Read ngakarimojong 2 Sam. 24 Bible Online

2 Sam. 24 - ngakarimojong bible

2 Sam. 24

¹Abu nabo Ekapolon toŋoik Ŋisirael, ido abu inak Daudi akidupor Ŋisirael; tema Ekapolon neni a Daudi, “Ape kimar ŋituŋa a Isirael ka ŋulu a Yudaya.”

²Aŋun, abu erwosit tolimok Yoab kaapei ka ŋikarikok a ŋasigarya keŋ ŋulu arukito ka iŋes tema, “Toloto lokabilae a Isirael daadaŋ ŋinapei alo Dan tari Beeriseba, kimara ŋikilyok ŋulu epedorito ejie, ikotere ayoŋ ayenuni ekimar kec.”

³Nai abu Yoab tema neni a erwosit, “Emaimai ayoŋ Ekapolon Akuj kon kiyatak ekimar a ŋituŋa todolo amiat ŋarwa amiat, ido elipi ayoŋ torubak iyoŋ iyari kiŋolik ekimar ŋol. Nai kaanukiro icamitor iyoŋ ekapolon erwosit kaŋ akitiya ŋun?”

⁴Apotu ŋakiro a Yoab ka ŋuna a ŋikarikok a ŋajorei nyiretakis ŋuna alimunit erwosit; aŋun, apotu ikes torotokis aneni a erwosit toloto akimar ŋikilyok ŋulu epedorito ajiore alo Isirael.

⁵Toloto ikes todokasi Kide Yorodan, kisyakis akimar ŋikilyok ŋul alo Aroer ka alotaun a ŋolo ayai kidiŋ akadipaalat, toloto a nen Gad ka Yaser.

⁶Toboŋut nai aina potu Gilead ka Kades nakwap ŋina a Ŋiitaiti; tonyout a nen potu Dan, ido alo Dan, apotu toloto To, lotaun Sidon.

⁷Ani nai enyounete alo Sidon, apotu toloto lowae ŋolo ayai aduketait ŋina jiet alo Tiro ka toloto lotaunio a Ŋiipi daadaŋ ka Ŋikanaani daadaŋ. Ani ekaku, toloto Beeriseba lowae ŋolo alo Kwap Yudaya.

⁸Ani kedaut ikes akirimor akwap ŋin daadaŋ, apotu toboŋut Yerusalem ekaku a ŋilapyo a ŋikanikaomwon ka ŋirwa ŋatomoniarei.

⁹Abu nai Yoab ya ekimar a ŋituŋa a ŋulu apotu ikes kigira neni a erwosit. Alo Isirael arae ekimar a ŋikilyok a ŋulu apedorito ajiore a ŋileŋia ŋalipyo ŋamiae ŋakanikauni, ido ŋulu a Yudaya arae ŋalipyo ŋamiae ŋakan.

¹⁰Ani kimar Daudi ŋituŋa kirikakin, abu Ekapolon kisican iŋes, tonomosi ŋakiro etau, anerae abu iŋes kimar ŋituŋa. Tema Daudi neni a Ekapolon, “Adau ayoŋ Ekapolon akisec nooi anakiro a ŋuna adau akitiya. Nai tokona, okoe Ekapolon, ekelipi ayoŋ iyoŋ, tolema akiilit ŋina ka asecit na aneni a eketiyan kon; anerae etiya ayoŋ nu anabaŋao a ŋina apolon nooi.”

¹¹Ani taparacu enyouni Daudi, keris akirot a Ekapolon kedolu neni a Gad a ekadwaran, a ŋolo eteyenenakini Daudi ŋakiro ŋuna eponito. Kebu Ekapolon tema neni a Gad,

¹²“Ape tolimok Daudi ebe, ‘Alimu Ekapolon atemar akalimokini ayoŋ iyoŋ ŋakiro ŋauni; toseu apei alokidiŋ kec, ido etiyakini ayoŋ ŋun.’ ”

¹³Aŋun, abu Gad tolot neni a Daudi kiŋit iŋes tema, “Emaikina mono yaunae ŋikaru ŋiuni ŋulu a eron nakwap kon a? Kori emaikina iyoŋ iemi anakwap kon ŋilapyo ŋiuni ikiwuapito ŋimoe kon a? Kori emaikina edeke eyakaun nakwap kon ŋirwa ŋiuni a? Totamatama mono iyoŋ ŋakiro ŋun, ido toseu ŋuna emaikina ayoŋ oboŋok ŋolo ekeyakuunit ayoŋ.”

