Read ngakarimojong Akisy. 12 Bible Online

Akisy. 12 - ngakarimojong bible

Akisy. 12

¹Abu Ekapolon tolimok Aburam tema, “Toesik akwap kon ka ŋituŋa kon ta ŋulu ke ekal a papa kon; tolot nakwap ŋina eketoodikini ayoŋ iyoŋ.

²Eketipituni ayoŋ iyoŋ anakwap ka eketerereŋi, ido eturuwo ekiro kon ŋolo eyenen anakwap, ikotere iyoŋ iruwor ŋolo ka arereŋu.

³Eterereŋi ayoŋ ŋulu ikiterereŋete iyoŋ, tosodi eceni ŋulu ikicenete iyoŋ. Aŋuna kon, eterereŋi ayoŋ ŋituŋa ŋulu ka akwap daadaŋ.”

⁴Torotok nai Aburam lopite ŋolo alimokinitor Ekapolon iŋes; torukosi iŋes ka Lot. Arae ŋikaru ka Aburam ŋatomonikanikaarei ka ŋikan apaki ŋina awuotokinia iŋes alo Aran.

⁵Towotokis Aburam ka aberu keŋ Sarai ka Lot lokoku alokaato keŋ, towuotokiniata ibore daadaŋ ŋini aris ikes keryamut eya Aran; kaapei ka ŋituŋa daŋ. Towotokis ikes alo Aran tolomiyasi nakwap ŋina a Kanaan. Ani edolete ikes Kanaan,

⁶torubak Aburam elosi ŋaren, akitodol ŋina anaŋia nakibois ŋina anyaritae Sekem, neni ayai ekuyon ŋolo apolon ŋolo ayai neni anyaritae More. Apaki ŋin, arae Ŋikanaani ayakasi nakwap ŋin.

⁷Totakanu Ekapolon neni ka Aburam kirworik tema, “Ainakini ayoŋ akwap na neni a eletonit kon.” Aŋun, todukok Aburam Namuroet nen aŋuna ka atamunitor Ekapolon ŋolo abu totakanu neni keŋ.

⁸Towotok Aburam a nen lomukura ŋulu alowae a ŋolo alo Kide Besel, tolom nen, kigurok eema. Ayai Besel lowae ŋolo ka anam, To neni alomit Aburam, toyai Ai Kide keŋ. Todukok Aburam Namuroet nen aŋuna ka akilipya neni ke Ekapolon; ido abu kilip enyarit ekiro ke Ekapolon.

⁹Torubak Aburam ewosi jik a ŋarwa Negeb [3]

¹⁰Toyakaun eron nakwap a Kanaan, kitowuoto ŋun Aburam totiyaar tolomiya Ijipit akiboi a nen erae egelaanot, anerae arono eron nooi alo Kanaan.

¹¹Ani eapikini iŋes alomar Ijipit, tolimok Aburam aberu keŋ Sarai tema, “Ayeni ayoŋ kire jik atemar irae iyoŋ aberu ŋina ebusan;

¹²ido ani ŋina ikiŋolikiniata Ŋijipitian iyoŋ, etemarete, ‘Erae na aberu keŋ’; ido akaarete ikes ayoŋ, ikimyekis iyoŋ toyar.

¹³Tolimok kare ikes ebe irae iyoŋ nakaato kaŋ, ikotere nyitiyata ikes adio aronis neni kaŋ, nyakaar ayoŋ aŋuna kon, itoiut iwon ŋuna ilimuni iyoŋ.”

¹⁴Ani elomari Aburam Ijipit, kiŋolikis Ŋijipitian aberu keŋ ibus nooi.

¹⁵Ani iŋolikinete ŋikapolok ŋulu epukato ka Parao aberu ŋin, kipuro iŋes alokiŋaren a Parao; ido aponi yae aberu ŋin kai a Parao.

¹⁶Aŋuna ka aberu a ŋin, abu Parao kitiya ŋuna ajokak neni ka Aburam; inak Parao Aburam ŋamesekin, ŋimoŋin, ŋisigirya, ŋipi ka ŋapi, ŋasigirya ka ŋikaala.

¹⁷Nai kisican Ekapolon Parao ka ekal keŋ a ŋidekesyo aŋuna a Sarai aberu ka Aburam.

¹⁸Tonyarau Parao Aburam kiŋit tema, “Anukiro nu ŋuna itiya iyoŋ neni kaŋ? Nyo pa ikilimokinia iyoŋ ayoŋ atemar erae iŋes aberu kon?

¹⁹Kaanukiro itemarya iyoŋ ebe, ‘Erae iŋes nakaato kon?’, ido ŋun abunio ayoŋ eturuworya iŋes aberu kaŋ. Nai tokona akoniberu na, ya iŋes toloto.”

²⁰Tonyarau Parao ŋiketiyak keŋ neni keŋ tolimok ikes akitowotokin Aburam; kitowuotokis ikes Aburam ka aberu keŋ, ya Aburam ibore daadaŋ ŋini ayakar iŋes.