŋapesur.

²⁰Kedau Reu akiboi ŋikaru ŋatomoniuni ka ŋiarei, abu touru Serug;

²¹kiboi Reu ŋikaru ŋamiae ŋaarei ka ŋikanikaarei kedau auruun Serug. Touru ŋisapa ŋice ka ŋapesur.

²²Kedau Serug akiboi ŋikaru ŋatomoniuni, abu touru Naor;

²³kiboi Serug ŋikaru ŋamiae ŋaarei kedau auruun Naor. Touru ŋisapa ŋice ka ŋapesur.

²⁴Kedau Naor akiboi ŋikaru ŋatomoniarei ka ŋikanikaomwon, abu touru Tera;

²⁵kiboi Naor ŋikaru amiat ka ŋitomon ka ŋikanikaomwon kedau auruun Tera. Touru ŋisapa ŋice ka ŋapesur.

²⁶Kedau Tera akiboi ŋikaru ŋatomonikanikaarei, abu touru Aburam, Naor ka Aran.

²⁷Erae lu ŋipapae a Tera. Abu Tera touru Aburam, Naor ka Aran. Touru Aran Lot.

²⁸Abu Aran totwan alo Ur, anakwap a ŋina a Ŋibabiloniyae. Apaki ŋin, ariŋa papa keŋ eyari aneni edounere.

²⁹Apotu Aburam ka Naor kiitasi; kiit aburam aberu ŋina anyaritae Sarai, Naor daŋ kiit aberu ŋina anyaritae Milika, nakoku ka Aran a ŋolo arae papa a Milika ka Isika.

³⁰Nai akolupana Sarai, amam ikoku.

³¹Torukosi Tera ka lokoku a Aburaam ta Lot lopapait keŋ lokoku ka Aran kaapei ka Sarai aberu ka Aburam, toloto alo Ur anakwap a ŋina a Ŋibabiloniyae tari nakwap ŋina a Kanaan. Nai ani edolunete ikes Aran, toloma nen.

³²Ani edolete ŋikaru a Tera ŋamiae ŋaarei ka ŋikan, totwan iŋes alo Aran.