Read ngakarimojong Akisy. 25 Bible Online

Akisy. 25 - ngakarimojong bible

Akisy. 25

¹Kiit Aburaam aberu ace, ekeekiro Ketura.

²Touru Ketura Simiran, Yokisan, Medan, Midian, Isibak ka Sua.

³Touru Yokisan Seba ka Dedan. Touru Dedan ŋisapa lu: Asisurim, Letusim ka Leumimim.

⁴Arae ŋidwe a Midian ŋulusapa lu: Epa, Eper, Anok ka Abida ta Elidaa. Arae ŋul daadaŋ ŋitatae a Ketura.

⁵Inak Aburaam Isaka ibore daadaŋ ŋini ayakar iŋes.

⁶Ani eriŋa Aburaam eyari, inak ŋidwe a ŋaberu keŋ a ŋuna pa eitit ŋainakineta, ido kirita ikes aneni a Isaka alokoku keŋ. Toloto ŋul lowae ŋolo alo Kide, nakwap ŋina ayai Kide.

⁷Kiboi Aburaam todolo ŋikaru keŋ amiat ka ŋatomonikanikaarei ka ŋikan.

⁸Ekaku, totwan Aburaam emojoŋit nooi ikoŋikoŋit, ido aponi yae tonukae neni anukitae ŋituŋa keŋ.

⁹Tonuka ŋidwe keŋ ŋulusapa, Isaka ka Isimael Aburaam naturukan ŋina a Makipela, ŋina ayai nalup a Epiron alokoku a Soar a ŋolo arae Eitait, aya ŋalup ŋun Kide Mamure,

¹⁰ikes agyeluni Aburaam aneni a Ŋiitaiti. Nen iŋes aponi tonukakinae Aburaam ka aberu keŋ Sara.

¹¹Ekaku ka atwanare ka Aburaam, kiterereŋ Akuj Isaka lokoku ka Aburaam, kiboi iŋes alo Beerilairoi.

¹²Erae lu ŋidwe a Isimael alokoku ka Aburaam, a ŋolo auruuni Agar ŋina arae Ajipitanoit torae aketiyan a Sara.

¹³Ŋirorwa kec lu ameun aneni a ŋolo apolon tari ŋolo cici: Nebaiyos, Kedar, Adibeel, Mibisam,

¹⁴Misima, Duma, Masa,

¹⁵Adad, Teima, Yeitur, Napis ka Kedema.

¹⁶Erae ŋul ŋirorwa a ŋidwe a Isimael a ŋirerya ka ŋitela kec, arae ikes ŋirwosi ŋitomon ka ŋiarei alotooma ŋikabilae kec.

¹⁷(Kiboi Isimael todolo ŋikaru keŋ amiat ka ŋatomoniuni ka ŋikanikaarei. Ekaku, totwan, ido aponi yae tonukae neni anukitae ŋituŋa keŋ.)

¹⁸Alomito ŋikabilae ŋul anyoun alo Apila tari Sur, neni iteosi ka Ijipit torae alowae a ŋolo eyai Asiriya. Nen iŋes kebu Isimael tolom ibakasi ka ŋituŋa keŋ.

¹⁹Ŋakiro a Isaka alokoku ka Aburaam ikes nu:

²⁰Arae ŋikaru a Isaka ŋatomoniomwon apaki ŋina eisya Rebeka nakoku a Besuel, a ŋolo arae Erameanait ŋolo alo Padanaram; arae Rebeka nakaato a Erameanit a ŋolo anyaritae Laban.

²¹Kilip Isaka neni ke Ekapolon aŋuna pa edoununuyo aberu keŋ; toboŋok Ekapolon akilip keŋ, topoti Rebeka aberu a Isaka.

²²Tobolyakis ŋidwe ijukanarosi anakook a Rebeka, tema iŋes, “Ani kikokinete ne, kaanukiro ayarya ayoŋ?” Aŋun, abu iŋes tolot akiŋita ŋun neni ke Ekapolon.

²³Tolimok Ekapolon iŋes tema, “Eyakasi ŋituŋa a ŋakwapin a ŋaarei nakook kon, ido ŋituŋa a ŋakwapin ŋulu ŋiarei ŋulu idouni iyoŋ, etyakasi, egogoŋioto ŋituŋa ka akwap a apei akilo ŋinace, eruwor edya ŋolo apolon eketiyan a ŋolo cici.”

²⁴Ani eapiyari ŋirwa ŋulu ka akidoun keŋ, kileereu erae ŋimuu aya nakook keŋ.

²⁵Tolomu ŋini esyaunan kiŋa erae ŋini areŋ torae ŋinicekum a akuwan a daadaŋ ikwa elou amesek a ŋinacekum, tolimokinae ŋin ekiro Esau.

²⁶Ekaku tolomu lokaato keŋ ikamunit atotinyo a Esau; ŋun alimokinere ekiro keŋ Yakob. [9] Arae ŋikaru a Isaka ŋatomonikanikapei apaki ŋina edounere Esau ka Yakob.

²⁷Ani epolounete ŋidyain ŋul, toruwor Esau ŋolo ayeni nooi erika anariet. Nai Yakob arae ituŋanan ŋini eapara, ŋini anait akiboi aloeemae.

²⁸Amina Isaka Esau aŋuna araakar ŋolo aarununui ŋityaŋ; nai amina Rebeka Yakob.

²⁹Apeikoloŋit ikulae Yakob ŋapoko, bu Esau anariet eupit.

³⁰Tema neni a Yakob, “Kimyekinae ayoŋ emuj ŋapoko ŋuna areŋak ŋun ŋadi, anerae akaupit ayoŋ nooi.” (ŋun iŋes aponere tonyarae iŋes Edom.)

³¹Tema Yakob, “Inakinae mono ayoŋ apolou ŋina iraakar iyoŋ ekiyae.”

³²Tema Esau, “Eapi ayoŋ atwanare, anijokis eyai ayoŋ aŋuna ka apolou alokal?”

³³Tema Yakob, “Kikoŋ mono neni kaŋ.” Aŋun, abu Esau kikoŋ neni a Yakob, ido inak apolou ŋina araakar iŋes ekiyae neni a Yakob.

³⁴Inak nai Yakob Esau amugati ka ŋapoko ŋuna ekulae iŋes ŋuna ke emaret a ŋolo enyaritae ekao. Kimuj Esau ka tomat, tonyou kipasaiya. Apotu ŋun inakis Esau atwaniyar apolou ŋina araakar iŋes ekiyae.