Read ngakarimojong 1 Ŋirw. 11 Bible Online

1 Ŋirw. 11 - ngakarimojong bible

1 Ŋirw. 11

¹Abu erwosit Solomon kiit ŋaberu ŋuna alalak ŋunamoen kaapei ka nakoku a Parao. Arae ŋaberu ŋun: Ŋamoabi, Ŋaamoni, Ŋaedomi, Ŋasidoni ka Ŋaitaiti.

²Arae ŋaberu ikes ŋuna anakwapin a ŋuna abu Ekapolon tolimok Ŋisirael tema, “Nyemaikina iyes kipotonokinos anakiito ka ŋituŋa a ŋakwapin aŋace, anerae ituruworete kire jik ikes ŋitai kus ŋulu eminasi ŋakujo kec.” Nai amina Solomon ŋaberu ŋun nooi.

³Ayakar Solomon ŋaberu ŋamiae ŋakanikaarei ŋuna auritae alokalya a ŋirwosi ka ŋace ŋamiae ŋauni ŋuna pa eitit; apotu ŋaberu keŋ ŋun kibatasi etau a Solomon.

⁴Ani edoli ŋikaru ŋulu amojoŋia Solomon, kituruwosi ŋaberu ŋun etau a Solomon ŋolo amina ŋakujo kec, tojamak etau a Solomon ainakina neni ke Ekapolon ka Akuj keŋ nyeminak lopite ŋolo sek aminar etau a Daudi a papa keŋ.

⁵Arae ŋun aŋuna abunio Solomon kiwuapya Asitores akuj ŋina a ŋisidoniani ka Milikom akuj ŋina a Ŋiamoni.

⁶Aŋun, abu Solomon kitiya ŋuna aronok alokiŋaren Ekapolon, abu nyiwuap Ekapolon anakiyookino, lopite ŋolo kebunio Daudi papa keŋ kiwuapya.

⁷Abu nai Solomon todukok akai a Cemes akuj a Ŋimoabi ka todukok akai a Milikom a akuj a Ŋiamoni kidiama emukura ŋolo eyai Kide Yerusalem.

⁸Abu Solomon todukonok ŋakais a ŋakuj a ŋaberu keŋ a ŋunamoen a ŋun a daadaŋ. Apotu ŋaberu ŋun yaanasi nakujo kec ekinyate ka ŋamuronisya.

⁹Aŋun nai, abu Ekapolon toŋoik Solomon, anerae abu etau keŋ nyemitak Ekapolon Akuj ŋina a Isirael, ŋina aris ketakanu neni keŋ ŋarwa ŋaarei,

¹⁰ido aris Ekapolon kicik Solomon atemar, nyemaikina iŋes iwuapi ŋakujo ŋace nai abu Solomon nyiwuap ŋuna ecikit Ekapolon iŋes.

¹¹Aŋun, abu Ekapolon tema neni a Solomon, “Ikwapei eraakatar ŋuna itiya iyoŋ ŋuna kon a elope, ido nyiwuapa iyoŋ Acamunet kaŋ ka ŋikisila kaŋ ŋulu abu ayoŋ ekecik iyoŋ, kire jik, elielaari ayoŋ apukan aneni kon, oinak neni a eketiyan kon.

¹²Nai aŋuna a Daudi a papa kon, nyetiyakini ŋun eriŋa iyoŋ iyari. Elielaari ayoŋ apukan edoli ŋirwa ŋulu ipukaa lokoku kon.

¹³Nyeelielaari ayoŋ apukan daadaŋ; ainakini ayoŋ lokoku kon kipuka ekabila epei, aŋuna a eketiyan kaŋ a Daudi ka aŋuna a Yerusalem a ŋolo aseu ayoŋ aruwor etaun kaŋ.”

¹⁴Kiwuak nai Ekapolon lotau ka Adad ŋiman, abu toremokinos ka Solomon. Arae Adad lokoku ke erwosit alo Edom.

