Read ngakarimojong Akisy. 6 Bible Online

Akisy. 6 - ngakarimojong bible

Akisy. 6

¹Kisyakis ŋituŋa apitun anakwap, touruut ŋidwe ŋulupesur,

²kiŋolikis ŋidwe a Set ŋulusapa ŋidwe ŋulupesur ŋul ibusak, yaasi ŋuna daadaŋ apotu ikes toseut, kituruwosi ŋaberu kec.

³Tema Ekapolon, “Nyerubakini etau kaŋ iboi aneni a ŋituŋa ŋikaru ka ŋikaru, anerae etwaneneete ikes. Nyedeparete ŋikaru kec amiat ka ŋatomoniarei.”

⁴Ayakasi nakwap apaki ŋin ŋituŋa ŋulu aris kejamuwasi Akuj, ŋulu anyaritae Ŋinepilim. [1] Ayakasi ikes tari apaki ŋina eturuworyata ŋidwe a Set ŋulusapa ŋidwe a ŋituŋa ŋulupesur ŋaberu kec, ŋuna apotu touruut ŋidwe aŋuna kec. Arae Ŋinepilim ŋarwonita ŋuna koloŋ ayakasi nakwap, ŋikilyok ŋulu ayenen.

⁵Kiŋolik Ekapolon aronis a ŋituŋa kelalaar anakwap, ka daadaŋ ŋuna atamete ŋituŋa apaki daadaŋ, arae aronis bon.

⁶Aŋun, kitilil Ekapolon neni koloŋ kesubunia iŋes ituŋanan, toŋo nooi, tonomosi ŋakiro ŋun iŋes.

⁷Tema Ekapolon, “Etoŋopiyari ayoŋ anakwap ŋituŋa ŋulu abu osub, akisyakin aneni a ituŋanan tari lotyaŋ ka aneni a ŋinibore elyat tari lokyeny; anerae eketililyata ayoŋ ŋakiro ŋuna koloŋ abunio osubunia ikes.”

⁸Nai abu Ekapolon toryamu Noa iyookino alokiŋaren keŋ.

⁹Erae lu ŋirorwa a ŋiletok a Noa a ekile a ŋolo eyookino, a ŋolo amam ŋuna etoronitotor ŋituŋa keŋ ka etopoloorit Noa Akuj anakiyar keŋ.

¹⁰Touru Noa ŋidwe ŋiuni lu: Sem, Am ka Yapes.

¹¹Toroketa ŋituŋa daadaŋ alokiŋaren Akuj, toryenyaakyata ikes nooi.

¹²Toanyu Akuj atemar aroketa ŋituŋa, anerae etiya ŋinituŋanan anakwap aronis.

¹³Tolimok Akuj Noa tema, “Adau ayoŋ atubun amunyar ŋituŋa daadaŋ anakwap, anerae eelakis ŋituŋa aryenyeo nakwap; nai tokona, amunyari ayoŋ ŋituŋa kaapei ka akwap.

¹⁴Kitiyau aŋuna kon ataker a ŋakito a ŋikito a ŋulu enyaritae Cipres. Todukonok ŋagulei tooma keŋ; kidelesik tooma ka kiŋa keŋ eminae.

¹⁵Kitiyau iŋes alopite a lo: Itemokino aoyau a ŋisepyon keŋ erae ŋimitae amiat ka ŋatomoniuni ka ŋiuni, aoyau alowae a ŋolo ka akou ka neni iteotor, erae ŋimitae ŋatomoniarei ka ŋaarei, ka aoyau alokwap tari kidiama erae ŋimitae ŋatomon ka ŋauni.

¹⁶Kiwuak nataker ŋidirisae ŋulu eyapiyarito neni erapit ataker ŋulu erae aoyau kec ŋasentimitae ŋatomoniomwon ka ŋiomwon. Kiwuak epuke nawae ataker; kitiyau ataker erae egoropa ŋolo eyakar ŋakais kwap, kidiŋ ka kidiama.

¹⁷Kiira! Eyakuuni ayoŋ akalele nakwap, ikotere emunyari ŋituŋa ŋulu eriŋa eyarete daadaŋ, etwani ibore daadaŋ ŋini eyari anakwap.

¹⁸Nai ewuakini ayoŋ acamunet kaŋ ka iyoŋ; ilomarete iyoŋ nataker ka aberu kon ka ŋidwe kon ŋulusapa ta ŋaberu kec.

¹⁹Yau nataker ŋikabilae daadaŋ a ŋinibore eyari; a ŋolokabila ŋinikile ka ŋiniberu; ikotere toyara ikes kaapei ka iyoŋ.

²⁰Emaikina iyau nataker ŋikyeny ŋulu enaikina ka ŋituŋa ka ŋityaŋ ŋulu ka ariet, ŋibaren, ŋityaŋ ŋuluce daŋ ka ŋityaŋ ŋulu elyato, a ŋolokabila ŋityaŋ ŋiarei, toyara ikes kaapei ka iyoŋ.

²¹Yau ŋamuja daadaŋ kiŋadak nataker aŋuna kon ka a aŋuna a ŋinibore daadaŋ eyai nataker.”

²²Kitiya Noa ŋun daadaŋ lopite ŋolo ecikitor Akuj iŋes.