Read ngakarimojong 2 Sam. 1 Bible Online

2 Sam. 1 - ngakarimojong bible

2 Sam. 1

¹Ekaku ka atwanare a Saul, kedau Daudi aboŋun aneni amunyarya Ŋiamaleki, abu Daudi kiboi alo Sikilag ŋirwa ŋiarei, nyelot iwace.

²Ani epete ŋirwa ŋiuni, bu ekile ece analomar a Saul, enapit ŋilowi ŋulu acilicila [1] ka tooŋoryana akou keŋ. Ani edoluni iŋes neni a Daudi, toryedik itoodiunit akitopoloorit keŋ Daudi.

³Kiŋit Daudi iŋes tema, “Ai ibunitor iyoŋ?” Toboŋok iŋes tema, “Asiunit ayoŋ analomar a Ŋisirael.”

⁴Kiŋit Daudi iŋes tema, “Anu etiyakin aina? Tolimokinae ayoŋ!” Toboŋok ekile ŋol tema, “Apotu ŋimoe tobwaŋa Ŋisirael alojie, ido apotu ŋimoe toara ŋituŋa ŋulu alalak; atwana Saul ka Yonasan daŋ lokoku keŋ.”

⁵Kiŋit nai Daudi esorokit ŋolo ayaunit ŋakiro neni keŋ ŋol tema, “Ikokini iyoŋ ianyuni atemar atwaka Saul ka Yonasan lokoku keŋ ai?”

⁶Toboŋok esorokit ŋolo ayaunit ŋakiro neni keŋ ŋol tema, “Ani ayai ayoŋ lomukura ŋolo a Gilboa, abu oryamu Saul a nen egwaŋakina nakwara keŋ, toapunete bo neni keŋ ŋimoe edokito ŋagaari ŋuna eritae a ŋaŋolei ka todokito ŋice ŋaŋolei.

⁷Ani iŋoliuni Saul kaku, ekeŋolik ayoŋ, ido okonyar ayoŋ. Abu ayoŋ ei otema, ‘Ayai ekapolon.’

⁸Abu iŋes ekeŋit ayoŋ tema, ‘Ŋae iyoŋ?’ Oboŋok ayoŋ iŋes otema, ‘Arae ayoŋ Emalekait.’

⁹Tema iŋes neni kaŋ, ‘Bua neni kaŋ, ido ikiar ayoŋ; anerae erakanar ayoŋ, nai awou akiridakin.’

¹⁰Aŋun, abu ayoŋ olot neni keŋ, ido oar iŋes, anerae ayeni ayoŋ atemar nyepedori iŋes akiyar kisyakinit akirakanar. Abu ayoŋ olemu ebokot ŋolo anapit iŋes anakou ka apokot ŋina anapit iŋes anakan, ayau ayoŋ ŋiboro ŋul ne neni kon ekapolon kaŋ.”

¹¹Abu Daudi tocilicili ŋilowi ŋulu anapit; kitiyata ŋirukitos a Daudi ŋunapei ŋun.

¹²Kiwololoto ka kigworo aŋuna a Saul ka Yonasan lokoku a Saul ka aŋuna a Ŋisirael a ŋituŋa a Ekapolon. Kiredakis ikes akiron akitodol eboŋ. Etiyaete ikes ŋun daadaŋ aŋuna keponere toarae Ŋisirael ŋulu alalak.

¹³Kiŋit Daudi esorokit ŋolo ayauni ŋakiro neni keŋ ŋol tema, “Ai ibunitor iyoŋ?” Toboŋok ŋol tema, “Arae ayoŋ lokoku a ituŋanan a ŋinigelaanot a ŋini iboi a ne, erae iŋes Emalekait.”

¹⁴Kiŋit Daudi iŋes tema, “Nyo mono pa ikitimyo iyoŋ akikyaar akan kon toar ekapolon ŋolo erae Ekapolon abu toseu?”

¹⁵Tonyarau nai Daudi esorokit keŋ epei tema neni keŋ, “Bua laalo toar etuŋanan lo.” Aŋun, abu esorokit ŋol bu, kicum ekile ŋol toar.

¹⁶Tema Daudi neni a ekile a ŋolo ecumyo a ŋol, “Ikicenete iyoŋ ŋaokot kon ke elope, anerae iyoŋ elope ibu tolimor bon tema, ‘Abu ayoŋ oar ekapolon ŋolo arae Ekapolon abu toseu.’ ”

¹⁷Kigwor nai Daudi eeo ete lo aŋuna a Saul ka Yonasan lokoku a Saul.

¹⁸(Tolimok ŋituŋa a Yudaya atemar emaikina kitatamae ŋituŋa a Yudaya eete ŋol. Erae eete ŋol ŋolo a akau a ŋikaleŋeleŋe, ido igiritae iŋes lokitaabo ŋolo Yasar) [2] ebala:

¹⁹Okoe Isirael, eperete ŋikapolok kon etwakito anakiboisyo kon aŋuna eoyak! Okoe atwaka bare ca ŋikatitinyok kosi!

²⁰Nyemaikina ŋakiro nu tolimoroe alo Gas, kori kiserae alorotin a ŋulu ka Asikelon; anerae epedorete ŋidwe a Ŋipilistin ŋulupesur alelyan, epedorete ŋidwe a ŋul a ŋulu nyileŋeritae alakar.

²¹Iyes ŋimukura ŋulu a Gilboa, nyepete ŋakopi kidiama kus, kori nyilimi akiru, nyerayete ŋimanikorin ŋulu eya neni kus! Anerae neni kus emasarere nariet aupal a ekatitinyon, aupal a Saul ŋina nyeriŋa iosyo ka akimyet.

²²Nyikwaŋakina Saul ka Yonasan abukor ŋaokot a ŋimoe kec, nyikwaŋakina ikes apokonor ŋarwonita. Nyinyakara Yonasan ŋikaleŋeleŋe keŋ nyeara ituŋanan, kori nyinyakara Saul ekileŋ keŋ nyeara ituŋanan.

²³Arae Saul ka Yonasan anakiyar kec ŋituŋa ŋulu aminae ka ŋulu ajokak; apotu ikes nyetyakas anakiyar kec ka anatwanare kec; apiraka ikes nooi akilo tari ŋigolei. Agogoŋ ikes nooi akilo tari ŋiŋatunyo.

²⁴Okoe! ŋaberu ŋuna alo Isirael, kigworo aŋuna a Saul, a ŋolo abu ikitanap iyes ŋilowi ŋulu kipura-areŋak ŋapakio ŋuna ka alakar, a ŋolo abu kisibus ŋilowi kus a egolid.

²⁵Okoe atwaka bare ca ŋikajiok ŋulu atitinyok, edoŋokis bare ca ikes lokiryam! Eperi akuwan a Yonasan alokamukumukui kus.

²⁶Lokaato kaŋ Yonasan, eyaloloŋi ayoŋ aŋuna kon, abu ayoŋ okomina iyoŋ nooi; apol nooi amina kon ayoŋ, akilo tari amina ŋina eminare ŋaberu.

²⁷Okoe atwaka bare ca ŋikajiok ŋulu atitinyok! Asalut bare ca ŋiboro kec ŋulu ke ejie!