Read ngakarimojong Akisy. 23 Bible Online

Akisy. 23 - ngakarimojong bible

Akisy. 23

¹Kiboi Sara todolo ŋikaru keŋ amiat ka ŋatomoniarei ka ŋikanikaarei.

²Ekaku, totwana Sara alo Kirias-Araba (iŋes Eburon) anakwap a ŋina a Kanaan. Kiyaloloŋ Aburaam ka kigwor aŋuna a Sara.

³Tonyou Aburaam aneni ayai akuwan a aberu keŋ, tolot neni a Ŋiitaiti tema,

⁴“Arae ayoŋ egela, ŋolo abunit aiwace, ido ikiboi ka iyes, inakinae ayoŋ ŋadilup ogyel onukanakini ŋikatwak, onukak daŋ tokona aberu kaŋ ojoŋo akitere.”

⁵Toboŋok epei a Ŋiitaiti Aburaam tema,

⁶“Kiira ŋakiro kosi, ekapolon kaŋ, irae iyoŋ ŋolo ikitopoloorit Akuj alokidiŋ kosi. Tonuk aberu kon nakibois ŋina iseuni iyoŋ anakiboisyo a ŋuna enukio isua ŋikatwak. Emam ipei daŋ alokilyok a lu ŋini ikiretakini iyoŋ akinuk aberu kon nen nalup keŋ ŋuna enukio ŋikatwak.”

⁷Tonyou Aburaam, kijuuru alokiŋaren Ŋiitaiti ŋituŋa ŋulu ka akwap a ŋin.

⁸Tolimok ikes tema, “Ani kicamunito iyes atemar onuk ayoŋ akatwan ojoŋo akitere, kiirasi ŋakiro kaŋ, kiŋitakinae ocamunos ayoŋ ka Epiron lokoku a Soar,

⁹okoinak iŋes ayoŋ aturukan keŋ ŋina eyai Makipela lokukoru a ŋalup keŋ. Kimyekisi iŋes okoinak ayoŋ nen alokiŋaren kus a egyelit a ŋolo ecamit iŋes a daadaŋ, ikotere toruwor nen neni kaŋ, neni anukanakini ŋikatwak.”

¹⁰Apaki ŋin, eboiyete Epiron Eitait kaapei ka ŋituŋa keŋ; tonyou Epiron toboŋok ŋakiro ka Aburaam epupete Ŋiitaiti daadaŋ ŋulu aya lotemu nenilapat alopuke a etaun tema,

¹¹“Mam, ekapolon kaŋ, kiira ŋakiro kaŋ; alokiŋaren ŋituŋa kaŋ, akainakini ayoŋ iyoŋ akibois ŋin ka aturukan daŋ ŋina eyai nakibois ŋin tonuk akatwan.”

¹²Kijuuru Aburaam alokiŋaren ŋituŋa ŋulu ka akwap a ŋin italakarit ikes.

¹³Tolimok Aburaam Epiron epupete ŋituŋa ka akwap a ŋin tema, “Ekemaimai ayoŋ iyoŋ erae ca kipedori akiirar ŋakiro kaŋ, akainakini ayoŋ iyoŋ ŋisilipae ŋulugyelet ŋalup ŋun, tocamu ŋul aneni kaŋ, ikotere anukakini ayoŋ akatwan nen.”

¹⁴Toboŋok Epiron Aburaam tema,

¹⁵“Ekapolon kaŋ, kiira ŋakiro kaŋ; nyo mono tokona epoida a ŋalup a ŋuna erae egyelit kec ŋicekelya a esilipa ŋamiae ŋaomwon aneni kaŋ ka iyoŋ? Ape tonuk akatwan.”

¹⁶Tocamunos Aburaam ka Epiron; ido kipimak Aburaam Epiron esilipa ŋolo abu Epiron tolimu epupete Ŋiitaiti atemar arae etyae keŋ ŋicekelya a esilipa ŋamiae ŋaomwon, etyae a ekipime a ŋolo agyelanaryata ŋimucurus ŋiboro apaki ŋin.

¹⁷Aŋun, apotu ŋalup a Epiron daadaŋ ŋuna aya Makipela Kide Mamure, ŋuna ayai aturukan kaapei ka ŋikito keŋ daŋ toruworos

¹⁸ŋuna ka Aburaam alokiŋaren Ŋiitaiti daadaŋ ŋulu aya lotemu nenilapat alopuke a etaun.

¹⁹Kedaun ŋun, tonuk Aburaam aberu keŋ Sara naturukan ŋina ayai Makipela, kisiŋoliya akou keŋ Mamure (iŋes Eburon) eyai akibois ŋin Kanaan.

²⁰Apotu Ŋiitaiti inakis Aburaam ŋalup ŋun ka aturukan ŋina ayai nen ikwapei akibois ŋina epedori Aburaam akinuk ŋituŋa keŋ.