Read ngakarimojong Akisy. 7 Bible Online

Akisy. 7 - ngakarimojong bible

Akisy. 7

¹Tolimok Ekapolon Noa tema, “Toloma nataker kaapei ka ekal kon, anerae aanyu ayoŋ atemar iyoŋ bon iyookino alokiŋaren kaŋ ananyamet a na.

²Kitoloma nataker ŋityaŋ ŋulu itojokitae ŋulu egelegelya ŋitomon ka ŋiomwon, ŋulukilyok ka ŋunaberu. Kitoloma daŋ ŋityaŋ ŋulu itoronitae, ŋolokile ka ŋinaberu;

³ŋikyeny daŋ ŋulu egelegelya ŋitomon ka ŋiomwon, ŋulukilyok ŋikanikaarei ka ŋuluberu ŋakanikaarei torubakiniata ŋikabilae kec eyakasi nakwap daadaŋ,

⁴anerae ekaku a ŋirwa a ŋikanikaarei, eyakuuni ayoŋ akiru ŋina etepi nakwap ŋapaarasya ŋatomoniomwon ka ŋakuwarisya ŋatomoniomwon. Tosodi amunyari ayoŋ a akiru a ŋin ibore daadaŋ ŋini eyari anakwap, ŋini adau ayoŋ asubun.”

⁵Kitiya Noa daadaŋ lopite ŋolo ecikitor Ekapolon iŋes.

⁶Arae ŋikaru a Noa ŋamiae ŋakanikapei apaki ŋina abunio akalele nakwap.

⁷Tolomasi Noa ka aberu keŋ ka ŋidwe keŋ ŋulusapa ta ŋaterak keŋ nataker, ikotere eiunotor anakalele.

⁸Tolomasi kaapei ka Noa ŋityaŋ ŋulu itojokitae ka ŋulu itoronitae daŋ ka ŋikyeny ta ibore daadaŋ ŋini elyat anakwap,

⁹a ŋiareerei ŋolokile ka ŋinaberu ikwapei ecikitor Akuj Noa.

¹⁰Kelunyar ŋirwa ŋikanikaarei, kiwakin ŋakipi nakwap.

¹¹Alokaru a ŋolo adolioto ŋikaru a Noa ŋamiae ŋakanikapei, elap ŋolo a ŋiarei ŋirwa ka elap ŋitomon ka ŋikanikaarei, tolakakin ŋiitan ŋulu a ŋauwuata ka toŋaaros alokidiama ŋirotin daadaŋ ŋulu ebuneneo akiru.

¹²Kidon akiru akwap ŋapaarasya ŋatomoniomwon ka ŋakuwarisya ŋatomoniomwon.

¹³Akoloŋit ŋin, iŋes alomaryata Noa ka ŋidwe keŋ ŋulusapa lu: Sem, Am ka Yapes nataker; kaapei ka aberu keŋ ta ŋaterak keŋ.

¹⁴Arae daŋ akoloŋit ŋinapei alomaryata nataker ŋityaŋ ŋulu egelegelya; ŋulu ka ariet ka ŋulu enaikina ka ŋituŋa kaapei ta ŋityaŋ daadaŋ ŋulu elyato, a ŋolokabila a ŋityaŋ ŋiareerei ta ŋikyeny ŋulu a ŋolokabila ŋiareerei.

¹⁵Tolomasi ŋul daadaŋ nataker kaapei ka Noa, tolomasi ŋiboorei ŋulu eyarete daadaŋ nateker a ŋiareerei.

¹⁶Toloma ŋinibore daadaŋ nataker, a ŋolokabila ŋinikile ka ŋiniberu, ikwapei ecikitor Akuj Noa. Ani keloma Noa nataker togolok Ekapolon epuke.

¹⁷Torubakis ŋakipi iwaakina nakwap ŋirwa ŋatomoniomwon, torubakis ŋakipi iyatasi, kikyaasi ataker kidiama nooi alokwap.

¹⁸Tolalata ŋakipi nooi, kiyatakin alokidiama ŋalup, kilemilem ataker alokidiama ŋakipi.

¹⁹Tolalata ŋakipi anakwap nooi akilo, torapuwasi tari ŋimoru ŋulu aoyak daadaŋ anakwap.

²⁰Tolalata ŋakipi torapuwasi ŋimoru, todol alalau a ŋakipi ŋimitae ŋakanikaarei akisyakin anaitae a ŋimoru tari kidiama.

²¹Totwana ibore daadaŋ ŋini ayari anakwap: Ŋikyeny, ŋibaren, ŋityaŋ ŋulu ka ariet ka ibore daadaŋ ŋini epori ka elyat alokwap ta ŋituŋa daadaŋ;

²²totwan anakwap ibore daadaŋ ŋini ieŋa alokumes.

²³Tomunyar ibore daadaŋ ŋini ayari anakwap, akisyakin alotuŋa, alobaren, aloboorei a ŋulu elyato daadaŋ ka ŋikyeny. Noa bon abu kidoŋ ka ŋulu arukitotor iŋes anataker.

²⁴Kirimamakin ŋakipi nakwap, todolo ŋirwa amiat ka ŋatomonikan.