¹⁵Ekiŋaren sek apaki ŋina ajioto Daudi ka Ŋiedomi, kebu Yoab ekarikon ajore a Daudi tolot nakwap ŋina a Edom akinuk ŋikatwak, ido kebu iŋes apaki ŋin toar Ŋiedomi ŋulusapa daadaŋ,

¹⁶(anerae kepotu Yaob ka Ŋisirael daadaŋ kiboiyoto alo Edom ŋilapyo ŋikanikapei, akitodol ŋina amunyaryata ŋisapa alo Edom daadaŋ.)

¹⁷Nai kebu Adad tosi tolot Ijipit ka Ŋiedomi, ŋice ŋulu arae ŋiketiyak a papa keŋ. Arae Adad edya ŋolo adit apaki ŋin.

¹⁸Kepotu ikes torotokis alo Midian toloto tari Paran; toriko ŋikilyok alo Paran torukosi ka ikes Ijipit neni a Parao a erwosit a Ijipit, a ŋolo abu inak Adad akai, inanak iŋes akimuj ka inak daŋ ŋalup ŋuna toruwor ŋuna keŋ.

¹⁹Tojokyar Adad aneni a Parao, aŋun, abu Parao inak nakaato ka aberu keŋ neni ka Adad toruwor aberu keŋ. Arae ŋin nakaato ka arwosit a ŋina anyaritae Tapenes.

²⁰Abu nakaato a Tapenes kidou ikoku ka Adad, tolimokinae ekiro keŋ Genubas. Kitopolou Tapenes ikoku ŋin alo kai a Parao. Kiboi Genubas alo kai a Parao erukito ka ŋidwe a Parao.

²¹Ani eriŋa Adad eyai Ijipit, kiira atemar adau Daudi atwanare ikwapei atapapaakeŋ ka adau Yoab daŋ ekarikon ka ajore atwanare, tema Adad neni a Parao, “Kimyekinae ayoŋ alot, ikotere aboŋori nakwap kaŋ.”

²²Nai abu Parao kiŋit iŋes tema, “Nyo icanakin iyoŋ aneni kaŋ ŋini icamitor iyoŋ tokona alosit nakwap kon?” Toboŋok iŋes tema, “Mam ibore, kimyekinae ayoŋ alot.”

²³Kiwuak Akuj ŋiman lotau a emoit a Solomon a ece a ŋolo abu toremokinos ka iŋes, arae ŋol Reson, lokoku ke Eliada, ŋolo kebu tosi aneni a ekapolon keŋ a erwosit a ŋolo alo Soba aŋolo anyaritae Adadeser.

²⁴Abu ŋol tocunak ŋulu ewuapito iŋes, kituruwor iŋes bon ekarikon a ajore aŋulu aŋerite apukan a Soba apaki ŋina aarya Daudi ŋituŋa kec. Toloto ikes Damasko kiboiyoto a nen, toruwor Reson erwosit a Damasko.

²⁵Torubak Reson erae emoit ŋolo a Isirael ŋirwa daadaŋ ŋulu epukator Solomon, kican iŋes Solomon lopite ŋolo ecanitor Adad Solomon. Abu Reson kipuka Aram, torubak imanit Isirael.

²⁶Toŋer lokoku a Nebat ŋolo anyaritae Yeroboam Solomon. Arae Yeroboam epei a ŋikapolok anapukan a Solomon, ŋolo alo Sereda. Arae toto keŋ apuserut ŋina anyaritae Serua.

²⁷Ŋakiro ŋuna aŋeryo Yeroboam erwosit ikes nu: Kebu Solomon toduk akititis ido kebu togolonok neni keorori anarwatata a ŋina ke etaun a Daudi a papa keŋ.

²⁸Arae Yeroboam ekile ŋolo apedorit akitiyaa ejok nooi. Ani iŋolikini Solomon epite ŋolo etiyaa ekile ŋol ejok nooi, abu kiwuak iŋes apolokinit ŋulu areikinitae akitiya etic ŋolo ka akai a Yosepu.

²⁹Apaki ŋin, ani erotokini Yeroboam alo Yerusalem, abu iŋes kiryamun lorot ka ekadwaran ŋolo anyaritae Aija, ŋolo arae Esilonit Anapit Aija elou ŋolokitete apaki ŋin. Apotu ŋul ŋiarei make kiryamunos nariet alorot,

³⁰tolacu Aija elou keŋ ŋolokitete ŋolo anapit iŋes, tocilicili ŋacilet ŋatomon ka ŋaarei.

