Read ngakarimojong Akisy. 13 Bible Online

Akisy. 13 - ngakarimojong bible

Akisy. 13

¹Towuotu Aburam alo Ijipit kaapei ka aberu keŋ ta ibore daadaŋ ŋini kebu iŋes toryamu. Arukito iŋes ka Lot ewuosete lowae ŋolo a Negeb.

²Apaki ŋin, abarit Aburam nooi, ayakar ŋibaren, esilipa ka egolid.

³Torubak Aburam ewosi iwadio a ŋirwa ameun alowae a ŋolo a Negeb tari neni adolio Besel, nakibois ŋina paan ekiŋaren abu iŋes kigurok eema apaki ŋina alomitor iŋes kidiŋ Besel ka Ai.

⁴Nakibois ŋin abu iŋes ekiŋaren todukok Namuroet, kilipya alokiro a ŋolo ke Ekapolon.

⁵Lot daŋ ŋolo awuosete kaapei ka Aburam, ayakar ŋamesekin ka ŋaatuk ta ŋiemae.

⁶Pa apedorit ebari kec akisiboi ikes kaapei anakwap a ŋin, anerae alal ebari kec nooi.

⁷Aŋun, abu ebura toyakaun kidiŋ ŋikeyokok a ŋibaren ka Aburam ka ŋikeyokok a ŋibaren a Lot. Ayakasi daŋ apaki ŋin, Ŋikanaani ka Ŋiperisi nakwap ŋin.

⁸Tolimok Aburam Lot tema, “Nyemaikina ebura edio min kidiŋ kaŋ ka iyoŋ, kori kidiŋ ŋikeyokok kaŋ ka ŋikeyokok kon, anerae ikirae iwon ŋikilyok ka ikirae ŋikaitotoi.

⁹Iite bo iyoŋ akwap na daadaŋ! Ekelipit ayoŋ iyoŋ otyakas ka ayoŋ. Ani kiseu iyoŋ akiwuot lowae ŋolo alo kedyeny, awuosi ayoŋ lowae ŋolo alo teten; kori ani kiseu iyoŋ akiwuot lowae ŋolo alo teten, awuosi ayoŋ lowae ŋolo alo kedyeny.”

¹⁰Toŋoleŋolek Lot erounit akwap ŋin daadaŋ, ani iŋoliyari lowae ŋolo a Yorodan, kiŋolik ŋadipoe ŋuna a Yorodan erae ŋuna elelenakini ejok alowaetin a daadaŋ, ikwaan ke emanikor ŋolo ke Ekapolon ka akwap ŋina a Ijipit alowae a ŋolo a Soar. Apaki ŋin, ariŋa Ekapolon nyinyasuna Sodoma ka Gomora.

¹¹Toseu Lot ŋadipoe ŋuna a Yorodan, towot lowae ŋolo alo Kide; aŋun, totyakas ikes.

¹²Kiboi Aburam alo Kanaan, ido kiboiyo Lot lotaunio ŋulu a ŋadipoe a Yorodan, todukok eema keŋ Sodoma.

¹³Nai aneni ke Ekapolon, aroko ka arae ŋikasecak nooi ŋikilyok ŋulu alo Sodoma.

¹⁴Kedau Lot atyakar aneni ka Aburam, tolimok Ekapolon Aburam tema, “Toŋoleŋolek mono iyoŋ kiŋoliya a ne aneni iyai iyoŋ lowae ŋolo alo Kuju ka ŋolo alo Kwap, lowae ŋolo alo Kide ka ŋolo alo To.

¹⁵Akainakini ayoŋ iyoŋ ka ŋiletok kon akwap na daadaŋ ŋina ite iyoŋ toruwor ŋina kus jik.

¹⁶Etipituni ayoŋ ŋiletok kon tolalata ikwa apuwa ŋina ka akwap, ani kepedori ituŋanan akimar apuwa, iŋes atemar epedor ŋiletok kon daŋ akimarun.

¹⁷Tonyou! Kirimok akwap ŋin daadaŋ etya neni etya, anerae abuni ayoŋ ainakin iŋes neni kon.”

¹⁸Towotok Aburam a nen tocuna eema keŋ, bu tolom kidiŋ ŋikuyono ŋulu a Mamure anakwap a ŋina enyaritae Eburon. Todukok Aburam Namuroet nen aŋuna ke Ekapolon.