Read ngakarimojong 2 Sam. 12 Bible Online

2 Sam. 12 - ngakarimojong bible

2 Sam. 12

¹Kiyakiya Ekapolon Nasan neni a Daudi. Ani edoli Nasan neni a Daudi, tema, “Ayakasi koloŋ ŋikilyok ŋiarei lotaun ece, abarit epei, ido akulyakana ŋoloce.

²Alalak nooi ŋamesekin ka ŋaatuk a ekile a ŋolo abaran,

³nai ekile ŋolo akulyakana, amam ibore ayai, alemar ikale ŋiniberu ŋinimesek ipei bon ŋini kegyeluni iŋes. Kebu iŋes kiyok ikale ŋin topolok neni keŋ ka neni a ŋidwe keŋ, amorete ka iŋes akimuj ka etamasyo alokopo ke ekile a ŋol, aperi daŋ natorobu a ekile a ŋol. Asibit aneni keŋ ikale ŋin ikoku keŋ ŋinipese.

⁴Apeikoloŋit, abu ekaloton ece kitoru neni a ekile a ŋolo abarit a ŋol, nai abu ekabaran ŋol nyelemu apei a ŋamesekin keŋ, kori a ŋaatuk keŋ aarakin ekaloton ŋolo abu kitoru neni keŋ. Akilo alemun ŋini keŋ, abu ya ikale a ekulyakit, toarak ekaloton ŋol ŋolo abu kitoru neni keŋ.”

⁵Toŋo Daudi aŋuna a ekabaran a ŋol, tema neni a Nasan, “Kire jik, ekoŋi ayoŋ alokiro ke Ekapolon a ŋolo eyari atemar emaikina etuŋanan ŋolo etiya ŋakiro ŋun totwana!

⁶Emaikina iŋes totac ikale ŋin, ido kidokok ŋakinei ŋace ŋaomwon kidiama, anerae abu iŋes kitiya ŋakiro ŋuna aronok, nyisyoni ekulyakit.”

⁷Tema Nasan neni a Daudi, “Erae ekile ŋol iyoŋ pei! Abala Ekapolon Akuj a Isirael ebe, ‘Abu ayoŋ okoseu iyoŋ aruwor erwosit ŋolo ipukae Isirael, ido abu ayoŋ okoiu iyoŋ aneni a Saul.

⁸Abu ayoŋ okoinak iyoŋ ŋituŋa a ekal a ekapolon kon ka abu ayoŋ okoinak iyoŋ ŋaberu a ekapolon kon. Abu ayoŋ okoinak iyoŋ akipuka ŋituŋa a Isirael ka ŋulu a Yudaya. Ani kerae itokadito iyoŋ ŋul daadaŋ, kekeyatakinit ayoŋ iyoŋ ŋice ŋulu etya neni pei.

⁹Kaanukiro ijamuwarya iyoŋ akirot ke Ekapolon aŋuna itiyaa ŋuna aronok alokiŋaren Ekapolon? Ibu iyoŋ toar Uria Eititait a akileŋ, ido iya aberu keŋ kituruwo ŋina kon.

¹⁰Aŋun nai, nyimyekini ekileŋ akiar ŋituŋa a ekal kon, aŋuna ikijamuwarya iyoŋ ayoŋ, ido iya aberu a Uria ituruwo ŋina kon.

¹¹Irworo Ekapolon ŋakiro nu, eketeryamuni ayoŋ iyoŋ ŋican alotuŋa a ŋulu a ekal kon ke elope; ido alemari ayoŋ ŋaberu kon ite iyoŋ, epotok ikes neni a ekidunyet kon, kiryamakinos ka iŋes naparan pa eŋopito a iwadio.

¹²ibu iyoŋ kitiya ŋun anakimunono, nai emyekini ayoŋ ŋun kitiyakin naparan ileerete aneni a Ŋisirael a daadaŋ.’”

¹³Tema Daudi neni a Nasan, “Asec ayoŋ alokiŋaren Ekapolon.” Tema Nasan neni a Daudi, “Ikisyon tokona iyoŋ Ekapolon aŋuna ka asecit kon, nyikiari iŋes iyoŋ.

¹⁴Kikote neni daŋ, aŋuna a ŋakiro a ŋuna itiya iyoŋ, idau iyoŋ ajamuwar Ekapolon nooi, aŋun, etwani ikoku ŋini iuruuni iyoŋ.”

¹⁵Torotok nai Nasan a nen, toboŋo lore keŋ. Ani keboŋo Nasan lore keŋ, abu Ekapolon kitedyakak ikoku a Basiseba a aberu a Uria ŋini auruuni Daudi; todyakakin ikoku ŋin nooi.

¹⁶Aŋun, abu Daudi todyek Akuj aŋuna a ikoku a ŋin; kiredak iŋes akiron, tolot toper kwap akuwar kya.

