Read ngakarimojong 2 Sam. 9 Bible Online

2 Sam. 9 - ngakarimojong bible

2 Sam. 9

¹Kiŋit Daudi ŋituŋa tema, “Eyai mono ituŋanan eriŋa idoŋit alokal a Saul, ŋini apedori ayoŋ arimaanikin aŋuna a Yonasan a?”

²Ayai nen eketiyan ŋolo anyaritae Siba, ŋolo kitiyae kai a Saul, ido aponi tonyaraunae iŋes neni a Daudi kiŋit erwosit iŋes tema, “Iyoŋ irae Siba a?” Toboŋok iŋes tema, “Ee, ayoŋ lo eketiyan kon!”

³Kiŋit erwosit iŋes tema, “Eyai mono ituŋanan eriŋa idoŋit alokal a Saul, ŋini apedori ayoŋ arimaanikin anarimao ka Akuj a?” Toboŋok Siba erwosit tema, “Lokoku a Yonasan bon eriŋa eyai; eŋwalit iŋes ŋakejen.”

⁴Kiŋit erwosit iŋes tema, “Ai eyai iŋes?” Toboŋok Siba erwosit tema, “Eyai iŋes kai a Makir alokoku ka Amiel ŋina eyai Lodebar.”

⁵Kiyakiya nai erwosit iŋes aomere lokoku a Yonasan alokai a Makir alokoku ka Amiel a ŋina ayai Lodebar.

⁶Ani ebuni Mepiboses lokoku a Yonasan a ŋolo arae lokoku a Saul neni a Daudi, Kijuuru alokiŋaren Daudi itopoloorit Daudi. Tonyara Daudi iŋes tema, “Mepiboses!” Toboŋok iŋes tema, “Ayai, ayoŋ lo eketiyan kon.”

⁷Tema Daudi neni keŋ, “Nyikuryaniar, anerae akarimaanikini ayoŋ iyoŋ aŋuna a Yonasan a papa kon ekenyakakini ayoŋ iyoŋ akwap a papaa kon a Saul daadaŋ, ido ikimuji iwon kaapei alomesa ke epei a ŋinakoloŋit.”

⁸Kijuuru Mepiboses itoodiunit akitopoloorit keŋ Daudi tema, “Ŋae ayoŋ eketiyan kon, eŋok ŋolo atwan irimaanikini iyoŋ?”

⁹Tonyarau nai erwosit Siba, eketiyan a Saul, tema neni keŋ, “Ainak ayoŋ lopapait a ekapolon kon ibore daadaŋ ŋini sek arae ŋini a Saul ka ekal keŋ.

¹⁰Eruwor iyoŋ ka ŋidwe kon ŋulusapa ta ŋiketiyak kon itaanakinete iŋes emanikor, ido tolemikis iŋes akimuj alomanikor a ŋol, ikotere lopaapit a ekapolon kon eryamuni ibore ŋini imuji. Nai erubakini Mepiboses lopapait a ekapolon kon ikimuji kaapei ka ayoŋ alomesa ke epei a ŋinakoloŋit,” Apaki ŋin, ayakar Siba ŋidwe keŋ ŋulusapa ŋitomon ka ŋikan ka ŋiketiyak ŋatomoniarei.

¹¹Tema nai Siba neni a erwosit, “Alotooma ŋakiro daadaŋ ŋuna ikicik iyoŋ ayoŋ eketiyan kon, Ekapolon kaŋ erwosit, etiyae ayoŋ eketiyan kon ŋun.” Kisyak Mepiboses akimuj alomesa a ŋolo emujia Daudi, ikwapei epei a ŋidwe a ŋulusapa a erwosit.

¹²Ayakar Mepiboses ikoku ŋinisapat ŋini anyaritae Mika, ido arae ŋituŋa daadaŋ ŋulu eboiyete alokai a Siba ŋiketiyak a Mepiboses.

¹³Toruwor Yerusalem eboiyo Mepiboses, anerae arae lomesa ŋolo emujia erwosit emujiananaa Mepiboses a ŋinakoloŋit. Arae Mepiboses ituŋanan ŋini aŋwalito ŋakejen daadaŋ.