¹⁴Toboŋok Daudi Gad tema, “Akaryebete ayoŋ ŋakiro nu nooi, emyekisi Ekapolon ikisican iwon, anerae epol nooi akisyon keŋ; nai nyeruwor ŋituŋa ikisicanete iwon.”

¹⁵Aŋun, abu Ekapolon kiyakiya edeke neni a Ŋisirael akisyakin ataparacu ŋin akitodol apaki ŋina atubunit iŋes, ido apotu ŋituŋa ŋalipyo ŋatomonikanikaarei totwaka akisyakin alo Dan tari Beeriseba.

¹⁶Ani edikino emalaika emunyari ŋituŋa ŋulu alo Yerusalem, abu Ekapolon kilocok ŋatameta keŋ, ido abu tema neni a emalaika a ŋolo aari ŋituŋa a ŋol, “Etemokin! Kisieŋu akan kon.” Apaki ŋin, ayai emalaika a Ekapolon ŋol nalos ŋina ka Arauna a Eyebusit.

¹⁷Ani iŋolikini Daudi emalaika ŋolo aari ŋituŋa, tema neni a emalaika, “Ayoŋ bon asecit ka ayoŋ bon adau akitiya aronis ŋina apolon nooi; nai ŋituŋa lu ŋulu ikote ŋamesekin, nyo itiyato ikes? Ekemaimai ayoŋ iyoŋ, kisicanae ayoŋ ka ŋituŋa a ekal a papa kaŋ.”

¹⁸Abu Gad tolot neni a Daudi akoloŋit ŋin, tema, “Ape kitipeiyo ama todukok Namuroet aŋuna a Ekapolon nalos ŋina ka Arauna a Eyebusit.”

¹⁹Kiira Daudi ŋakiro a Gad, kitipeiyo ikwaŋinapei alimokinitor Ekapolon iŋes.

²⁰Ani irereuni Arauna kwap, kiŋolik erwosit ka ŋiketiyak keŋ eponito neni keŋ; ido abu Arauna tolot neni a erwosit, toryedik alokiŋaren erwosit, kijuuru todol ereet keŋ kwap.

²¹Kiŋit Arauna erwosit tema, “Kaanukiro ekapolon kaŋ erwosit, ibunio iyoŋ neni a eketiyan kon?” Toboŋok Daudi tema, “Abunit ayoŋ neni kon akigyel alos kon, odukok nen Namuroet aŋuna a Ekapolon, ikotere edeke ejoŋoe akiar ŋituŋa.”

²²Tema nai Arauna neni a Daudi, “Ape ya ekapolon erwosit kaŋ, ido inak Ekapolon ibore ŋini itami iyoŋ atemar ejok aneni keŋ. Ya ŋimoŋin daŋ lu, kituruwo ainakinet neni a Ekapolon ŋina epeyo, ya ŋarameta ka ŋayokoi daŋ nu, ya toruwor ŋakito.

²³Okoe erwosit, akainak ayoŋ iyoŋ ŋiboro ŋul daadaŋ.” Tema nabo Arauna neni a erwosit, “Emaimai ayoŋ Ekapolon Akuj kon ikicamu iyoŋ.”

²⁴Nai toboŋok erwosit Arauna tema, “Mam, agyeli ayoŋ ikes aneni kon a egyelit a ŋolo ajokan; nyainakini ayoŋ Ekapolon Akuj kaŋ ainakinet ŋina epeyo ŋina nyagyelit ayoŋ.” Aŋun, abu Daudi togyel alos ka ŋimoŋin a ŋicekelya a ŋatomonikan a ŋulu a esilipa.

²⁵Abu Daudi todukok nen Namuroet aŋuna a Ekapolon, ido inak Ekapolon ŋainakineta ŋuna epeyo ka ŋuna ke ekisil a nen. Aŋun, abu Ekapolon toboŋok akilipa a Daudi aŋuna ka akwap kec, ido abu Ekapolon tolema edeke tojoŋo akiar Ŋisirael.