Read ngakarimojong Akisy. 18 Bible Online

Akisy. 18 - ngakarimojong bible

Akisy. 18

¹Totakanu Akuj neni ka Aburaam aneni alomit iŋes, alodiyete ŋikuyono ŋulu a Mamure; apaki ŋina eboiyo iŋes alotolim a epuke a eema keŋ aŋuna ka amwanis a akoloŋ.

²Kikeu Aburaam ereet keŋ, kiŋolik ŋikilyok ŋiuni ewuasi aneni aapi, kedau akiŋolikin ikes, tokuraun alopuke a eema, toem kisiryam ikes, toryedik, kijuuru.

³Tema, “Ekapolon kaŋ, ani tokona kajok ayoŋ aneni kon, ekelipit ayoŋ iyoŋ nyilunyar kare ca aneni a eketiyan kon.

⁴Kimyek kare ca yaunae ŋakipi ŋadi kilotaryata iyes ŋakejen, ido kieŋut a lokitoe.

⁵Kimyekinae ayoŋ oyau ŋamugati ŋadi tonyama toryamuniata agogoŋu, ido nai torotokis, ikwapei itorunioto iyes neni a eketiyan kus.” Tolimut ŋikilyok ŋuluuni ŋul temasi, “Kitiya lopite ŋolo ilimunio iyoŋ.”

⁶Kionyak Aburaam atipei loeema neni a Sara tema, “Tooku ŋakirya ŋuna ajokak ŋaokunet ŋauni tomunak kipou ŋamugati atipei.”

⁷Toem Aburaam neni aya ŋimoŋin, toramu etaok ŋolo anakunan, inak neni a esorokit a ŋolo abu kiburuburak akitemokin.

⁸Tolemu Aburaam akimyet ka ŋakile ta akiriŋ a etaok ŋolo abu iŋes kitemok, kiwuak ŋamuja ŋun daadaŋ kiŋaren ŋikilyok ŋul, kimuja. Apaki ŋin, awuoi Aburaam alodiyete kec alokitoe a ŋolopei eboiyoto ikes.

⁹Kiŋita ŋikilyok ŋul Aburaam temasi, “Ai eyai aberu kon Sara?” Toboŋok iŋes tema, “Eyai tooma eema.”

¹⁰Tolimok epei alokidiŋ ŋikilyok ŋul Aburaam tema, “Kire jik, aboŋuni ayoŋ neni kon apaki ŋina ejokunia ekaru ŋina ieteunio, apaki ŋin, eyakaunor aberu kon Sara ikoku ŋinisapat.” Apupi Sara ŋakiro ŋun alopuke a eema alokaku Aburaam, aneni eboiyo iŋes.

¹¹Apaki ŋin, aris Aburaam ka Sara kemojoŋa nooi, aris Sara daŋ kedepa ŋikaru ŋulukidoet.

¹²Tokyeni Sara ejamuwara bon alotau keŋ tema, “Apedori mono kire ayoŋ aryamun alakara kamojoŋ ka ekapolon kaŋ daŋ kemojoŋ a?”

¹³Kiŋit Ekapolon Aburaam tema, “Kaanukiro akyenia Sara ejamuwara ebala, ‘Apedori mono kire ayoŋ auruun ikoku, ayoŋ ŋina amojoŋ a?’

¹⁴Eyai mono ibore ŋini etyono aneni ke Ekapolon a? Aboŋuni ayoŋ neni kon apaki ŋina itemokinitoe, apaki ŋina ejokunia ekaru ŋina ieteunio, apaki ŋin, eyakaunor Sara ikoku ŋinisapat.”

¹⁵Nai tema Sara, “Nyekyena ayoŋ.” Alimuni iŋes ŋun aŋuna akuryania. Tolimok Ekapolon iŋes tema, “Mam, ikyenit iyoŋ.”

¹⁶Torotokis ŋikilyok ŋul a nen, kiŋolikis Sodoma erounito. Apaki ŋin, etenakinit Aburaam ikes akitoodikin erot.

¹⁷Tema Ekapolon, “Emunoni mono ayoŋ aneni ka Aburaam ŋuna alosi ayoŋ akitiyakin

¹⁸ikwapei eraakar Aburaam ayeni ayoŋ atemar eruwor papa a ŋituŋa a ŋulu alalak ka ŋulu etirok, ido neni keŋ iterereŋere ŋituŋa a ŋakwapin a daadaŋ a?

