Read ngakarimojong Akisy. 41 Bible Online

Akisy. 41 - ngakarimojong bible

Akisy. 41

¹Kelunyar ŋikaru ŋiarei, kiruja Parao ebe: Awoi iŋes alodiyete aŋolol Nile,

²tolomut kiŋa anaŋolol ŋaatuk ŋakanikaarei ŋuna ajokak ŋajul totumito, todaka ŋinya ŋulu enyaritae eoot.

³Kaku ŋaatuk ŋun, ayakasi ŋaatuk ŋace ŋakanikaarei, ŋuna asilok a ŋajul tosenyito. Tolomut anaŋolol, towua alodiyete ŋaatuk ŋunace alokipetot a aŋolol.

⁴Tosodo ŋaatuk ŋuna asilok a ŋajul tosenyito tonyama ŋuna ajokak a ŋajul totumito. Tokyenyu nai Parao a nen.

⁵Tojotoor nabo Parao kiruja akirujaet ŋina a ŋaarei, kiŋolik ŋakyes a ŋikinyom ŋakanikaarei elomunito anakasirimaete a apei; alorok ka ajokak ŋakyes ŋun.

⁶Ekaku a ŋakyes aŋun, tolomut nabo ŋakyes a ŋikinyom ŋace ŋuna ainiarito ŋuna enapapakinit ekuwuam ŋolo ekutunit alo Kide.

⁷Kilikosi ŋakyes ŋuna ainiarito ŋunalorok ŋuna eleleba ŋicok. Ani ekyenyuni Parao, toyenu atemar kirujae iŋes.

⁸Nyeyakaun etau a Parao ejok taparacu; aŋun, abu iŋes kiyaki ŋituŋa anyarare ŋikekukujak ŋulu aya Ijipit ka ŋikaosok keŋ daadaŋ. Tolimok Parao ikes ŋakirujaeta keŋ, nai mam ipei daŋ ŋini abu topedo akisileerekin Parao apolou a ŋakiro a ŋuna abu iŋes kiruja.

⁹Tosodi eketiyan a Parao ŋolo apolokinit ŋulu ayaununeete ekopo neni a Parao tema neni a Parao, “Atamu ayoŋ ŋadyakanareta kaŋ nakoloŋit na.

¹⁰Paaran akoloŋit apei, apotu ŋiketiyak a Parao kitoŋoa Parao, ido abu Parao ekewuak ayoŋ ka ŋolo apolokinit ŋulu epoete ŋamugati keŋ aeno alokai a ŋolo apolokinit ŋisigarya a ŋimabus.

¹¹Ikipotu ayoŋ ka ŋolo akaenitere erujata apeikoloŋit nakwaare, kirujae isua ŋakiro ŋuna pa ekwaan apolou kec.

¹²Ikirukit isua a nen ka esorokit ŋolo arae Eburaniyat, eketiyan a ŋolo apolokinit ŋisigarya a ŋimabus. Ani elimokinio isua iŋes ŋuna aponi kirujae, abu iŋes ikisileerek isua apolou a ŋakirujaeta kosi; tolimok iŋes ŋinituŋanan apolou a ŋuna erujat.

¹³Ikwapei ikisileerekinitor iŋes isua apolou a ŋuna erujatae, apotu ŋakiro ŋun kiyookinos; aponi ayoŋ ekenyakakin lotic kaŋ, ido aponi ŋolo apolokinit ŋulu epoete ŋamugati a Parao kinenekinoe.”

¹⁴Aŋun, kiyakiya Parao ŋituŋa anyarare Yosepu, tolemunae Yosepu atipei alojera kiwonyunere. Kedau Yosepu abanyun akou ka akinap ŋilowi ŋice, bu nai kiŋaren a Parao.

¹⁵Tema Parao neni keŋ, “Erujat ayoŋ, ido mam ituŋanan epedori akisileerekin ayoŋ apolou a ŋakiro a ŋuna erujat. Adau ayoŋ akiirar ŋuna ikitapito iyoŋ ebe ani kiira iyoŋ ŋuna irujat ituŋanan, ipedori akisileereun apolou a ŋakiro a ŋuna irujat iŋes.”

¹⁶Tema Yosepu neni a Parao, “Meere ayoŋ; Akuj iŋes elimokini Parao aboŋokinet ŋina ajokan.”

¹⁷Tosodi Parao tema neni a Yosepu, “Anakiruja kaŋ, awoi ayoŋ alokipetot a aŋolol Nile;

¹⁸tolomut kiŋa anaŋolol ŋaatuk ŋakanikaarei ŋuna ajokak a ŋajul totumito, todaka ŋinya ŋulu enyaritae eoot,

¹⁹kaku ŋaatuk ŋun, ayakasi ŋaatuk ŋakanikaarei ŋuna aronok, ŋuna asilok a ŋajul nooi tosenyito. Nyiŋolikina ayoŋ ŋinapei ŋaatuk ŋuna esilok ŋajul ikwa ŋun anakwap a Ijipit a daadaŋ.

