Read ngakarimojong Akisy. 34 Bible Online

Akisy. 34 - ngakarimojong bible

Akisy. 34

¹Akoloŋit apei, abu Dina nakoku a Yakob, ŋina auruunit Lea, tolot apeyo naberu ŋuna anakwap a Kanaan.

²Ani iŋolikini Sekem lokoku ke Eipiit a ŋolo anyaritae Amor, a ŋolo epukat akwap ŋin Dina, kikamu iŋes kituruwo aberu keŋ.

³Tominak Sekem Dina nakoku a Yakob nooi, toruwor apese ŋina amina iŋes, ido isirwori a arimao.

⁴Aŋun, abu Sekem tolimok papa keŋ Amor tema, “Kiitakinae ayoŋ apese na toruwor aberu kaŋ.”

⁵Ani iirari Yakob atemar enyasu Sekem nakoku keŋ Dina, aya ŋidwe keŋ ŋulusapa nacokor eyokiyete ŋibaren, kililiŋia Yakob ŋakiro ŋun akitodol ŋina aboŋunioto ikes lore anacokor.

⁶Tolot Amor papa a Sekem neni a Yakob akisirwor iŋes.

⁷Ani edolunete ŋidwe a Yakob ŋulusapa anacokor, kiirasi ŋakiro a Dina atipei. Toumokis ka toŋoa nooi, anerae kebu Sekem kitiya ŋuna a ŋileec aneni a Ŋisirael, aŋuna kebunio kikamunia nakoku a Yakob kituruwo aberu keŋ, torae bo ŋun ŋuna pa amaikina akitiya.

⁸Nai abu Amor kisirwor ikes tema, “Emina nooi Sekem lokoku kaŋ nakoku kus; ekelipit inakis Sekem kiit iŋes.

⁹Ogeutu akipotonokin anakiito ka isua, inakinae isua ŋidwe kus ŋulupesur, ido yaa iyes daŋ ŋidwe kosi ŋulupesur kiita.

¹⁰Eboiyoto kaapei, ido ipasae akwap na aŋuna kus; kiboiyoto ka kicurutata anakwap a na, toryamut ebari.”

¹¹Tolimok Sekem daŋ papa a Dina ka ŋikaitotoi a Dina tema, “Kimyekinae ayoŋ oruwor ŋolo ajok aneni kus, ido ibore daadaŋ ŋini ikilimokinete iyes ayoŋ, akainakini iyes.

¹²Kiyatakisi lopite ŋolo icamitotor etyae ŋolo kiiset nakoku kus ka etyae ŋolo a ibore a ŋini emaikina ayoŋ olemu erae ainakinet, akainakini ayoŋ iyes ibore daadaŋ ŋini iitanete iyes. Inakinae ca iyes ayoŋ apese toruwor aberu kaŋ.”

¹³Aŋuna kebunio Sekem kinyasu Dina nakoku a Yakob, apotu ŋidwe a Yakob ŋulusapa kirworo amodiyo neni a Sekem ka papa keŋ Amor.

¹⁴Tolimokis ikes temasi, “Nyikipedori isua akitiya ŋun; nyeinio isua ekile ŋolo nyileŋeritae nakaato kosi, anerae eruwor ŋun ŋuna a ŋileec aneni kosi.

¹⁵Ecamunoi iwon erae kicamut iyes ŋakiro nu ebe: Kileŋerae ituŋanan daadaŋ ŋinisapat anakwap kus ikwa isua.

¹⁶Ikiinio isua iyes ŋidwe kosi ŋulupesur erae kitiyata iyes ŋun ka isua daŋ ikiomuni ŋidwe kus ŋulupesur toruwor ŋaberu kosi, eboikinos iwon kaapei oruworos ŋituŋa ŋipei.

¹⁷Nai ani pa kiwuap iyes ŋakiro kosi, tocamut akileŋerio, ikinyakari isua nakoku kosi, oloto a ne.”

¹⁸Kitalakasi ŋakiro kec Amor ka lokoku keŋ Sekem.

¹⁹Abu esorokit Sekem ŋolo etopolooritae nooi alokal kec nyeya apaki ŋina aoyan akitiya ŋun, anerae alakara iŋes nooi aŋuna anakoku a Yakob.

²⁰Toloto Amor ka lokoku keŋ Sekem lopuke ŋolo a etaun kec akisirwor ŋituŋa ŋulu a etaun kec temasi,

²¹“Ekoneoko ŋituŋa lu aneni yok; emyekisi ikes kiboiyoto anakwap a na kicurutata, anerae elolom akwap na aŋuna kec daŋ; ooma ŋidwe kec ŋulupesur eiita ka iwon daŋ oinakisi ikes kiita ŋidwe yok ŋulupesur.

²²Ŋakiro nu bon itacamunete ikes akiboi kaapei ka iwon oruworos ŋituŋa ŋipei: Ituŋanan ŋinisapat daadaŋ anakwap yok, emaikina kileŋerae ikwapei ileŋeritere ikes.

²³Nyepedorete mono ŋaatuk kec ka ŋiboro kec ta ŋibaren kec ŋuluce daadaŋ aruwor ŋulu yok a? Ocamunos iwon ka ikes, ecamunete ikes akiboi kaapei ka iwon.”

²⁴Tocamut ŋituŋa daadaŋ ŋulu alosito lopuke a etaun ŋakiro ka Amor ka lokoku keŋ Sekem, ido aponi kileŋerae ŋituŋa ŋulusapa daadaŋ alotaun.

²⁵Ani epete ŋirwa ŋiuni eriŋa ŋajemei eryebete ikes, tonyout ŋidwe a Yakob ŋulusapa ŋiarei, Simeon ka Lepi ŋulu arae ŋikaitotoi a Dina, tolemasi ŋileŋia kec, toloto kitijikis ŋituŋa a etaun a ŋol pa eyenete. Toara ŋikilyok daadaŋ.

²⁶Toara Amor ka lokoku keŋ Sekem, kiriut Dina alokai a Sekem torotokinioto.

²⁷Potu ŋidwe a Yakob ŋuluce ŋulusapa lotaun, toryamut ŋalyalin, tolema ŋiboro alotaun, anerae nen aponare kinyasunere nakaato kec.

²⁸Tomyaasi ŋakinei, ŋaatuk ka ŋisigirya a ŋituŋa a etaun a ŋol. Yaasi ibore daadaŋ ŋini ayai lotaun ka lomanikorin.

²⁹Yaasi ebari a etaun a ŋol daadaŋ, ŋidwe daadaŋ, ŋaberu daadaŋ, ibore daadaŋ ŋini ayai nakais, tolemasi kituruwosi ŋulu kec.

³⁰Tema nai Yakob neni a Simeon ka Lepi, “Iyaut iyes neni kaŋ ŋatyokisyo; aŋuna ikitidiŋakineta iyes ayoŋ ka Ŋikanaani ta Ŋiperisi, ŋituŋa ŋulu ka akwap a na. Ekudyoko ŋituŋa kaŋ, ido kecunakin ŋituŋa ŋul ekesiiryata ayoŋ, akamunaaryo ayoŋ kaapei ka ekal kaŋ daadaŋ.”

³¹Nai toboŋokis ikes temasi, “Amaikina mono nakaato kosi itusubunio amalaat a?”