Read ngakarimojong Akisy. 38 Bible Online

Akisy. 38 - ngakarimojong bible

Akisy. 38

¹Apaki ŋin, topakari Yuda aneni a ŋikaitotoi keŋ, towot totiyaar kwap a nen, toten neni ayai ekile ŋolo anakwap a ŋina ka Adulam ŋolo anyaritae Ira.

²Kiŋolik Yuda a nen nakoku a Sua a ekile a ece a ŋolo arae ekanakwap a Kanaan; kiit Yuda apese ŋin toruwor aberu keŋ.

³Topoti apese, ŋin kidou ikoku ŋinisapat, tolimok ekiro keŋ Er.

⁴Topoti nabo, kidou ikoku ŋinisapat, tolimok iŋes ekiro keŋ Onan.

⁵Topoti nabo daŋ, kidou ikoku ŋinisapat, tolimok iŋes ekiro a ŋin Sela. Ayai iŋes Kesiba apaki ŋina edounere Sela.

⁶Kiitak Yuda Er lokoku keŋ ŋolo kiyae aberu ŋina anyaritae Tamar.

⁷Nai, arae Er lokoku a Yuda ŋolo apolon edya ŋolo arono alokiŋaren Ekapolon, ido abu Ekapolon toar iŋes.

⁸Tolimok nai Yuda Onan tema, “Ape kirum aberu alokaato kon, kitiya ŋun ikwapei eraakar iŋes aberu alokaato kon. Touru ŋidwe aŋuna alokaato kon.”

⁹Nai aŋuna ayenia Onan atemar nyepedorete ŋidwe ŋul aruwor ŋulu keŋ, emianakini iŋes ŋaokot keŋ ebukonor kwap apaki daadaŋ ŋina iryamakinotor iŋes ka aberu alokaato keŋ; ikotere nyeuru ŋidwe anaberu alokaato keŋ.

¹⁰Pa ajokak alokiŋaren Ekapolon ŋakiro ŋuna etiyae Onan, aŋun, abu Ekapolon toar iŋes daŋ.

¹¹Tolimok nai Yuda Tamar nateran keŋ tema, “Kiboi irae apuserut alokal a papa kon akitodol ŋina epolounio lokoku kaŋ Sela.” Alimuni iŋes ŋun aŋuna atamya atemar etwani Sela daŋ ikwapei ŋikaitotoi keŋ. Aŋun, abu Tamar tolot akiboi alokal a papa keŋ.

¹²Kelunyar apaki ŋina aoyan, abu nakoku, a Sua aberu a Yuda totwana. Ani ekaku ka akiyaloloŋ, tolot Yuda Timina neni a ŋikilyok a ŋulu atubete ŋajul a ŋamesekin keŋ, torukosi ka lokone keŋ Ira ŋolo arae Edulamait.

¹³Ani elimokinio Tamar atemar, alot papaa kon etipeiyo Timina akitub ŋajul a ŋamesekin,

¹⁴tolaca ŋilowi keŋ ŋulu ka apuserut, tonap akitambara anakou, kimuko akuwan keŋ, kiboikin kwap lopuke ŋolo ka Enaim. Ewasi epuke ŋol a lorot a ŋolo elosi Timina. Abu iŋes taanyu atemar apolou Sela, nai pa aponi inakinae iŋes toruwor ekile keŋ.

¹⁵Ani iŋolikini Yuda Tamar, totamak atemar, kori erae amalaat, anerae emukorit Tamar ereet.

¹⁶Tori neni ayai Tamar anawae erot, tema, “Bua, tocamakinae ayoŋ eryamakinos ka iyoŋ.” Alimuni iŋes ŋun, anerae pa ayeni atemar arae ŋin nateran keŋ. Kiŋit Tamar iŋes tema, “Nyo ikiini iyoŋ ayoŋ, ikotere okocamak ayoŋ iyoŋ eryamakinos ka ayoŋ?”

