Read ngakarimojong Akisy. 14 Bible Online

Akisy. 14 - ngakarimojong bible

Akisy. 14

¹Alorwa a ŋulu araakar Amurapel erwosit ŋolo a Sinar, [4] torae Arioc erwosit ŋolo a Elasar torae Kedorilaomer erwosit ŋolo a Elam ka torae Tidal erwosit ŋolo Agoim;

²apotu ŋirwosi ŋuluomwon ŋul kiiryakin ka ŋirwosi lu ŋikan: Bera erwosit ŋolo a Sodoma, Birisa erwosit ŋolo a Gomora, Sinab erwosit ŋolo ka Adama ka Semebar erwosit ŋolo a Seboim ta erwosit ŋolo a Bela (iŋes Soar).

³Tocunakis ŋirwosi ŋulukan ŋul ŋajorei kec nakadipaalat ŋina a Sidim (iŋes Anam ŋina Atwan.)

⁴Epukat sek Kedorilaomer ŋirwosi ŋul ŋikaru ŋitomon ka ŋiarei, ani edoli ekaru ŋolo a ŋiuni, toŋero ikes iŋes.

⁵Ani edoli ekaru ŋolo a ŋitomon ka ŋiomwon, tocunak Kedorilaomer ŋirwosi ŋulu ariito ka iŋes, kisiiryakis ka toreut ŋituŋa lu: Ŋirepaim alo Asiterosakaranain, Ŋisusim alo Am, Ŋiemim alo Sapekiriasaim

⁶ka Ŋiorit alomukura a ŋulu a Seir, todolo tari Eliparan neni idunyasi ka aloŋisat.

⁷Toboŋut a nen potu Enimisapat (iŋes Kades), kisiiryata ka toreut Ŋimalek anakwap kec a daadaŋ ka Ŋiamori ŋulu eboiyete alo Asason-Tamar.

⁸Tonyout ŋirwosi lu: Ŋolo a Sodoma, Gomora, Adama ka Seboim ta Bela (iŋes Soar). Kisiiryakis anakadipaalat a ŋina a Sidim

⁹Kedorilaomer erwosit ŋolo a Elam, Tidal erwosit ŋolo a Agoim ka Amurapel erwosit ŋolo a Sinar ta Arioc erwosit ŋolo a Elasar. Kiiryakin ŋirwosi ŋuluomwon ŋul ka ŋulukan.

¹⁰Eleleba ŋikuco ŋulu abokere ibore ŋini esibit eminae nakadipaalat ŋina a Sidim. Ani ebwaŋasi ŋajorei a ŋirwosi a lu: Ŋolo a Sodoma ka ŋolo a Gomora, kimasanakin ŋice kec lokuco ŋul, tosodo ŋuluce toema kidiama ŋimukura.

¹¹Tolemasi ŋimoe kec ŋiboro daadaŋ ka akimuj daadaŋ alo Sodoma ka Gomora, ido torotokis.

¹²Torikosi ikes tari Lot lokoku alokaato ka Aburam ŋolo eboi alo Sodoma, torotokinioto kaapei ka ŋiboro keŋ.

¹³Bu etuŋanan epei ŋolo kebucun alojie a ŋol, tolimok Aburam ŋolo arae Eburaniyat ŋakiro a ejie. Alomit Aburam diyete ŋikuyono ŋulu a Mamure a ŋolo arae Emorait, torae daŋ lokaato a Esikol ka Aner; ariito ŋuluarei ŋul ka Aburam.

¹⁴Ani iirari Aburam atemar ariko ŋimoe lokoku alokaato keŋ, ya ŋikilyok ŋamiae ŋauni ka ŋitomon ka ŋikanikauni ŋulu etatamitae epite ŋolojiet, ŋulu arae ŋiyeneta keŋ; toloto kiwuapakis ŋimoe ŋul, todolo tari Dan.

¹⁵Ani ewari, totyak Aburam ŋajorei keŋ, aŋuna ka akisiryakin ŋimoe nakwaare. Toruko iŋes ka ŋiketiyak keŋ kisiiryakis ŋimoe kirita todolo tari Oba, Kuju Damasko.

¹⁶Kinyaku Aburam ŋiboro daadaŋ ŋulu aŋatarito ŋimoe, kinyaku tari Lot lokoku alokaato keŋ ka ŋiboro keŋ ka ŋaberu ta ŋituŋa ŋuluce daŋ.

¹⁷Ani eboŋuni Aburam alojie a ŋolo elounia Kedorilaomer ka ŋirwosi ŋulu arukitotor iŋes alojie, tolot erwosit ŋolo a Sodoma akisiryam Aburam anakadipaalat a ŋina a Sape (iŋes akadipaalat ŋina a ŋirwosi).

¹⁸Yau Melekisedek ŋolo arae erwosit ŋolo a Salem ŋamugati ka epiini; arae daŋ Melekisedek esacaradoti ŋolo ka Akuj a ŋina alokidiama nooi.

¹⁹Ikiterereŋ Melekisedek Aburam tema, “Ikiterereŋ iyoŋ Aburam Akuj ŋina alokidiama nooi, ŋina asubi nakuj ka akwap;

²⁰Erereŋ Akuj ŋina alokidiama nooi, ŋina abu tobuko ŋimoe kon, ido ibu iyoŋ kilou ikes.” Inak Aburam iŋes atutubet apei anatomon aloboro a daadaŋ a ŋulu enyakuni iŋes.

²¹Tolimok erwosit ŋolo a Sodoma Aburam tema, “Inakinae iyoŋ ayoŋ ŋituŋa kaŋ daadaŋ, ya ŋiboro toruwor ŋulu kon.”

²²Nai tolimok Aburam erwosit ŋolo a Sodoma ŋol tema, “Adau ayoŋ akikoŋ neni ke Ekapolon ka Akuj a ŋina alokidiama nooi a ŋina asubi nakuj ka akwap,

²³atemar nyayai ayoŋ tari eusi, kori arukan ŋina ka amukat, kori ibore daadaŋ ŋini erae ŋini kon, ikotere acepaki nyitema iyoŋ, ‘Etabar ayoŋ Aburam.’

²⁴Mam ibore ayai ayoŋ mati ŋini adaut ŋisorok lu akinyam ka ŋini elemarito ŋikilyok ŋulu ikirukorit ka ayoŋ lu: Aner, Esikol ka Mamure. Kimyek ŋikilyok ŋul yaa ŋiboro ŋulu adaut ikes atyakar.”