Read ngakarimojong Akisy. 26 Bible Online

Akisy. 26 - ngakarimojong bible

Akisy. 26

¹Apaki ŋin, ayai eron ece nakwap ŋin, meere ŋolo ayai alorwa a ŋulu ka Aburaam. Tonyou Isaka tolot Gerar neni ka Abimelek a erwosit a ŋolo a Ŋipilistin.

²Totakanu Ekapolon neni a Isaka tema, “Nyilot nyitiyaar Ijipit a ne; kiboikin nakwap ŋina eketoodikini ayoŋ iyoŋ.

³Kiboikin nakwap ŋin, ikiruki iwon, ido eketerereŋi ayoŋ iyoŋ, anerae aŋuna kon ka aŋuna a ŋiletok kon, akainakini akwap na daadaŋ, ido esiyookini akikoŋiet kaŋ ŋina abu ekoŋ neni a papa kon Aburaam.

⁴Etipituni ŋiletok kon tolalata ikwa ŋikacer, ainakini ikes akwap na daadaŋ. Eryamunete ŋituŋa a ŋakwapin a daadaŋ ŋarereŋisyo aloletok kon

⁵aŋuna abunio Aburaam kiwuap ŋakiro kaŋ ka kiyook ŋuna abu ecikak iŋes ikwapei; ŋakiciketa kaŋ, ŋakiro ŋuna abu otub ka ŋikisila kaŋ.”

⁶Aŋun, abu Isaka kiboikin Gerar.

⁷Ani iŋisete ŋikilyok ŋulu ka akwap a ŋin Isaka ŋuna ikamunito akeeberu, toboŋok Isaka ikes tema, “Erae iŋes nakaato kaŋ”; anerae akuryana iŋes alimun ebe, “Erae iŋes aberu kaŋ,” etami ebe, “Kori ca akaarete ayoŋ ŋituŋa ŋulu ka akwap a na aŋuna a Rebeka, anerae atakani Rebeka ibus.”

⁸Ani kiboi Isaka alo Gerar apaki ŋina aoyan, toripiya erwosit Abimelek ŋolo a Ŋipilistin alodirisa, kiŋolik Rebeka ebolyasi ka lokile keŋ Isaka.

⁹Tonyarau Abimelek Isaka kiŋit tema, “Ikwa erae iŋes aberu kon a? Kaanukiro ikilimokinitor iyoŋ ayoŋ ebe, ‘Erae iŋes nakaato kaŋ’?” Tolimok Isaka iŋes tema, “Arae aŋuna atamakinitor ayoŋ atemar epedoryo akiyar ayoŋ aŋuna keŋ.”

¹⁰Tema Abimelek, “Anukiro nu ŋuna itiya iyoŋ neni kosi? Kepedorit robo ituŋanan ice akirat aberu kon, ido iyau iyoŋ ekaile ŋolo ka asecit neni kosi.”

¹¹Aŋun, abu Abimelek kicik ŋituŋa daadaŋ tema, “Ituŋanan daadaŋ ŋini itiyae ŋakiro ŋuna aronok neni a ekile a lo, kori neni aberu keŋ, itemokino toarae.”

¹²Kitaki Isaka ŋikinyom nakwap ŋin, ekaru ŋol tolemu akimuj ŋina alalan nooi. Abu Ekapolon kiterereŋ iŋes,

¹³tobar Isaka, kiyot ebari keŋ iyata iwadio iwadio tari ŋina abarya iŋes nooi.

¹⁴Ayakasi iŋes ŋisipanin a ŋamesekin, ŋisipanin a ŋaatuk ta ŋiketiyak. Aŋun, apotu Ŋipilistin kirakar ebari keŋ, kimana iŋes.

¹⁵(Apaki ŋin, kepotu Ŋipilistin tonuka ŋakare daadaŋ ŋuna kerae ŋiketiyak a Aburaam a papa a Isaka kebokunete eriŋa Aburaam eyari.)

¹⁶Tolimok Abimelek Isaka tema, “Towotok aneni kosi; ibar iyoŋ nooi ikilo isua.”

¹⁷Apotu ŋun kitowuotokis Isaka a nen tolomiya nakadipaalat ŋina a Gerar kiboi a nen.

