Read ngakarimojong Akisy. 39 Bible Online

Akisy. 39 - ngakarimojong bible

Akisy. 39

¹Keponi Yosepu yae totiyaarere nakwap ŋina a Ijipit. Togyel Ejipitanoit ŋolo anyaritae Potipar Yosepu aneni a Ŋisimael a ŋulu ayaunete iŋes Ijipit. Arae Potipar epei a ŋikepukak a Parao ŋolo apolokinit ŋisigarya.

²Arukito Ekapolon kaapei ka Yosepu, kituruwo Ekapolon iŋes ŋolo alosi etic keŋ kiŋaren ejok, itiyae kai a ekapolon keŋ a Potipar a Ejipitanoit.

³Ani eyenuni ekapolon a Yosepu atemar erukito Ekapolon kaapei ka Yosepu, ido elosi etic a Yosepu daadaŋ ejok,

⁴tojokyar Yosepu aneni a Potipar, kituruworoe Yosepu ekapolon a ŋuluce ketiyak alokal a ŋol. Inakinae Yosepu akidar ŋiboro daadaŋ ŋulu ayakar Potipar.

⁵Anyoun apaki ŋin, ŋina eturuworere Yosepu ekapolon a ŋuluce alokal a ŋol ka ainakinere akidar ŋiboro daadaŋ ŋulu ayakar Potipar, kiterereŋ Ekapolon ekal a Ejipitanoit a ŋol aŋuna a Yosepu. Kiterereŋ Ekapolon ibore daadaŋ ŋini ayakar iŋes kai ka lomanikor.

⁶Inak Potipar Yosepu akidar ŋiboro daadaŋ, nyemitakiŋes idio bore, mati akimuj keŋ bon. Ebus Yosepu alopite a ŋolo ayakar ka atakania akuwan keŋ.

⁷Kelunyar apaki adio, kiŋolik aberu a ekapolon a Yosepu, Yosepu tema, “Eryamakinos ka ayoŋ.”

⁸Nai towou Yosepu, tolimok aberu a ekapolon keŋ tema, “Kiira, nyeriŋa ekapolon kaŋ emitakinit akiit ŋiboro ŋulu ayakar ayoŋ kai, akainaki iŋes ayoŋ akidar ŋiboro keŋ daadaŋ.

⁹Mam ituŋanan epol alokai a na akilo ayoŋ, mam ibore ŋini nyeinakina iŋes neni kaŋ mati iyoŋ bon; anerae irae iyoŋ aberu keŋ. Ekokini nai ayoŋ etiyae ŋakiro ŋuna aronok ŋun ai, osec alokiŋaren Akuj?”

¹⁰Torubak iŋes elimonokini Yosepu ŋakiro a ŋinakoloŋit, nai nyecamu Yosepu akiirar ŋakiro keŋ, akiper alodiyete keŋ, kori akiryamakin ka iŋes.

¹¹Ani nai akoloŋit apei elosi Yosepu kai akitiya etic keŋ, apaki ŋina amamukar ituŋanan ice ayai kai,

¹²kikama aberu a Potipar Yosepu totiŋ elou tema neni a Yosepu, “Eryamakinos ka ayoŋ.” Nai tonapar Yosepu kiŋa, kimyek elou keŋ anakan a aberu a Potipar.

¹³Ani eanyuni iŋes atemar anapar Yosepu kiŋa emyek elou anakan keŋ,

¹⁴tonyarau ŋituŋa ŋulu a ekal keŋ tema neni kec, “Kiirasi, ayau lokile kaŋ Eyudayat neni yok akitoŋo iwon. Abu iŋes tolomu tooma akiryamakin ka ayoŋ, ido abu ayoŋ eworou nooi;

¹⁵ani ekeirari iŋes ayoŋ eworouni nooi egworo, toesik elou keŋ alodiyete kaŋ, tonapar kiŋa.”

¹⁶Torubak iŋes idarit elou a Yosepu alodiyete keŋ akitodol ŋina abunio ekapolon a Yosepu lore.

¹⁷Tolimok iŋes ekapolon eemut ŋol daadaŋ tema, “Abu Eburaniyat eketiyan ŋolo iyaunit iyoŋ neni yok bu neni kaŋ akitoŋo ayoŋ;

¹⁸nai ani eworouni ayoŋ nooi egworo, toesik elou keŋ alodiyete kaŋ, tonapar kiŋa.”

¹⁹Ani iirari ekapolon a Yosepu ŋakiro ŋuna alimokini aberu keŋ iŋes ebala, “Arae epite ŋol abu eketiyan kon kitiya neni kaŋ,” tonoma ŋakiro etau, toŋo.

²⁰Ya ekapolon Yosepu, kiwuak mabus nakibois ŋina aenitere ŋimabus a erwosit; kiboi Yosepu alomabus.

²¹Nai arukito Ekapolon ka Yosepu, kitoodik Ekapolon iŋes amina ŋina nyiryaŋiryaŋa, inak iŋes tojokyar alokiŋaren ŋolo apolokinit ŋimabus.

²²Inak ŋolo apolokinit ŋimabus Yosepu akidar ŋimabus ŋuluce daadaŋ ŋulu aya mabus, ido ibore daadaŋ ŋini etiya a nen, arae Yosepu apolokinit.

²³Tojoŋo ekapolokiniton ŋimabus amitakinit akiit ibore daadaŋ ŋini abu iŋes inak Yosepu akidar, anerae arukito Ekapolon ka Yosepu, ido ibore daadaŋ ŋini itiyakini iŋes, etolosi Ekapolon kiŋaren ejok.