Read ngakarimojong 2 Sam. 22 Bible Online

2 Sam. 22 - ngakarimojong bible

2 Sam. 22

¹Abu Daudi toeik eete lo neni a Ekapolon apaki ŋina aiunia Ekapolon iŋes alomoe keŋ a daadaŋ ka aneni a Saul.

²Tema iŋes, “Ekapolon iŋes erae ataaba kaŋ ŋinakiupala, aduketait kaŋ ŋina ajio alotooma ka ekaiunan kaŋ,

³Akuj kaŋ, ataaba kaŋ ŋinakiupala, neni kon iŋes aiunor ayoŋ, iyoŋ irae aupal kaŋ ka akaiunan kaŋ ŋina etiron, neni kon iŋes ayakaun ayoŋ pa eryaŋiryaŋa, neni kon iŋes aŋopya ayoŋ, iyoŋ irae akaiunan kaŋ, ibu iyoŋ ikiu ayoŋ aneni a ŋaryenyaanisya.

⁴Anyarae ayoŋ Ekapolon ŋolo emaikina kipuroe, ido akaiunio ayoŋ alomoe kaŋ.

⁵“Apotu ŋirotin ŋulu ka atwanare okorapuwasi ayoŋ, apotu ŋirotin ŋulu ka amunyaro kipiiyaun, ekesiiryakis ayoŋ neni aronon;

⁶Apotu ŋirotin a akibois a ŋina a ŋikatwak okoena ayoŋ, abu atwanare okoapik ayoŋ apotu ŋirotin ŋulu ka atwanare ekerikaut ayoŋ. abu akipany kitemokin aŋuna kaŋ.

⁷“Abu ayoŋ alocan kaŋ onyara Ekapolon; abu onyara Akuj kaŋ. Abu Akuj alo Kai keŋ kiira etoil kaŋ, abu iŋes kiira akigworo kaŋ.

⁸“Abu akwap tomaranik ka kiyaŋiyaŋakin; apotu ŋawoeta ŋuna alokidiama tomaranikis ka kiyaŋiyaŋakinae; anerae abu Akuj toŋo.

⁹Abu apuru tolomu alokumes keŋ ka abu akim ŋina anyamuwaran tolomu anakituk keŋ, toneput ŋatotol anakituk keŋ.

¹⁰Abu Akuj kimyek nakuj bu kwap; apotu ŋidouwon ŋulukiryonok cuc pena kwap ŋakejen keŋ.

¹¹Abu iŋes todokak esubuna ŋolo a ŋabebenuk kiwuwaun kwap, abu iŋes kiwuwaun kwap atipei alokuwuam.

¹²Abu iŋes min kidiŋ akiryonut, apotu ŋidouwon ŋulukiryonok cuc ŋulu ka akiru torapuwasi iŋes.

¹³Alotooma akwaŋis kya ŋina ayai kiŋaren keŋ, abu akimilya ŋina ekwaan ka akim totakun.

¹⁴Abu Ekapolon kirworik anakuj, ido aponi kiirarae etoil a Akuj a ŋina alokidiama nooi.

¹⁵Abu iŋes kiyaku akimilya keŋ kiela ŋimoe, abu kirita ikes a akimilya.

¹⁶Ekaku a ŋun, apotu ŋakadipaalae ŋuna ka anam totakanut, tolemarae ibore ŋini arapit akisyakinet ka akwap. Arae apaki ŋin ŋina ikilyakinia iyoŋ ŋimoe kon, okoe Ekapolon, arae apaki ŋin ŋina eŋenyakinia Akuj ŋimoe keŋ eŋoit.

¹⁷“Abu Ekapolon bu alokidiama kwap, ekekamu ayoŋ, abu ekeriu ayoŋ anakipi a ŋuna eleleba neni acukul.

¹⁸Abu okoiu ayoŋ alomoit kaŋ a ŋolo agogoŋon, abu okoiu ayoŋ aneni a ŋulu akaremokino; anerae agogoŋ ikes nooi akilo ayoŋ.

¹⁹Apotu ikes ekesiiryakis ayoŋ neni aronon akoloŋit ŋina ayakar ayoŋ locan, nai abu Ekapolon okoiu ayoŋ.

²⁰Abu Ekapolon okoyau ayoŋ kiŋa, nakibois ŋina aloloman nooi; abu iŋes okoiu ayoŋ, anerae abu iŋes tolakar aŋuna kaŋ.

²¹“Abu Ekapolon okorop ayoŋ aŋuna ka akiyookino kaŋ; abu iŋes okorop ayoŋ alopite a ŋolo emamukar ibore ŋini aronon ŋini etiyat ayoŋ,

²²anerae abu ayoŋ ewuap ŋuna abala Ekapolon, mam ŋuna aronok ŋuna etiyat ayoŋ ŋuna eketeŋerete ayoŋ Akuj kaŋ.

²³Ewuapit ayoŋ ŋikisila keŋ daadaŋ, mam nyimyekina ayoŋ ŋakiro ŋuna atubunit iŋes.

²⁴Mam ŋakiro aronia ayoŋ alokiŋaren keŋ, mam asecit etiyat ayoŋ.

²⁵Aŋun, akarop ayoŋ Ekapolon aŋuna ka akiyookino kaŋ, akarop iŋes ayoŋ anerae mam ibore ŋini aronon ŋini etiyat ayoŋ.