³¹Tema nai Aija neni a Yeroboam, “Ya ŋacileta ŋatomon toruwor ŋuna kon, anerae ŋakiro nu ikes alimu Ekapolon Akuj ŋina a Isirael ebe, ‘Kiira, alosi ayoŋ akielar apukan anakan a Solomon, ido okoinak iyoŋ ŋikabilae ŋitomon kipuka.

³²Nai aŋuna a eketiyan kaŋ a Daudi ka aŋuna a etaun a ŋolo a Yerusalem, a ŋolo aseu ayoŋ alokabilae a Isirael a daadaŋ, ipukae iŋes ekabila epei bon.

³³Etiyae ayoŋ ŋun, anerae ekemyek ayoŋ, ido ilipi neni ka Asitores a akuj a ŋisidonianineni a Cemes a akuj a Ŋimoabi ka neni a Milikom a akuj a Ŋiamoni. Awou iŋes akiwuap ŋuna abala ayoŋ, nyitiya daŋ ŋuna iyookino alokiŋaren kaŋ, nyiwuapa daŋ ŋikisila kaŋ ka ŋuna atubunit ayoŋ kitiya iŋes lopite ŋolo etiyator Daudi ŋolo arae papa a Solomon.

³⁴Kikote neni daŋ, nyalemari ayoŋ apukan daadaŋ anakan keŋ, nai emyekini ayoŋ iŋes kipuka ŋirwa daadaŋ ŋulu eyarya iŋes. Itiyakin ŋun ŋuna a eketiyan kaŋ a Daudi a ŋolo abu ayoŋ oseu, ido abu kiwuap ŋakiciketa kaŋ ka ŋuna atubunit ayoŋ.

³⁵Nai alemari ayoŋ apukan anakan alokoku keŋ, okoinak iyoŋ. Apukan ŋin, iŋes ŋikabilae ŋulutomon.

³⁶Nai ainakini ayoŋ lokoku keŋ, ekabila epei, ikotere nai erubakinete ŋituŋa a eketiyan kaŋ a Daudi eyakasi kiŋaren kaŋ alo Yerusalem, alotaun a ŋolo aseu ayoŋ toyakaun ekiro kaŋ.

³⁷Akaseuni ayoŋ iyoŋ, ido ipukae iyoŋ neni daadaŋ ecamit etau kon; iruwor iyoŋ erwosit a ŋikabilae a ŋulu alowae aŋolo alo Kuju Isirael.

³⁸Ani kiira iyoŋ daadaŋ ŋuna iyookino alokiŋaren kaŋ iwuapit ŋikisilakaŋ, ka ŋakiciciketa kaŋ, lopite ŋolo etiyaa Daudi eketiyan kaŋ, ikiruki iyoŋ ka ayoŋ, ido eturubakini ŋiletok kon erae ŋikepukak ekaku kon lopite ŋolo abunio eturubakinia ŋulu a Daudi. Akainakini ayoŋ iyoŋ ŋikabilae ŋulu alo Kuju Isirael.

³⁹Aŋakiro a ŋun, esicani ayoŋ ŋiletok a Daudi, nai meere ŋikaru ka ŋikaru.’ ”

⁴⁰Abu nai Solomon kiwar epite ŋolo earya Yeroboam, nai abu Yeroboam apaki ŋin tosi tolot Ijipit, neni a erwosit Sisak a ŋolo a Ijipit. Kiboi iŋes alo Ijipit akitodol ŋina atwania Solomon.

⁴¹Ŋiticisyo a Solomon ŋuluce daadaŋ ka ŋuna daadaŋ etiyat iŋes ka ŋuna ka aosou keŋ, igiritae lokitaabo ŋolo a ŋiticisyo a Solomon.

⁴²Abu Solomon kipuka Isirael daadaŋ alo Yerusalem ŋikaru ŋatomoniomwon.

⁴³Abu Solomon totwana ikwapei atapapaa keŋ ka aponi tonukae lotaun a Daudi a papa keŋ, kilunyokin Reoboam lokoku keŋ lokicoloŋ toruwor erwosit.