Read ngakarimojong Akisy. 3 Bible Online

Akisy. 3 - ngakarimojong bible

Akisy. 3

¹Arae emun etyaŋ ŋolo aratana ka aos nooi akilo ŋityaŋ daadaŋ ŋulu ka ariet ŋulu abu Ekapolon Akuj tosub. Tolimok emun aberu tema, “Erae mono kire atemar ikilimokinit iyes Akuj ebe, ‘Nyinyam arait a ekitoe a edio alomanikor’ a?”

²Toboŋok aberu emun tema, “Ikicamakinitae isua akinyam ŋaraito a ŋolokitoe daadaŋ alomanikor,

³nai arait ŋina a ekitoe a ŋolo eyai kidiŋ emanikor, ebala Akuj, ‘Nyinyam arait a ekitoe a ŋol, kori nyitapa daŋ,’ anerae kinyama iyes itwakete”

⁴Nai tolimok emun aberu tema, “Kire jik nyitwakete iyes.

⁵Elimunit Akuj ŋun, anerae eyeni atemar akoloŋit ŋina inyamyata iyes arait ŋin, eŋaarosi ŋatameta kus toyenut ŋuna ajokak ka ŋuna aronok lopite ŋolo eyenia Akuj.”

⁶Kiŋolik aberu ekitoe ejok aŋuna ka akimuj, tonira daŋ ŋakonyen keŋ; tonira iŋes ekitoe aŋuna ka aosou a ŋina ikiini. Tosodi todeŋu arait alokitoe a ŋol tonyam, inak ekile keŋ daŋ ŋolo arukito ka iŋes apaki ŋin, tonyam.

⁷Toŋaaros ŋatameta a ŋuluarei a ŋul, toyenut atemar alerete ikes. Todeŋut ŋakwii a ebobore, tonapa erae ŋilowi a ŋacirin kec.

⁸Akoloŋit ŋin eboŋ ipilipiliuni ekuwuam ŋolo alilimon, kiirasi ikes Ekapolon Akuj elosi alomanikor, toŋopa ekile ka aberu keŋ aneni ke Ekapolon Akuj, toduka alokidiŋ ŋikito ŋulu a emanikor.

⁹Tonyara Ekapolon Akuj ekile kiŋit tema, “Ai iyai iyoŋ?”

¹⁰Tema ekile, “Abu ayoŋ ekeira iyoŋ ilosi alomanikor, ido abu eketim ayakau nen, anerae aleri ayoŋ, aŋun, abu oduk.”

¹¹Kiŋit Akuj iŋes tema, “Ŋae ikilimokini iyoŋ atemar ileri? Idau iyoŋ akinyam arait a ekitoe a ŋolo ekecikit ayoŋ iyoŋ atemar nyinyam a?”

¹²Tema ekile, “Aberu ŋina iyauni iyoŋ akiruk ka ayoŋ iŋes abu okoinak ayoŋ arait a ekitoe a ŋol, ido abu onyam.”

¹³Kiŋit Ekapolon Akuj aberu tema, “Anukiro nu ŋuna itiya iyoŋ?” Tema aberu, “Emun akamodikini ayoŋ, ido abu onyam.”

¹⁴Tolimok Ekapolon Akuj emun tema, “Aŋuna itiyaa iyoŋ ŋun, iruwor iyoŋ ekaŋilam alotyaŋ a daadaŋ ka alosubuna a daadaŋ a ŋulu ka ariet; ilyae iyoŋ a akook kon inyami iyoŋ apuwa ŋarwa ŋuna a akonikiyar daadaŋ.

¹⁵Ekesimanakini ayoŋ iyoŋ ka aberu, imanakin ŋidwe kon ka ŋidwe a aberu; ewani ituŋanan akou kon ka iwani iyoŋ atotinyo a ituŋanan.”

¹⁶Tolimok Akuj aberu tema, “Eyatakini ayoŋ aryebo neni kon nooi apaki ŋina iryamunia akook; idoe anaryeba ka irubakini iitanit ekile kon; ikipolokini iŋes iyoŋ.”

¹⁷Tolimok Akuj ekile tema, “Aŋuna ibunio iyoŋ kiira ŋakiro a aberu kon ka idau akinyam arait a ekitoe a ŋolo ekecikit ayoŋ iyoŋ atemar nyinyam arait keŋ; eryamunete ŋalup ŋilam aŋuna kon; iryamuni tokona iyoŋ akimuj analup anabukor ŋakinyinyir ŋirwa daadaŋ ŋulu ka akiyar kon.

¹⁸Elomunete analup ŋikukwa ka edowan aŋuna kon, ido inyami iyoŋ ŋikito ka ŋinya ŋulu ka ariet.

¹⁹Imuji iyoŋ kidau abukor ŋakinyinyir aloreet akitodol ŋina iboŋorya iyoŋ nalup, anerae nalup iŋes ikilemunere iyoŋ; irae iyoŋ ŋalup, tosodi nalup iŋes iboŋori iyoŋ.”

²⁰Tolimok ekile aberu keŋ ekiro Epa, anerae abu iŋes toruwor toto a ŋituŋa a daadaŋ a ŋulu eyarete.

²¹Kitiyau Ekapolon Akuj alolowi a ŋityaŋ ŋilowi, aŋuna a ekile ka aberu keŋ kitanap ikes.

²²Tema Ekapolon Akuj, “Toanyutu, ekwaanikin ituŋanan ka iwon, ayenu ŋuna ajokak ka ŋuna aronok, tosodi tokona epedori daŋ iŋes alemun arait a ekitoe a ŋolo ka akiyar tonyam toyar ŋikaru ka ŋikaru.”

²³Aŋun, abu Ekapolon Akuj kirita ituŋanan alomanikor ke Eden, kituruwo iŋes eketan ŋalup ŋunapei sek alemunere iŋes.

²⁴Kirita Akuj ituŋanan alomanikor ka Eden, ido kiwuak ŋimalaikan ŋulu enyaritae Ŋikerubim akiboi alo Kide emanikor ke Eden, kiwuak daŋ ekileŋ ŋolo emilimili nooi kirimi, kiyoki erot ŋolo elosi lokitoe ŋolo ka akiyar.