Read ngakarimojong Akisy. 28 Bible Online

Akisy. 28 - ngakarimojong bible

Akisy. 28

¹Tonyarau Isaka Yakob kiterereŋ, kicikak iŋes tema, “Nyemaikina iyoŋ kiit aberu ŋina erae ŋina a Kanaan.

²Ape atipei Padanaram, lokal ŋolo a Besuel a papa a kon a ŋolo euruunit toto kon; iyau alokal a ŋol apese apei nakoku amamae kon Laban, toruwor aberu kon.

³Elipi Akuj ŋina Etiron ikiterereŋ iyoŋ ikiinak ŋiletok ŋulu alalak, ikotere toruwor papa a ŋituŋa a ŋakwapin.

⁴Elipi ikiinak Akuj iyoŋ ŋarereŋisyo ŋuna ainakinitae Aburaam, ikiinak iyoŋ ka ŋiletok kon, ikotere ikamarete akwap na ŋina tokona iboiyoto iyes irae ŋigelae, toruwor ŋina kus akwap na ŋina erae Akuj abu inak Aburaam.”

⁵Kiyakiya Isaka Yakob; tolot Yakob Padanaram neni a Laban alokoku a Besuel a ŋolo arae Earameanit; arae Laban lokaato a Rebeka a toto a Yakob ke Esau.

⁶Toanyu Esau atemar adau Isaka akiterereŋ Yakob ka eyakiya iŋes alosit Padanaram ayaun aberu keŋ a nen ka apaki ŋina eterereŋio abu kicik tema, “Nyemaikina iyoŋ kiit aberu ŋina erae ŋina a Kanaan,”

⁷ido ewuapak Yakob ŋakiro a papa keŋ ka toto keŋ, alot Padanaram.

⁸Ani eanyuni Esau atemar nyelakara papa keŋ Isaka aŋuna a ŋaberu a ŋuna erae Ŋakanaani,

⁹abu tolot neni a Isimael, yau Maalas nakaato a Nebaiyos, nakoku a Isimael a ŋolo arae lokoku ka Aburaam, kituruwo aberu keŋ, kiyatak naberu ŋuna sek ayakar.

¹⁰Torotok Yakob alo Beeriseba, tolot lowae ŋolo alo Aran.

¹¹Ani edoli iŋes iwace, kiboikin nen kieŋu akuwar daadaŋ a nen, anerae aris akoloŋ kedoiyo. Tolemu iŋes amoru a nen, kicoloŋ eperi.

¹²Ani ejotoe iŋes, kiruja, kiŋolik adoket ewoi anyoun alokwap tari nakuj; kiŋolik ŋimalaikan ŋulu ka Akuj elosete kidiama ka eponito kwap anadoket a ŋin.

¹³Towo Ekapolon alodiyete keŋ tema, “Arae ayoŋ Ekapolon, Akuj ŋina ka Aburaam a papaa kon, Akuj ŋina ka Isaka. Akwap na ŋina iperyo iyoŋ, akainakini ayoŋ iyoŋ ka ŋiletok kon;

¹⁴elalata ŋiletok kon ikwa apuwa ŋina a ŋalup; ilaparosi lowae ŋolo alo Kwap, alo Kide, alo Kuju ka ŋolo alo To; ido eterereŋi ayoŋ ŋituŋa ŋulu ka akwap daadaŋ aŋuna a ŋiletok kon.

¹⁵Toyenu nu ebe ikiruki ayoŋ ka iyoŋ, ekeyokit ayoŋ iyoŋ aneni daadaŋ ilosi iyoŋ, ido ekenyakuni iyoŋ nakwap na, anerae nyakaesikini ayoŋ iyoŋ mati ketiyak ŋuna adau akiikin iyoŋ.”

¹⁶Ekaku ka akiruja, tokyenyu Yakob tema, “Kire jik eyai Ekapolon nakibois na, nai pa ayeni ayoŋ!”

¹⁷Abulit iŋes apaki ŋin, tema, “Abe ikitubuli akibois na nooi! Erae akibois na akai ŋina ka Akuj kire ka erae epuke ŋolo elosi nakuj.”

¹⁸Tonyou Yakob a nen taparacu sek, tolemu amoru ŋina sek ecoloŋit iŋes eperi, tosipok kwap, tobukok akimyet kidiama namoru ŋin.

¹⁹Tolimok ekiro a akibois a ŋin Besel; nai arae sek ekiro a etaun a ŋolo ayai nen Lus.

²⁰Kikoŋ Yakob a nen tema, “Ani kikiruki Akuj ka ayoŋ, ido ekeyok ayoŋ analosit a na, okoinak ayoŋ akimuj onyam ka ŋilowi onap,

²¹ikotere aboŋori ayoŋ lokal a papa kaŋ a ekisil, ŋun iŋes eruworor Ekapolon Akuj kaŋ.

²²Tosodi eruwor amoru na ŋina etowoik ayoŋ ne neni ilipere Akuj; ibore daadaŋ ŋini ikiinakini iyoŋ ayoŋ Akuj, akainakini ayoŋ iyoŋ atutubet apei anatomon.”