¹⁷Potu ŋikasikou ŋulu arae ŋiyeneta keŋ, towua alodiyete keŋ, akimaima iŋes tonyou a nen alokwap, nai abu Daudi nyecamu, nyimuj tari akimuj kaapei ka ikes.

¹⁸Ani edolete ŋirwa ŋikanikaarei edyaka ikoku ŋin, abu totwan. Tokuryaketa ŋiketiyak a Daudi alimokin iŋes atemar atwana ikoku; anerae apotu ikes temasi, “Ani ŋoon eriŋa ikoku eyari, esirworyo iwon Daudi, nai pa acamit iŋes akiirar ŋakiro yok. Alipite nai tokona elimokinere iwon iŋes atemar atwana ikoku? Acepaki epedori iŋes awana.”

¹⁹Nai ani iŋolikini Daudi ŋiketiyak keŋ iŋaiŋaasi make daadaŋ, abu toyenu atemar ketwana ikoku; ido abu iŋes kiŋit ŋiketiyak keŋ tema, “Eridak ikoku a?” Toboŋokis ikes temasi, “Eridak.”

²⁰Tonyou nai Daudi alokwap, kiloŋar, kitaleu akuwan keŋ, ido tonap ŋilowi ŋice. Tonyou a nen, tolot Kai ke Ekapolon kilip. Ani kirikak, toboŋo kai keŋ. Tolimok iŋes ŋituŋa atemar yaunae neni keŋ akimuj, ido aponi inakinae iŋes akimuj ka abu iŋes kimuj.

²¹Kiŋita nai ŋiketiyak iŋes temasi, “Anukiro nu ŋuna itiya iyoŋ? Ibu iyoŋ kiredak akigwor aŋuna a ikoku eriŋa eyari, nai ani kedau ikoku atwanare, inyou iyoŋ ka imuji.”

²²Toboŋok iŋes tema, “Ani ŋoon eriŋa ikoku eyari, abu ayoŋ eredak akiron ka egwor; anerae abala ayoŋ, ‘Ŋae eyeni? Acepaki ekesyoni ayoŋ Ekapolon, kiteyar ikoku.’

²³Nai tokona atwana, kaanukiro emaikina ayoŋ eredak akiron? Apedori mono tokona ayoŋ akinyakun akiyar keŋ nabo a? Apedori ayoŋ alosit neni keŋ, nai nyeboŋuni iŋes neni kaŋ.”

²⁴Aŋun, abu Daudi tolot akisirworiun Basiseba aberu keŋ, ekaku tolot iŋes kai a Basiseba kiryamakinos ka iŋes; touru Basiseba ikoku ŋinisapat, tolimok Daudi ekiro a ikoku a ŋin Solomon. Tominak Ekapolon Solomon.

²⁵Kiyakiya Ekapolon akirot neni a Daudi aneni a Nasan a ekadwaran atemar, tolimokinae ekiro a ikoku Yedidia apolou keŋ atemar emina Ekapolon iŋes.

²⁶Apaki ŋin, ariŋa Yoab itiji Ŋiamoni ŋulu eboiyete alo Raba ka abu kikama etaun kec ŋolo apolon anakwap kec.

²⁷Kiyakiya Yoab ŋituŋa neni a Daudi alimokin iŋes ebe, “Adau ayoŋ akitijiore ŋituŋa ŋulu iboiyete alo Raba, adau daŋ akikamar neni eya ŋakipi a etaun.

²⁸Aŋun nai, tocunak ŋituŋa ŋuluce daadaŋ iwapei, potu kicodokis etaun, kikamasi, ani kemam, ekamari ayoŋ etaun, ido tonyarae etaun a ekiro kaŋ.”

²⁹Aŋun, abu Daudi tocunak ŋituŋa ŋuluce daadaŋ, toloto ka iŋes Raba, kitijikis ŋituŋa a etaun a ŋol, kikamasi etaun.

³⁰Tolacu Daudi ebokot ŋolo anapit Milikom anakou. Arae apotis a ebokot a ŋol ŋakiloi a egolid ŋuna aapiyarito 34, ido ewuakinitae tooma keŋ amoru ŋina epol egyelit. Abu Daudi kiwuak amoru ŋin lobokot keŋ a elope. Abu Daudi yau tari ŋiboro ŋulu alalak nooi, ŋulu aŋatuni iŋes alotaun a ŋol.

³¹Toriku Daudi ŋituŋa a etaun a ŋol, inak ikes akitiya a ŋirigi, a ŋisururo ka a ŋaepe, kori ya ikes kitiyata ŋamatapali. Abu Daudi kitiya ŋakiro ŋun lotaunio a Ŋiamoni daadaŋ. Ani nai ekaku, apotu Daudi ka ŋasigarya keŋ daadaŋ toboŋosi Yerusalem.