Read ngakarimojong Akisy. 21 Bible Online

Akisy. 21 - ngakarimojong bible

Akisy. 21

¹Abu Ekapolon kiterereŋ Sara ikwapei sek eikinitor, ido abu kitiyak neni a Sara ŋuna aris kiik iŋes.

²Topoti Sara, kidou ikoku ŋinisapat, ŋini abu Aburaam toryamu aneni a Sara, toris kemojoŋ. Arae ŋin apaki ŋina sek aris Akuj kelimoki Aburaam.

³Tolimok Aburaam lokoku keŋ ŋolo auruuni Sara ekiro Isaka.

⁴Ani edolete ŋirwa a Isaka ŋikanikauni, kileŋer Aburaam iŋes ikwapei sek ecikitor Akuj iŋes.

⁵Arae ŋikaru ka Aburaam amiat apaki ŋina edounere Isaka.

⁶Tosodi Sara tolimu tema, “Akainaki Akuj ayoŋ alelyanu ka akyena; ido ekyeniyete kaapei ka ayoŋ daadaŋ ŋulu iirarete nu.”

⁷Kiŋis nabo Sara bon tema, “Kerae mono ŋae elimokinit Aburaam atemar epedori Sara akitanak ŋidwe? Nai tokona, edou ayoŋ ikoku ŋinisapat kemojoŋ Aburaam.”

⁸Topolou ikoku kitapalikinae akinak. Ani akoloŋit ŋina etapalikinere iŋes akinak, kitiya Aburaam ŋasuban ŋuna apolok nooi.

⁹Apaki ŋin, kiŋolik Sara lokoku ka Aburaam ŋolo auruuni Agar ŋina arae Ajipitanoit ebolyasi ka Isaka lokoku keŋ.

¹⁰Tolimok iŋes Aburaam tema, “Kirita apito na ka lokoku keŋ, anerae nyepedori lokoku ka apito akirum ŋiboro kon kaapei ka lokoku kaŋ Isaka.”

¹¹Tonomosi Aburaam ŋakiro ŋun etau aŋuna a lokoku keŋ.

¹²Nai tema Akuj neni ka Aburaam, “Nyikinomosi etau ŋakiro a edya ka apito; ŋuna daadaŋ ikilimokini iyoŋ Sara, kitiya ikwapei ikilimokinia iŋes iyoŋ, anerae erae neni a Isaka iŋes iryamunia iyoŋ ŋiletok ŋulu ekeik ayoŋ iyoŋ.

¹³Lokoku ka apito daŋ, eturuwori ayoŋ ŋituŋa keŋ ŋulu ka akwap kec bon, anerae erae iŋes ikoku kon.”

¹⁴Tonyou Aburaam taparacu sek, ya ŋamugati ka ŋakipi eya lolou a ibarasit ŋolo aeniunitae erae ecwee a ŋakipi, inak Agar kitanapik loseketa keŋ kaapei ka ikoku, ido kitolot iŋes. Torotok Agar, kirim analoŋisat a ŋina alo Beeriseba.

¹⁵Ani edaun ŋakipi ŋuna atiŋit iŋes alolou a ibarasit, tolacak Agar ikoku namoni ace.

¹⁶Tolot kiboikin epeiwae ikoku neni alwana iwadio, neni arae ŋimitae amiat, anerae abu iŋes tema, “Nyemaikina ayoŋ eŋolik iridakini ikoku.” Apaki ŋina eboiyo Agar a epeiwae ikoku, kiworou nooi kigwor.

¹⁷Kiira Akuj etoil a idya, tonyara emalaika ka Akuj Agar anakuj, tolimok iŋes tema, “Anukiro ikiryebete iyoŋ Agar? Nyikibul, anerae eira Akuj etoil a idya aneni sek iesikinia iyoŋ iŋes.

¹⁸Tonyou, ape, todaku idya kiricak iŋes ejok, anerae etolomuni ayoŋ aneni keŋ ŋituŋa ŋulu alalak.”

¹⁹Kisiŋolik nai Akuj Agar akare ŋina aya ŋakipi, tolot Agar kilelebik ŋakipi lolou ŋolo sek atiŋitor iŋes ŋakipi, ido inak idya tomat.

²⁰Abu Akuj kiŋarak idya, topolou iŋes, kiboi analoŋisat, toyenik nooi akisitiya ŋikaleŋeleŋe.

²¹Kiboi iŋes analoŋisat a ŋina a Paran, toryamik toto keŋ iŋes aberu anakwap a ŋina a Ijipit.

²²Apaki ŋin, temasi Abimelek ka Pikol ŋolo arae ekapolon a ŋasigarya keŋ neni ka Aburaam, “Irukito iyoŋ ka Akuj alotooma daadaŋ ŋuna itiyae iyoŋ.

²³Kikoŋ tokona a ne neni kaŋ alokiro ka Akuj atemar nyikimodikini iyoŋ ayoŋ, kori ŋidwe kaŋ, kori ŋituŋa kaŋ. Kikoŋ lopite ŋolo ekoŋio ayoŋ neni kon alotooma arimao. Kitiya ŋun neni kaŋ ka nakwap na ŋina idaunia iyoŋ akiboiyo irae egela.”

²⁴Tema Aburaam, “Ekoŋi ayoŋ ŋun.”

²⁵Ani iŋisi Aburaam Abimelek ŋakiro ka akare a ŋina kepotu ŋiketiyak ka Abimelek todemasi iŋes,

²⁶tema Abimelek, “Nyayeni ayoŋ ituŋanan ŋini kebu kitiya ŋun; nabo nyelimokina iyoŋ ayoŋ ŋun, nyiirara daŋ aneni a ice, nai akiirar na.”

²⁷Tolemu Aburaam ŋamesekin ka ŋimoŋin inak Abimelek, tocamunos nai ikes ŋiarei make.

²⁸Kipaka Aburaam alosipan a ŋamesekin ŋakaalei ŋakanikaarei nawae.

²⁹Kiŋit Abimelek Aburaam tema, “Nyo apolou ipakaritor iyoŋ ŋakaalei nu ŋakanikaarei nawae make?”

³⁰Tema Aburaam, “Kijaa ŋakaalei nu ŋakanikaarei anakan kaŋ, ikotere eruwor nu esuuda ebe, abu ayoŋ obok akare na.”

³¹Aŋun, aponi tolimokinae ekiro ka akibois a ŋin “Akare Beeriseba”, [8] anerae apotu ŋuluarei ŋul kikoŋo a nen.

³²Ani kedaut Abimelek ka Aburaam acamun alo Beeriseba, toboŋosi Abimelek ka Pikol ŋolo apolokinit ŋasigarya ka Abimelek, toloto nakwap a Ŋipilistin.

³³Todupak Aburaam ekitoe ŋolo ikwaan ka ekwaakwaa Beeriseba, ido tonyara a nen ekiro ŋolo ke Ekapolon, Akuj ŋina a ŋikaru ka ŋikaru.

³⁴Kiboi Aburaam anakwap a Ŋipilistin apaki ŋina aoyan arae ituŋanan ŋinigela.