¹⁷Toboŋok iŋes tema, “Ekeyakikini ayoŋ iyoŋ ikale anakinei.” Toboŋok Tamar tema, “Mati jik kikiinak iyoŋ ayoŋ ibore kon idio ŋini inyakari iyoŋ iyauni ikale kon ŋin.”

¹⁸Kiŋit Yuda Tamar tema, “Anibore icamit iyoŋ okoinak ayoŋ iyoŋ?” Toboŋok Tamar tema, “Ekaboboot kon ŋolo a etal ka anapet a ekaboboot ta ebela ŋolo eyai nakan kon ŋol.” Inak nai Yuda Tamar ŋiboro ŋul, tosodi kiryamakinos ka iŋes, kitopoti Yuda Tamar.

¹⁹Tonyou Tamar a nen tolot iwace, tolaca akitambara anakou, tonap ŋilowi keŋ ŋulu ka apuserutanu.

²⁰Ani iyakiyari Yuda lokone keŋ ŋolo arae Edulamait akiya ikale aŋuna ka akinyakunia ŋiboro keŋ aneni a Tamar, nyeryamu ekile ŋol Tamar.

²¹Kiŋit iŋes ŋikilyok ŋulu anakibois a Tamar tema, “Ai eyai amalaat ŋina kuwar ayai Enaim diyete erot?” Toboŋokis ŋikilyok ŋul temasi; “Amam amalaat ayai ne.”

²²Aŋun, toboŋo iŋes neni a Yuda tema, “Nyeryamuna ayoŋ aberu ŋin; apotu tari ŋikilyok ŋulu ka akibois a ŋin temasi, ‘Amam amalaat ayai ne.’ ”

²³Toboŋok Yuda tema, “Kimyekisi iŋes ya ŋiboro ŋul erae ŋulu keŋ, ikotere nyikikyenatar ŋituŋa iwon; topupok ca iyoŋ daŋ, abu ayoŋ eyakik iŋes ikale en, nai ibu iyoŋ nyiryamu iŋes.”

²⁴Ekaku a ŋilapyo a ŋiuni, tolimokinae Yuda temarae, “Kelom nateran kon Tamar ka daŋ epoti iŋes ikoku ŋinilomuna.” Tolimu Yuda tema, “Yautu iŋes kiŋa, emaikina kicunyae iŋes.”

²⁵Ani apaki ŋina ayaunere iŋes kiŋa, kiyakiya iŋes akirot na neni a papaa keŋ ebe, “Arae elope a ŋiboro a lu eketopoti ayoŋ.” Tosodi tema, “Ekelipit ayoŋ iyoŋ, toyen ŋiboro lu: ŋolo a ŋae ekaboboot lo ŋolo a etal ka anapet a ekaboboot na ta ebela lo.”

²⁶Toyen Yuda ŋiboro ŋul erae ŋulu keŋ tema, “Erae iŋes ŋina iyookino akilo ayoŋ, anerae abu ayoŋ nyainak iŋes neni a Sela alokoku kaŋ.” Anyoun apaki ŋin, nyiryamakina ikes nabo jik.

²⁷Ani edoli ŋirwa ŋulu ka akidoun a Tamar, toryamunae eyakasi ŋimuu nakook keŋ.

²⁸Ani eryebakin iŋes akidoun, kirepu ipei akan kiŋa; tosodi akesidoununon kikamu akan ŋin toenik eusi ŋolo kipurat areŋan tema, “Ŋini esyauni alomun kiŋa en.”

²⁹Nai apaki ŋinapei, kinyaka ikoku ŋin akan keŋ, tolomuni lokaato keŋ anakook; tema akesidoununon ŋin, “Ali kipumune kiŋa lo ŋolo ipumunor iyoŋ!” Aŋun, aponi tolimokinae ekiro a ikoku a ŋin Peres.

³⁰Ekaku, tolomu lokaato keŋ kiŋa enapit eusi ŋolo kipurat areŋan anakan; tolimokinae ekiro keŋ Sera.