Read ngakarimojong Akisy. 46 Bible Online

Akisy. 46 - ngakarimojong bible

Akisy. 46

¹Kisyak Isirael arotokin a nen, ya ibore daadaŋ ŋini ayakar, ani edoli iŋes Beeriseba, tolemik amuronot neni ka Akuj a papa keŋ Isaka.

²Kirworik Akuj neni a Isirael nakwaare anakiruja tema, “Yakob! Yakob!” Toboŋok iŋes tema, “Ayai.”

³Tema Akuj, “Arae ayoŋ Akuj, Akuj a papa kon. Nyikuryan alosit atiyaar Ijipit, anerae eketipituni ayoŋ iyoŋ anakwap a ŋin.

⁴Ikitiyaar ayoŋ ka iyoŋ Ijipit, ido ekenyakuni ayoŋ iyoŋ ne; ikidari iyoŋ Yosepu akitodol natwanare kon.”

⁵Torotok Yakob alo Beeriseba; tonapasi ŋituŋa a Isirael papa kec Yakob ka ŋidwe kec ŋulu cicik ta ŋaberu kec; kiwuakis nagaari ŋuna eyakuuni Parao ayaya ikes.

⁶Tomyaasi ikes ŋibaren kec ka Yaasi ŋiboro ŋulu keryamunito ikes anakwap a Kanaan. Tolomutu Yakob ka ŋiletok keŋ daadaŋ Ijipit,

⁷iŋes ka ŋidwe keŋ ŋulusapa ka ŋipapae keŋ ŋulusapa ta ŋidwe keŋ ŋulupesur ka ŋipapae keŋ ŋulupesur. Yau Yakob ŋiletok keŋ daadaŋ Ijipit.

⁸Ŋirorwa a Ŋisirael ikes lu: Yakob ka ŋidwe keŋ ŋulu arukoryata Ijipit. Ruben iŋes lokoku a Yakob ŋolo kiyae.

⁹Ŋidwe a Ruben ŋulusapa lu: Anok, Palu, Esiron ka Karimi.

¹⁰Ŋidwe a Simeon ŋulusapa lu: Yemuel, Yamin, Oad, Yakin, Soar ka Saul, ŋolo arae aberu ŋina a Kanaan auruuni.

¹¹Ŋidwe a Lepi ŋulusapa lu: Gerison, Koas ka Merari.

¹²Ŋidwe a Yuda ŋulusapa lu: Er, Onan, Sela, Peres ka Sera (nai aris Er ka Onan ketwaka alo Kanaan.) Ŋidwe a Peres ŋulusapa lu: Esiron ka Amul.

¹³Ŋidwe a Isakar ŋulusapa lu: Tola, Pua, Yasub ka Simiron.

¹⁴Ŋidwe a Sebulon ŋulusapa lu: Sered, Elon ka Yaleel.

¹⁵(Ŋidwe a Yakob ŋulusapa ŋul ŋulu auruuni aberu keŋ Lea alo Padanaram, pa imarakinitae Dina nakoku keŋ. Arae ŋidwe a Yakob ŋulusapa ka ŋulupesur ta ŋipapae keŋ daadaŋ ŋatomoniuni ka ŋiuni).

¹⁶Ŋidwe a Gad ŋulusapa lu: Sepon, Agi, Suni, Esibion, Eri, Arodi ka Areli.

¹⁷Ŋidwe a Aser ŋulusapa lu: Imina, Isipa, Isipi ka Beria. Anyaritae ekiro anakaato kec Sera. Ŋidwe a Beria ŋulusapa lu: Eber ka Malikiel.

¹⁸(Ŋidwe ŋul, ikes abu Yakob toryamu ikwapei ŋidwe ka ŋipapae keŋ aneni a Silpa, a ŋina aini Laban neni anakoku keŋ Lea. Arae ŋidwe ŋul daadaŋ ŋitomon ka ŋikanikapei).

¹⁹Ŋidwe a Rakel a aberu a Yakob ŋulusapa lu: Yosepu ka Benjamin.

²⁰Abu Yosepu touru ŋidwe lu anakwap a Ijipit: Manase ka Epraim aneni a Asenat anakoku a Potipera a ŋolo arae esacaradoti a On.

²¹Ŋidwe a Benjamin ŋulusapa lu: Bela, Beker, Asibel, Gera, Naaman, Ei, Ros, Mupim, Upim ka Arid.

²²(Ŋidwe ŋul, ikes abu Yakob toryamu ikwapei ŋidwe ka ŋipapae keŋ. Arae ikes daadaŋ ŋitomon ka ŋiomwon).

²³Lokoku a Dan iŋes Usim.

²⁴Ŋidwe a Napitali ŋulusapa lu: Yasiel, Guni, Yeser ka Silem.

²⁵(Ŋidwe ŋul, ikes abu Yakob toryamu ikwapei ŋidwe ka ŋipapae keŋ aneni a Bila a ŋina aini Laban neni anakoku keŋ Rakel. Arae ikes daadaŋ ŋikanikaarei).

²⁶Ekimar a ŋituŋa a ekal a Yakob a ŋulu arukorete ka iŋes Ijipit pa imarakinitae ŋaberu a ŋidwe keŋ, arae daadaŋ ŋatomonikanikapei ka ŋikanikapei.

²⁷Ani imorikinio nen Yosepu ka ŋidwe keŋ ŋulusapa ŋiarei ŋulu keurunio alo Ijipit, toruwor ekimar a ŋituŋa a ekal a Yakob daadaŋ a ŋulu kelosito Ijipit ŋatomonikanikaarei.

²⁸Kiyakiya Yakob Yuda toberari neni a Yosepu, ikotere itenakini ikes lorot ŋolo elosi Gosen. Ani edolunete ikes Gosen,

²⁹kitemok Yosepu agaari keŋ, tolot akisiryam papa keŋ Yakob alo Gosen. Ani edoli Yosepu neni a papa keŋ, toramar lomosiriŋ keŋ, kigwor etunakina lomosiriŋ a papa keŋ apaki ŋina aoyan.

³⁰Tema Yakob neni a Yosepu, “Apedori tokona ayoŋ atwanare, ikwapei adaunia akiŋolikin iyoŋ atemar eriŋa iyari.”

³¹Tema Yosepu neni a ŋikaitotoi keŋ ka papa keŋ ta ekal a papa keŋ, “Alosi ayoŋ neni a Parao, otema neni keŋ, ‘Apotu neni kaŋ papa kaŋ ka ŋituŋa keŋ ŋulu aya nakwap a Kanaan.

³²Erae ŋikilyok ŋikeyokok a ŋamesekin; iyokiyete ŋibaren, ido aramut ikes ne ŋamesekin, ŋaatuk ka ayaut ŋiboro kec daadaŋ.’

³³Ani ikinyarae iyes Parao ikiŋisi atemar, nyo etic kus?

³⁴Toboŋokisi iŋes temasi, ‘Isua ŋiketiyak kon, ikirae ŋikeyokok a ŋibaren ŋinapei anasorokanut kosi tari tokona, isua kaapei ka atapapaa kosi.’ Tolimutu ŋun ikotere ilomete nakwap ŋina a Gosen, anerae aneni a Ŋijipitian, erae ŋikeyokok a ŋamesekin ŋisiilyanotin.”