Read ngakarimojong Akisy. 16 Bible Online

Akisy. 16 - ngakarimojong bible

Akisy. 16

¹Amam ikoku abu Sarai aberu ka Aburam kidou aŋuna ka Aburam. Eboiyete iŋes ka apese ŋina arae apito, ŋina arae Ajipitanoit, ŋina anyaritae Agar.

²Tolimok Sarai Aburam tema, “Toanyu tokona iyoŋ, ekeretak ayoŋ Ekapolon akidore; kituruwo apito kaŋ aberu kon, acepaki aryamuni ayoŋ ŋidwe aneni keŋ.” Tocamu Aburam ŋakiro a Sarai.

³Ani kedau Aburam akiboi anakwap a ŋina a Kanaan ŋikaru ŋitomon, ya Sarai apese ŋina arae apito keŋ ŋina arae Ajipitanoit, ŋina anyaritae Agar, inak neni ka Aburam alokile keŋ.

⁴Toruko Aburam ka Agar toryamu Agar akook; ani eanyuni Agar atemar keryamu iŋes akook, kiturokin, ido ite akapolon keŋ ejamuwarit.

⁵Tolimok Sarai Aburam tema, “Ŋuna aronok daadaŋ ŋuna etiyakin neni kaŋ erae nakou kon! Abu ayoŋ ewuak apese ŋina erae apito kaŋ natorobu kon, nai tokona ŋina eŋolikinia iŋes atemar aryamu iŋes akook, eturokin ageu akitere ayoŋ akajamuwarit. Emyekisi Ekapolon totub ŋun, kerae ayoŋ adyakarit, kori iyoŋ.”

⁶Nai tolimok Aburam Sarai tema, “Kiira, apese kon ŋin ŋina erae apito kon, eyai nakan kon; kitiya neni keŋ ŋuna ejokak aneni kon.” Totiŋ Sarai Agar erono nooi, todoki Agar aneni a Sarai.

⁷Toryamu emalaika ke Ekapolon Agar alocowa a ŋolo ayai naloŋisat lorot ŋolo elosi Sur.

⁸Kiŋit emalaika iŋes tema, “Agar, apese ŋina irae apito a Sarai, ai ibunio iyoŋ ka ai ilosi iyoŋ?” Tema Agar, “Adokinit ayoŋ aneni a Sarai a akapolon kaŋ.”

⁹Tolimok emalaika ke Ekapolon iŋes tema, “Toboŋo neni a akapolon kon, ido kiwuap ŋakiro keŋ.”

¹⁰Tolimok daŋ emalaika ke Ekapolon iŋes tema, “Epituni ayoŋ ŋiletok kon nooi, nyepedoryo akimarun ikes, anerae elalaketa.”

¹¹Tolimok emalaika ke Ekapolon iŋes tema, “Kiira, ipoti iyoŋ, ka idouni iyoŋ isapat; tolimok ekiro keŋ Isimael, anerae eira Ekapolon ŋakiro a ŋican kon.”

¹²Eruwor iŋes ŋolo ityaŋaara alotuŋa; eremokin iŋes ŋituŋa daadaŋ ka eremokinosi ŋituŋa daadaŋ iŋes. Nyemaikinosi iŋes kaapei ka ŋikaitotoi keŋ.

¹³Tolimok Agar ekiro ke Ekapolon a ŋolo erworo neni keŋ tema, “Irae iyoŋ Eliroi.” [5] anerae abu Agar tema, “Eŋolik kire ayoŋ Ekapolon ka arubak ayari kadau akiŋolikin iŋes a?”

¹⁴Aŋakiro aŋun, aponi tolimokinae ecowa ŋol Beer-Lairoi [6] Eyai ecowa ŋol kidiŋ Kades ka Bered.

¹⁵Kidou Agar ikoku ka Aburam ŋinisapat, tolimok Aburam ekiro a ikoku keŋ a ŋin Isimael.

¹⁶Arae ŋikaru ka Aburam ŋatomonikanikauni ka ŋikanikapei apaki ŋina edounio Agar Isimael.