Read ngakarimojong 2 Sam. 6 Bible Online

2 Sam. 6 - ngakarimojong bible

2 Sam. 6

¹Tocunak nabo Daudi ŋikilyok ŋulu aseunitae alo Isirael, arae ŋul daadaŋ ŋalipyo ŋatomoniuni.

²Torotokis iŋes ka ŋikilyok ŋul alo Baala a ŋina alo Yudaya akiom Asaduku ŋina ka Acamunet. Enyaritae Asaduku ŋin a ekiro ke Ekapolon a ŋolo Etiron, a ŋolo eyai kidiŋ Ŋisubuna ŋulu a ŋabebenuk ŋulu icekinitae kidiama Asaduku.

³Todakut ikes Asaduku ŋina ka Acamunet iwuakinitae nagaari ŋinakitete, kipudut alokai ka Abinadab a ŋina ayai kidiama emukura. Arae Usa ka Aio ŋidwe ka Abinadab ŋulusapa ikes ameto ŋibaren ŋulu erito agaari ŋin,

⁴ŋina ayai Asaduku ŋina ka Acamunet. Alosi Aio alokiŋaren Asaduku ŋin,

⁵kidoŋaete Daudi ka Ŋisirael daadaŋ a agogoŋu kec a daadaŋ alokiŋaren Ekapolon; toeos eramete ŋagitae, ŋaduŋgui, ŋiburin ka ŋiboro ŋulu iekiekio eeoi ta ŋitworoi.

⁶Ani edolunete ikes nalos ŋina a Nakon, kiopeiyo Usa akan keŋ Nasaduku ŋina ka Acamunet kigaŋ nyimasar, anerae adikino ŋimoŋin imasarete.

⁷Toŋo Ekapolon nooi aŋuna a Usa, anerae abu nyitim iŋes akitap Asaduku ŋina ka Acamunet; aŋun, abu Akuj toar iŋes totwanik diyete Asaduku ka Acamunet.

⁸Toŋo Daudi akoloŋit ŋin aŋuna abunio Ekapolon tonyunyurikinor Usa toar, ido akitodol akoloŋit na, enyaritae akibois ŋin Peres Usa.

⁹Tokuryaniar Daudi akoloŋit ŋin aŋuna ke Ekapolon, kiŋis bon tema, “Alipite apedorya ayoŋ ayaun Asaduku ŋina ka Acamunet?”

¹⁰Aŋun, abu Daudi tojamak akiya Asaduku ŋina ka Acamunet lotaun a Daudi. Akilo akiya nen, abu Daudi ya Asaduku ŋina ka Acamunet kai ke Egititait a ŋolo anyaritae Obededom.

¹¹Kiboi Asaduku ŋina ka Acamunet alokai ka Obededom ke Egititait ŋilapyo ŋiuni. Kiterereŋ Ekapolon Obededom ka ŋituŋa a ekal keŋ daadaŋ.

¹²Keponi nai tolimokinae Daudi ebe, “Eterereŋ Ekapolon Obededom ka ŋituŋa a ekal keŋ ta ibore keŋ daadaŋ, aŋuna ka Asaduku a ŋina ka Acamunet.” Aŋun, abu Daudi tolot yau Asaduku ŋina ka Acamunet alokai ka Obededom, yau lotaun a Daudi ka alelyanu.

¹³Ani kedaut ŋituŋa ŋulu adakito Asaduku ŋina ka Acamunet arotokin ŋikilames ŋikanikapei, toar Daudi emoŋ ka itaok ŋini atuman erae amuronot.

¹⁴Kidoŋa Daudi itopoloorit Ekapolon ka agogoŋu keŋ a daadaŋ enapit anacir elou ŋolo amilimilan.

¹⁵Aŋun, apotu Daudi ka Ŋisirael daadaŋ yaut Asaduku ŋina ka Acamunet ecelasi ka ekusete ŋabureryaŋa a ŋimeesekin.

¹⁶Ani elomunere Asaduku ŋina ka Acamunet lotaun a Daudi, toripiya Mikal nakoku a Saul alodirisa, kiŋolik erwosit Daudi epori ka idoŋae alokiŋaren Asaduku ŋina ka Acamunet, ido abu iŋes tojamuwa Daudi alotau keŋ.

¹⁷Yaut ŋituŋa Asaduku ŋina a Ekapolons, tolomuniata tooma, kiwuakis nakibois keŋ ŋina etemokinitoe tooma eema ŋolo egurokinit Daudi nen aŋuna ka Asaduku. Inak Daudi neni ke Ekapolon ŋainakineta ŋuna epeyo ka ŋuna ke ekisil.

¹⁸Ani kedau iŋes ainakin neni ke Ekapolon ŋainakineta ŋuna epeyo ka ŋuna ke ekisil, kiterereŋ ŋituŋa alokiro ke Ekapolon a ŋolo a ŋajoresyo.

¹⁹Tosodi nai tokorak akimuj lotuŋa daadaŋ. Ŋituŋa a Isirael daadaŋ, ŋaberu ka ŋikilyok, abu ŋinituŋanan toryamu, amugati adio, akiriŋ adio ka ŋaboboryo ŋadi ŋuna erukitoe esibit ŋamugati. Ani irikakin, ŋakiro ŋun daadaŋ, toboŋosi ŋituŋa daadaŋ lorerya kec.

²⁰Toboŋo Daudi a nen tolot akiterereŋ ŋituŋa a ekal keŋ. Nai abu Mikal nakoku a Saul bu neni a Daudi tema “Okoe abu nai erwosit a Isirael kitopoloor bon nooi nakoloŋit na! Abu iŋes tolaci bon alokiŋaren ŋaketiyak a ŋikapolok a apukan keŋ ikwa ebaŋ.”

²¹Tema Daudi neni a Mikal, “Abu ayoŋ edoŋa etopoloorit Ekapolon ŋolo abu okoseu ayoŋ akilo aseun papa kon ka ŋituŋa a ekal keŋ daadaŋ. Abu iŋes okoseu ayoŋ akipuka ŋituŋa keŋ Ŋisirael. Arubakini ayoŋ edoŋae etopoloorit Ekapolon.

²²Eyatakini ayoŋ alemar akitojoka aneni kaŋ akilo tari neni abunio etiyaa. Ipedori iyoŋ atemar kori aruwor ayoŋ ituŋanan ŋini a ŋimasimas, nai eketopoloorete ayoŋ ŋaketiyak ŋun ŋuna ilimit iyoŋ.”

²³Abu Mikal nakoku a Saul nyeryamu ikoku, abu totwana emam ikoku.