²⁰Tonyama ŋaatuk ŋuna asenyito tosilok ŋajul ŋunace ŋuna esyaunak ŋunakanikaarei ŋuna atumito.

²¹Kedaut akirikar, mam ituŋanan abu toanyu atemar anyama ŋaatuk ŋun ŋunace, anerae apotu ŋaatuk ŋun torubakis esilok ŋajul ikwa ŋinapei sek. Okyenyu nai ayoŋ a nen.

²²Ojotoor nabo ayoŋ, eruja nabo, eŋolik ŋakyes a ŋikinyom ŋakanikaarei elomunito anakasirimaete a apei; alorok ka ajokak ŋakyes ŋun.

²³Ekaku ŋakyes ŋun, tolomut ŋakyes a ŋikinyom ŋace ŋakanikaarei ŋuna ainiarito todiim ka enapapakinit ekuwuam ŋolo ekutunit alo Kide.

²⁴Kilikosi ŋakyes ŋunadiim ŋunakanikaarei ŋuna ajokak. Nai ani alimokini ayoŋ ŋikekukujak, mam ipei daŋ ŋini abu ekesileerek ayoŋ apolou a ŋakiro a ŋuna abu ayoŋ eruja.”

²⁵Tema nai Yosepu neni a Parao, “Erae apolou a ŋakiro a ŋuna irujat Parao apei ka ikwaan, adau Akuj akitoodikin Parao ŋuna eapi Akuj akitiyakin.

²⁶Ŋaatuk ŋunakanikaarei ŋuna ajokak a ŋajul ŋun, erae ŋikaru ŋikanikaarei ka ŋakyes ŋunakanikaarei ŋuna ajokak erae ŋikaru ŋikanikaarei; ŋakirujaeta ŋunaarei erae apei.

²⁷Ŋaatuk ŋunakanikaarei ŋuna asenyak tosilok ŋajul ŋuna apote ekaku a ŋuna aya kaku a ŋuna ajokak, erae ŋikaru ŋikanikaarei, ikote nenipei ŋuna a ŋakyes a ŋuna amam ŋikinyom ka enapapakinit ekuwuam ŋolo ekutunit alo Kide. Erae ŋikaru ŋikanikaarei ŋulu a eron.

²⁸Ikwapei sek alimokinitor ayoŋ Parao; adau Akuj akitoodikin Parao ŋuna eapi Akuj akitiyakin.

²⁹Epote ŋikaru ŋikanikaarei ŋulu elalaa akimuj anakwap a Ijipit a daadaŋ.

³⁰Ekaku a ŋikaru a ŋul, epote ŋikaru ŋikanikaarei ŋulu a eron, imuryakin ŋikaru daadaŋ ŋulu alalaa akimuj anakwap a Ijipit; irikari eron akwap.

³¹Mam ŋini etamuni ŋuna alalaa akimuj anakwap, aŋuna a eron a ŋolo etupakin ŋun, anerae eroniar eron ŋol nooi.

³²Aponi kisirujae Parao ŋakirujaeta ŋaarei, anerae adau Akuj akiwuakin apaki ŋina itiyakinotor ŋun, ido itiyakini Akuj ŋun atipei.

³³Aŋun nai, itemokino Parao toseu ekile ŋolo epatana ayenun ŋakiro, ŋolo eos. Kiwuak Parao ekile ŋol topolok akwap a Ijipit.

³⁴Emaikina Parao kitiya nu: Toseu ŋikapolok ŋulu ka akwap ŋulu ijaununuyete atutubet apei alotooma ŋakan, alokinyom a ŋulu elemunio alokaru a ŋulukanikaarei a ŋulu elalaa akimuj.

³⁵Emaikina ikes tocuna akimuj ŋin ŋina a ŋikaru a ŋulu ajokak a ŋulu eponito. Kidyata ŋikinyom neni a Parao kite alotaunio erae ŋulu kimuja.

³⁶Itemokino akimuj ŋin toruwor ŋina idyasyo nen aŋuna a akwap a daadaŋ ka aŋuna a ŋikaru a ŋikanikaarei a ŋulu a eron; a ŋulu eyakaun nakwap na ŋina a Ijipit; ikotere nai nyemunyarosi ŋituŋa anakwap a na aŋuna a eron.”

³⁷Kitalakasi ŋakiro ŋuna alimuni Yosepu Parao ka ŋiketiyak keŋ daadaŋ.

³⁸Tema Parao neni a ŋiketiyak keŋ, “Ikipedori kire iwon aryamun ituŋanan ice ŋini ikoni ekile lo a? Ituŋanan ŋini eyai Etau ka Akuj tooma keŋ a?”

³⁹Aŋun, tema Parao neni a Yosepu, “Ikwapei ikitoodikinia Akuj iyoŋ ŋakiro nu daadaŋ, mam ituŋanan ice ŋini epatana ayenun ŋakiro, ŋini eos ikwa iyoŋ.