¹⁸Towada nabo Isaka ŋakare ŋuna koloŋ kebokuni papa keŋ Aburaam; anerae kepotu Ŋipilistin tonuka ikes ketwana Aburaam. Tolimonok Isaka ŋakare ŋun ŋirorwa ŋulupei koloŋ kelimonokinit papa keŋ.

¹⁹Nai ani ebokarete ŋiketiyak a Isaka akadipaalat ŋina aryamuniata akare ŋina ayai eitanit,

²⁰kisiburata ŋikeyokok ŋulu a akwap a ŋina a Gerar ŋikeyokok a Isaka temasi, “Erae ŋakipi nu ŋuna kosi.” Aŋun, abu Isaka tolimok ekiro a akare a ŋin Esek, [10] anerae apotu iŋes kiburata ka ikes a nen.

²¹Tobokasi nabo ikes akare ace, kisiburae ikes a ŋina daŋ, tolimok Isaka ekiro a ŋin Sitina [11]

²²Torotok Isaka a nen, toboku akare ace, nyisiburata ikes Isaka a ŋin daŋ aŋun, abu Isaka tolimok ekiro a ŋin Reobos. [12] Tema, “Ikiinak tokona Ekapolon iwon neni kiboiyet, ido ikipituni anakibois a na.”

²³Towotok Isaka anakibois a ŋin tolot Beeriseba.

²⁴Nakwaare akoloŋit ŋinapei alomya Isaka nakwap ŋin, totakanu Ekapolon neni a Isaka tema, “Arae ayoŋ Akuj a papa kon Aburaam, nyikuryaniar, anerae ikiruki ayoŋ ka iyoŋ, eketerereŋi ayoŋ iyoŋ ka etalalauni ŋiletok kon nooi aŋuna a eketiyan kaŋ Aburaam.”

²⁵Aŋun, abu Isaka todukok Namuroet nen, kilip neni ke Ekapolon a nen, tosodi kigurok eema keŋ nen. Tosodo ŋiketiyak a Isaka tobokakis akare nakibois ŋin.

²⁶Tolot Abimelek alo Gerar neni a Isaka, torukosi ka Ausas erukitos keŋ ŋolo eŋarakinit iŋes akipuka ejok ta Pikol ekapolon a ŋasigarya keŋ.

²⁷Tema Isaka neni kec, “Kaanukiro iponitotor iyes neni kaŋ, oyeni bo ayoŋ atemar ikiremokino iyes ayoŋ ka ipotu ikiritasi ayoŋ aneni kus?”

²⁸Temasi ikes, “Ikianyu isua kire jik atemar irukito iyoŋ ke Ekapolon; aŋun, ikitemari, ekoŋo iwon ŋinituŋanan neni a ŋinice ka ewuakisi acamunet yok, ŋinituŋanan neni a ŋinice,

²⁹ikotere nyitiya iyoŋ ŋadi ŋuna aronok neni kosi, lopite ŋolopei nyetapya isua iyoŋ ka nyitiya isua ŋadi ŋuna aronok neni kon, nai ŋuna ajokak, ido aponi isua ikitowuotokin iyoŋ emam ŋace. Tokona irae iyoŋ ŋolo ikiterereŋit Ekapolon.”

³⁰Aŋun, abu Isaka kipo ŋasuban aŋuna kec, kimuja ka tomata.

³¹Tonyout taparacu sek kikoŋ ŋinituŋanan neni a ŋinice; kitenak nai Isaka ikes toloto nakwap kec emam ŋace.

³²Akoloŋit ŋin, apotu ŋiketiyak a Isaka tolimokis Isaka ŋakiro a akare a ŋina kepotu ikes tobokut, temasi, “Aryamuni isua ŋakipi!”

³³Tolimok Isaka ekiro a akare a ŋin Siba; aŋun, aponi tonyarae ekiro a etaun a ŋolo abu min nen Beeriseba tari tokona.

³⁴Ani eruwor ŋikaru ke Esau ŋatomoniomwon, kiit iŋes Yudis nakoku a Beri a ŋolo arae Eititait, ka Basemas nakoku a Elon a ŋolo arae Eititait;

³⁵tomunaasi ŋaterak ŋun akiyar ŋina sek ayakatar Isaka ka Rebeka.