²⁶Ikinyomit iyoŋ ŋulu ikikinyomito iyoŋ, itiyae iyoŋ ŋuna ajokak neni a ŋulu emam aronis,

²⁷itoodiunun iyoŋ ijok neni a ŋulu emam asecit, ido iryenyaanikinit iyoŋ ŋulu isyaaka.

²⁸Iiununui iyoŋ ŋituŋa ŋulu itiditeuna make, nai itiditeununi iyoŋ ŋiketurok.

²⁹Okoe Ekapolon, irae iyoŋ etaa kaŋ; isileereununui iyoŋ Ekapolon ŋuna nyileerete anakiyar kaŋ.

³⁰Anakiŋarakinet kon, apedori ayoŋ amunyar ajore; anakiŋarakinet kon Akuj kaŋ, apedori ayoŋ akikalam arwatata.

³¹Ani eruwor iyoŋ Akuj, iyookino ŋuna kon; iyoonokin akiikinet ŋina a Ekapolon; erae iŋes aupal aneni a ŋulu daadaŋ eŋopete aneni keŋ,

³²ŋae mono erae Akuj alemar Ekapolon? ŋae ekaiunan yok ece alemar Akuj yok?

³³Erae Akuj akainanakini ayoŋ agogoŋu, ido iŋes ituruwonori ŋuna etiyae ayoŋ ŋuna iyookino.

³⁴Abu Akuj okoinak ayoŋ apiranu lopite ŋolo epirania Atili, ido abu ekewuak ayoŋ lomukura oiun a nen.

³⁵Abu iŋes eketatam ayoŋ epite ŋolojiet ikotere ŋakan kaŋ iketakinete akau a ŋikaleŋeleŋe ŋina agogoŋon nooi.

³⁶Idau iyoŋ Ekapolon ainakin ayoŋ aupal ŋina ikiunia iyoŋ ayoŋ, ido eketopoloosi ayoŋ ŋuna ibunio iyoŋ ikiŋarakinia ayoŋ.

³⁷Ikisikomak iyoŋ ayoŋ emam akuryanu, nyicurusiyanarosi ŋakejen kaŋ.

³⁸Abu ayoŋ ewuap ŋimoe kaŋ orukau, ido abu omunya ikes; nyeboŋoro ayoŋ aneni kec emyek ikes, akitodol apaki ŋina amunyarya ayoŋ ikes.

³⁹Abu ayoŋ omunya ikes jik, nyeboŋokino nabo ikes aponare; abu ayoŋ oreu ikes epudaiya,

⁴⁰anerae ibu iyoŋ ikiinak ayoŋ agogoŋu ŋinajiet; ikiinak ayoŋ akiloun ŋimoe kaŋ.

⁴¹Ibu iyoŋ ikisimanak ayoŋ ŋimoe kaŋ ŋakausinei, ŋimoe kaŋ ŋulu akaremokino ayoŋ, ido abu ayoŋ omunya ikes.

⁴²Apotu ikes kiwara ikaiunan, nai mam ŋini arae ikaiunan ikes; apotu ikes kigworonokis Ekapolon, nai abu Ekapolon nyeboŋok ikes ŋakiro ŋadi.

⁴³Abu ayoŋ enyadiya ikes kikokis apuwa, abu ayoŋ ecakicak ka epuda ikes ikwa ipudaere ecoto ŋolo alorotin a etaun.

⁴⁴Idau iyoŋ aiun ayoŋ alojiesyo ka ŋituŋa; idau iyoŋ apiyanun ayoŋ ikwapei ekepukan a ŋakwapin; Eketiyanakinete tokona ayoŋ ŋituŋa ŋulu sek pa ayeni ayoŋ.

⁴⁵Apotu ŋituŋa ŋulugelae potu toryediko alokiŋaren kaŋ; apaki ŋinapei eiraryata ŋakiro kaŋ, apotu kiwuapa ŋakiro kaŋ.

⁴⁶Apotu ŋitai a ŋituŋa a ŋulugelae tolilimiyosi; potu ikes neni kaŋ emaranete, anakiboisyo a ŋuna sek eboiyoto emam akuryanu.

⁴⁷Eyari Ekapolon! Kipuroe ataaba kaŋ ŋina kiupala, kitopolooroe Akuj kaŋ, ataaba ŋina kiupala, ŋina ka aiuno kaŋ,

⁴⁸Irae iyoŋ Akuj ŋina ibu ikiinak ayoŋ akinyaŋar, ido ikiinak ayoŋ akipuka ŋituŋa a ŋakwapin,

⁴⁹Akuj ŋina abu okoiu ayoŋ alomoe kaŋ. Ibu iyoŋ ikitopoloo ayoŋ, epuka ŋimoe kaŋ; ibu iyoŋ ikiu ayoŋ alotuŋa a ŋulu aryenyaanak.

⁵⁰Aŋun, eserae ŋuna ka ajokis kon neni a ŋulu nyerae Ŋiyudayan, ido aeikini ayoŋ ŋieosyo epur ekiro kon.

⁵¹Einanakini Akuj erwosit ŋolo abu iŋes toseu akilounun ŋimoe keŋ, itoodianakini Akuj erwosit ŋolo abu iŋes toseu arimao keŋ, einanakini Akuj ŋun neni a Daudi ka ŋiletok keŋ ŋikaru ka ŋikaru.”