¹⁹Nyemunoni, anerae adau ayoŋ aseun iŋes ikotere iciki ŋidwe keŋ ka ŋituŋa a ekal keŋ ŋulu iwuapete iŋes, kiwuapa erot ŋolo ke Ekapolon anakitiya ŋuna iyookino ka ŋuna ecamakinitae; ikotere nai isiyookini Ekapolon ŋuna adau akiikin Aburaam.”

²⁰Tema Ekapolon, “Epol nooi akigworo aŋuna a ŋituŋa a Sodoma ka Gomora, epol daŋ nooi ka elal asecit kec.

²¹Itemokino ayoŋ otiyaar kwap a ne, oanyu erae kitiyato ikes kaapei lopite ŋolo igworotor, ŋolo adolu neni kaŋ; ani pa kikote nen, ayenuni ayoŋ.”

²²Toriwo ŋikilyok ŋiarei alokilyok a ŋul, toloto Sodoma, kidoŋ Aburaam nen ewoi alokiŋaren Ekapolon.

²³Kiyotu Aburaam neni ke Ekapolon tema, “Erae mono kire a? Imunyari mono iyoŋ ŋulu iyookino ka ŋulu itiyaete aronis a?

²⁴Ani mono keyakasi ŋituŋa ŋatomonikan ŋulu iyookino lotaun ŋol; imunyari mono iyoŋ akibois daadaŋ, nyisyoni iyoŋ iŋes aŋuna a ŋituŋa a ŋatomonikan a ŋulu iyookino alotooma etaun ŋol a?

²⁵Nyerae nu ŋuna emaikina iyoŋ kitiya; amunyar ŋulu iyookino kaapei ka ŋulu itiyaete aronis, akisican kaapei ŋulu iyookino ka ŋulu itiyaete aronis. Nyerae ŋun ŋuna emaikina iyoŋ kitiya. Nyemaikina mono ekatubon ŋolo ka akwap a daadaŋ itiyae ŋuna iyookino a?”

²⁶Tema Ekapolon, “Ani karyamu ayoŋ alotaun a Sodoma ŋituŋa ŋatomonikan ŋulu iyookino, esyoni ayoŋ akibois ŋin daadaŋ aŋuna kec.”

²⁷Tema nabo Aburaam, “Kisyoni ca Ekapolon ayoŋ aŋuna arubakinitor erworo neni kon, orae bo ayoŋ ituŋanan koŋin.

²⁸Ani bo pa kiyookino ŋikan alotooma ŋituŋa ŋulutomonikan ŋul, imunyari mono iyoŋ etaun daadaŋ aŋuna a ŋulukan a ŋul a?” Tema Ekapolon, “Nyamunyari ayoŋ akibois ŋin erae karyamu ŋatomoniomwon ka ŋikan ŋulu iyookino a nen.”

²⁹Torubak Aburaam isirwori Ekapolon kiŋit tema, “Ani bo kerae ŋatomoniomwon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomoniomwon a ŋul, nyamunyari ayoŋ akibois ŋin.”

³⁰Tolimu nabo Aburaam tema, “Okoe, Ekapolon kaŋ, nyiŋo ca! Kimyekinae erwor; ani bo kerae ŋatomoniuni bon iryamuni iyoŋ iyookino a nen?” Toboŋok Ekapolon tema, “Nyamunyari ayoŋ akibois ŋin erae karyamu ŋatomoniuni ŋulu iyookino a nen.”

³¹Tema Aburaam, “Kisyoni ca Ekapolon ayoŋ aŋuna arubakinitor erworo neni kon. Ani bo kerae ŋatomoniarei bon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomoniarei a ŋul, nyamunyari ayoŋ akibois ŋin.”

³²Tolimu nai Aburaam tema, “Okoe Ekapolon kaŋ, nyiŋo ca! Kimyekinae olimu apei ca bon; ani bo kerae ŋitomon bon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomon a ŋul, nyamunyari ayoŋ akibois ŋin.”

³³Ani kedau Ekapolon akirworo ka Aburaam, torotok kimyek Aburaam. Tosodi Aburaam toboŋo tolot nakibois keŋ.