⁴⁰Eruwor iyoŋ ipol alokai a ŋina ka apukan kaŋ, ido emaikina ŋituŋa kaŋ daadaŋ kiwuapa ŋakiro ŋuna ilimokini iyoŋ ikes. Erae ca aŋuna araakar ayoŋ ekepukan iŋes ekeloitor ayoŋ iyoŋ.”

⁴¹Aŋun, tema Parao neni a Yosepu, “Ekewuakini tokona ayoŋ iyoŋ towoik akwap a Ijipit daadaŋ.”

⁴²Tosodi nai Parao tolacu ekaboboot keŋ ŋolo a etal alokimoin keŋ, kitanapik lokimoin a Yosepu. Kitanap ŋilowi ŋulu aoyak ŋulu amilimilak, kitanapik lodokole a Yosepu erikot ŋolo a egolid.

⁴³Kitemyaa Parao Yosepu agaari keŋ ŋina erito ŋaŋolei erae ŋolo etupit iŋes anapolou. Tocelasi ŋituŋa alokiŋaren Yosepu ebasi, “Toryediko!” Aŋun, abu Parao kituruwo Yosepu ekapolon a akwap a Ijipit a daadaŋ.

⁴⁴Tolimok Parao Yosepu tema, “Arae ayoŋ Parao, nai, ani pa kicamak iyoŋ, mam ituŋanan emaikina kitopolooroe anakwap a Ijipit a daadaŋ.”

⁴⁵Tonyara Parao ekiro a Yosepu ebe, Sapenasipanea, ido inak Asenat nakoku a Potipera a esacaradoti a ŋolo ke etaun a ŋolo enyaritae On, toruwor aberu a Yosepu. Kirimok nai Yosepu akwap a Ijipit daadaŋ.

⁴⁶Arae ŋikaru a Yosepu ŋatomoniuni apaki ŋina alomarya lotic a Parao a erwosit a Ijipit. Torotok Yosepu aneni sek eboiyoto ka Parao, tolot kirimo nakwap a Ijipit daadaŋ.

⁴⁷Alotooma ŋikaru ŋikanikaarei ŋulu alalaa akimuj, akoneneete ŋimaanikorin nooi.

⁴⁸Kidyat Yosepu akimuj daadaŋ ŋina a ŋikaru a ŋikanikaarei a ŋulu alalaa akimuj anakwap a Ijipit, kiŋada lotaunio, kiŋada a ŋolotaun akimuj a ŋimaanikorin a ŋulu edunyito etaun ŋol.

⁴⁹Kidyat Yosepu akimuj ŋina alalan nooi ŋina atya asinyon a anam, tojoŋo tari akipim etyae, anerae pa apedorit iŋes akipim.

⁵⁰Ani eriŋa ŋikaru ŋulu a eron nyepona, aris Yosepu keuruu ŋisapa ŋiarei aneni ka Asenat, anakoku a Potipera a ŋolo arae esacaradoti a On.

⁵¹Tolimok Yosepu ekiro alokoku keŋ a ŋolokiyae Manase; anerae abu iŋes tema, “Ekesimuryak Akuj ayoŋ ŋican kaŋ daadaŋ ka ŋituŋa a ekal a papa kaŋ daadaŋ.”

⁵²Tolimok iŋes ekiro alokoku keŋ a ŋolo a ŋiarei Epuraim; anerae abu iŋes tema, “Eketipitu Akuj ayoŋ anakwap a na a ŋina abunio oryamunia ŋican.”

⁵³Todaunos ŋikaru ŋikanikaarei ŋulu aropakinitor akimuj elalaa anakwap a Ijipit.

⁵⁴Kisyakis ŋikaru ŋulukanikaarei ŋulu a eron aponare ikwapei sek alimunitor Yosepu. Toyakaun eron nakwapin daadaŋ, nai ayai akimuj ŋina sek edyasyo nakwap a Ijipit daadaŋ.

⁵⁵Ani enyami akoro ŋituŋa a Ijipit daadaŋ, kikaloikis ŋituŋa Parao aŋuna ka akimuj. Tolimok Parao ŋituŋa a Ijipit daadaŋ tema, “Apesi neni a Yosepu, kitiyata ŋuna ikilimokini iŋes iyes.”

⁵⁶Aŋuna arisyo eron kelomu nakwap ŋin daadaŋ, toŋaa Yosepu ŋakais daadaŋ ŋuna ayai akimuj, togyelanak akimuj neni a ŋituŋa a Ijipit, anerae arono nooi eron anakwap a Ijipit;

⁵⁷nabo daŋ, apotu ŋituŋa a ŋakwapin a daadaŋ potu neni a Yosepu, nakwap a Ijipit akigyel akimuj, anerae arono nooi eron anakwapin a daadaŋ.