Read ngakarimojong Akisy. 29 Bible Online

Akisy. 29 - ngakarimojong bible

Akisy. 29

¹Torotok Yakob a nen, tolot kiŋaren, todol nakwap a ŋituŋa a ŋulu eboiyete alowae a ŋolo alo Kide.

²Ani eŋoleŋolekini, kiŋolik akare anariet, auryanete alodiyete akare ŋin ŋisipanin a ŋamesekin ŋiuni; anerae kiruyo ŋisipanin a ŋamesekin nen. Agolokinitoe amoru ŋina apolon nooi nakituk a akare,

³ido kedaut ŋisipanin daadaŋ acunun, alosete ŋikeyokok akikokoriyor amoru anakituk a akare, ido kiruwakis ŋamesekin, kedaut akiruu, kikokorikis amoru nakituk a akare.

⁴Kiŋit Yakob ŋikeyokok tema, “Ŋikaitotoi, ai iponitotor iyes?” Toboŋokis ikes temasi, “Eponitae isua alo Aran.”

⁵Kiŋit Yakob ikes tema, “Iyenete iyes Laban lokoku a Naor a?” Toboŋokis ikes temasi, “Eyenio.”

⁶Kiŋit nabo Yakob ikes tema, “Eŋale iŋes a?” Toboŋokis ikes temasi, “Ee, Rakel na nakoku keŋ, eramunit ŋamesekin.”

⁷Tema Yakob neni a ŋikeyokok, “Kiŋolikisi iyes, eriŋa apaaran; nyerae na apaki ŋina kitowoet ŋibaren kaapei. Kiruwakisi ŋamesekin toramasi adak.”

⁸Nai toboŋokis ikes temasi, “Nyikipedori isua akitiya ŋun, mati kecunun ŋisipanin a ŋamesekin daadaŋ kaapei, kikokoriyoroe nai amoru anakituk a akare, kiruwakinae nai ŋamesekin.”

⁹Ani eriŋa Yakob irworosi ka ŋikeyokok, todolu Rakel emyat ŋamesekin a papa keŋ, anerae arae iŋes eyoki ikes.

¹⁰Ani iŋolikini Yakob Rakel nakoku a Laban a mamae keŋ ka ŋamesekin a Laban, tolot kijuka amoru anakituk a akare, tosodi kiruwak ŋamesekin a mamae keŋ.

¹¹Ekaku, tonu Yakob Rakel, ido kikalou iworoe nooi.

¹²Tolimok Yakob Rakel tema “Arae ayoŋ eyenet a papa kon, lokoku a Rebeka.” Toem Rakel tolimok papa keŋ ŋakiro a Yakob.

¹³Ani iirari Laban ŋakiro a lokoku anakaato keŋ, toem akisiryam iŋes, totunakin ka tonu iŋes, ido yau kai keŋ. Tolimok nai Yakob Laban ŋakiro daadaŋ,

¹⁴tema Laban neni a Yakob, “Kire, irae iyoŋ akuwan kaŋ ka ŋaokot kaŋ!” Kiboiyoto Yakob ka Laban elap epei.

¹⁵Tolimok Laban Yakob tema, “Ikwapei iraakar iyoŋ eyenet kaŋ, emaikina mono iyoŋ ikitiyanak ayoŋ ikoŋin a? Tolimokinae ayoŋ, nyo eruwor eropit kon?”

¹⁶Ayakar apaki ŋin Laban ŋidwe ŋulupesur ŋiarei, anyaritae ŋina apolon Lea, ŋina cici Rakel.

¹⁷Ebusak nooi ŋakonyen a Lea, ido arae Rakel ŋina adiryana akuwan ka ebus nooi.

¹⁸Tominak Yakob Rakel; tosodi tema neni a Laban, “Etiyae ayoŋ neni kon ŋikaru ŋikanikaarei aŋuna anakoku kon Rakel.”

¹⁹Tolimok Laban iŋes tema, “Ejok nooi ayoŋ ainakin Rakel neni kon, akilo ayoŋ ainakin iŋes neni a ekile a ece, eboiyoto ka ayoŋ.”

²⁰Aŋun, abu Yakob kitiya neni Laban ŋikaru ŋikanikaarei aŋuna a Rakel, nai aneni a Yakob, asibito ŋikaru ŋul ŋirwa ŋidikudyo, anerae amina Yakob Rakel.

²¹Ekaku, tolimok Yakob Laban tema, “Inakinae ayoŋ aberu kaŋ oruko ka ayoŋ, anerae erikakin ŋikaru.”

²²Aŋun, abu Laban tocunak ŋituŋa a akibois a ŋin, kitemok ŋasuban.

²³Nai ani edoli eboŋ, yau Laban nakoku keŋ Lea neni a Yakob, ido apotu Yakob kiryamakinos ka Lea.

²⁴(Inak Laban nakoku keŋ Lea aketiyan keŋ ŋina anyaritae Silpa, ikotere eruwor aketiyan a Lea.)

²⁵Ani taparacu, kiŋolik Yakob erae Lea erukitotor iŋes. Kiŋit Yakob Laban tema, “Anukiro nu ŋuna itiya iyoŋ neni kaŋ? Pa mono arae aŋuna a Rakel etiyaa ayoŋ neni kon a? Nyo bo ikimodikinia iyoŋ ayoŋ?”

²⁶Tema Laban, “Nyitiyasi ŋakiro nu anakwap kosi, nyipotonoryo apese ŋina cici alokal nakiitaro eriŋa ŋina apolon.

²⁷Todautu mono esabit epei ka ŋin, ido ikiinakin ŋinace daŋ, kitiya neni kaŋ ŋikaru ŋice ŋikanikaarei.”

²⁸Abu Yakob kitiya ŋun, todaut ka Lea esabit; inak nai Laban Yakob Rakel toruwor aberu keŋ.

²⁹(Inak Laban nakoku keŋ Rakel aketiyan keŋ ŋina anyaritae Bila, ikotere eruwor aketiyan a Rakel.)

³⁰Aŋun, apotu Yakob kiryamakinos ka Rakel daŋ, ido abu iŋes tominak Rakel nooi akilo Lea. Abu Yakob kitiya neni a Laban ŋikaru ŋice ŋikanikaarei.

³¹Ani eanyuni Ekapolon atemar pa amina Yakob Lea, abu kituruwo Lea ŋina idoe, nai Rakel toruwor ŋina pa edoe.

³²Abu Lea topoti, ido kidou ikoku ŋinisapat, tolimok ekiro keŋ Ruben, anerae abu iŋes tema, “Aŋuna aanyuwarya Ekapolon ŋican kaŋ, kire jik akaminakini tokona ayoŋ ekile kaŋ.”

³³Topoti nabo Lea, kidou ikoku ŋinisapat, ido tema, “Aŋuna eirarya Akuj atemar nyakaminae ayoŋ, akainaki ayoŋ edya lo daŋ”; tolimok iŋes ekiro a edya Simeon.

³⁴Topoti nabo Lea, kidou ikoku ŋinisapat, tema, “Apaki na tokona epedorya lokile kaŋ aminakin ayoŋ, anerae edou ayoŋ ŋisapa ŋiuni aŋuna keŋ.” Aŋun, aponi tolimokinae ekiro a ŋol Lepi.

³⁵Topoti nabo Lea, kidou ikoku ŋinisapat, tema, “Epuri ayoŋ Akuj apaki na”; aŋun, abu tolimok ekiro a edya a ŋol Yuda. Ekaku a Yuda, tojoŋo Lea akidounun.