Read ngakarimojong Akisy. 40 Bible Online

Akisy. 40 - ngakarimojong bible

Akisy. 40

¹Apaki ace kelunyar ŋakiro ŋun, kitoŋoa ekapolon erwosit ŋolo a Ijipit ŋiketiyak keŋ lu: Ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit.

²Toŋoik Parao ŋikapolok lu ŋiarei: Ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit.

³Kikama erwosit ikes ya kidarae alokai a ekapolokiniton ŋasigarya ŋuna a ejera a ŋolo aenitere Yosepu.

⁴Kicikak ekapolokiniton ŋasigarya ikes neni a Yosepu akitere ikes. Kiboiyoto ikes idaritae a nen ŋirwa ŋidi.

⁵Akoloŋit apei nakwaare, kirujata alojera aneni aenitere ikes ŋienan ŋuluarei ŋul; ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit a ŋolo a Ijipit. Agelaaka ŋakiro ŋuna abu ŋinituŋanan kiruja ka agelaana apolou a ŋakiro a ŋuna erujat ŋinituŋanan.

⁶Ani taparacu ebuni Yosepu neni kec, kiŋolik ikes ebulit iyalaara ŋawat.

⁷Aŋun, kiŋit Yosepu ŋikapolok ŋulu sek arae ŋiketiyak a Parao ŋul, ŋulu aya ka iŋes lojera ŋulu edaritae alokai a esigarit a ŋolo apolokinit ŋisigarya tema, “Nyo enyorididyoto ŋireetin kus nakoloŋit na?”

⁸Toboŋokis ikes temasi, “Irujatae isua, ido mam ituŋanan ikisileerekini isua apolou a ŋakiro a ŋuna irujatae.” Tema Yosepu neni kec, “Meere mono Akuj epedori akisileerekin apolou a ŋakiro a ŋuna irujatae a? Tolimokinae ayoŋ ŋakiro ŋuna irujato iyes.”

⁹Tolimu ŋolo apolokinit ŋulu ayaununeete ekopo neni a erwosit ŋuna kebu iŋes kiruja, tema neni a Yosepu, “Anakiruja kaŋ abu ayoŋ eŋolik ekitoe ŋolo a epiini, ayai kiŋaren kaŋ,

¹⁰ayakar ekitoe ŋol ŋaten ŋauni. Ani apaki ŋinapei epuriteunio ekitoe, tolomunete ŋatur kiŋa ka tokoni enene a ŋaraito, toruwor epiini.

¹¹Atiŋit ayoŋ ekopo a Parao apaki ŋin, ido abu olemu ŋaraito a epiini ocuki lokopo a Parao, oinak Parao.”

¹²Tema Yosepu neni a ŋol, “Apolou a ŋakiro a ŋun iŋes na: Erae ŋaten ŋunauni ŋun ŋirwa ŋiuni;

¹³alotooma ŋirwa ŋiuni, ikilemuni iyoŋ Parao alojera, ido ikinyakak iyoŋ lotic kon. Iwuakini iyoŋ ekopo a Parao nakan keŋ lopite ŋolopei sek iwuanakinia apaki ŋina iraakar iyoŋ ŋolo ipolokinit ŋulu ayaununeete ekopo neni a Parao.

¹⁴Nai ani ŋina ejokyarotor ŋakiro aneni kon, totamunitetei ayoŋ daŋ, kitoodiu arimao kon neni kaŋ; tolimoroe ayoŋ daŋ neni a Parao, itolemu ayoŋ alokai a na.

¹⁵Kire! Aponi okokokoun ayoŋ anakwap a Ŋiburaniyae; tokona daŋ a ne, mam ŋakiro ŋuna etiyat ayoŋ, ŋuna ekewuakinitotor ikes ayoŋ lojera.”

¹⁶Ani eanyuni ŋolo sek apolokinit ŋulu ipoete ŋamugati a Parao atemar ejokak ŋakiro ŋuna esileereun anakiruja a erukitos keŋ, tema neni a Yosepu, “Erujat ayoŋ daŋ nu: Abu eŋolik ewokit ŋibukito ŋiuni ŋulu aya ŋamugati ŋuna akwaŋak.

¹⁷Tooma ebukit ŋolo ayai kidiama ŋuluce, aya ŋamuja a Parao ŋuna epotoi ŋuna agelegelya; nai akopete ŋikeny akimuj ŋin alobukit anakou kaŋ.”

¹⁸Toboŋok Yosepu iŋes tema, “Apolou a ŋakiro a ŋuna irujat iyoŋ iŋes na: Erae ŋibukito ŋuluuni ŋul ŋirwa ŋiuni;

¹⁹alotooma ŋirwa ŋiuni, elemari Parao akou kon anakuwan kon, ido kinenek akuwan kon lopir, potu ŋikeny toruto akiriŋ a akuwan kon.”

²⁰Ani edolete ŋirwa ŋiuni, akoloŋit ŋina enumunumere ŋasuban ŋuna a akidouno a Parao, kitemok Parao ŋasuban aŋuna a ŋiketiyak keŋ. Tolemu alokidiŋ ŋiketiyak keŋ ŋulu aya lojera lu: Ŋolo sek apolokinit ŋulu ayaununeete ekopo neni keŋ ka ŋolo sek apolokinit akipore ŋamugati keŋ.

²¹Kinyakak lotic keŋ ŋolo ka ayaunun ekopo eketiyan ŋolo sek apolokinit ŋulu ayaununeete ekopo, yau iŋes ekopo inak Parao.

²²Nai ŋolo sek apolokinit akipore ŋamugati, abu Parao tomyed, kinenek lokitoe ikwapei sek esileereunitor Yosepu.

²³Nai abu ekapolokiniton ŋulu ayaununeete ekopo neni a Parao nyetamu Yosepu, kimuryakis ŋakiro a Yosepu.