Read ngakarimojong 1 Ŋirw. 14 Bible Online

1 Ŋirw. 14 - ngakarimojong bible

1 Ŋirw. 14

¹Apaki ŋin, abu Abiya lokoku a Yeroboam todyakakin,

²tosodi Yeroboam tema neni ka aberu keŋ, “Tonyou, kitusubun akoloŋinait, ikotere nyeyenut ŋituŋa atemar irae iyoŋ aberu a Yeroboam. Ape Silo; anerae eyai ekadwaran Aija nen. Aija iŋes akalimokinit ayoŋ atemar aruwor erwosit a ŋituŋa a lu.

³Ya ŋabopuloe ŋatomon, ŋaboboryo ŋuna erukitoe esibit ŋamugati ka ao ileleba locupa, tolot neni keŋ. Ikilimokini iŋes iyoŋ ŋuna itiyakin neni a edya.”

⁴Aŋun, abu aberu a Yeroboam kitiya ŋuna alimokinio iŋes, tolot iŋes Silo kai ka Aija. Pa apedorit Aija akitere ejok apaki ŋin, anerae aris ŋakonyen keŋ kemumu aŋuna ka amojoŋu.

⁵Nai abu Ekapolon tema neni ka Aija, “Ebunit aberu a Yeroboam neni kon akiŋita ŋakiro alokoku keŋ, anerae edyaka lokoku keŋ. Emaikina iyoŋ tolimok iŋes ŋakiro ŋuna iyeni iyoŋ.” Ani edoluni aberu ŋin nen, pa etusubuna iŋes aberu a Yeroboam.

⁶Nai ani iirari Aija eruye a ŋakejen keŋ apaki ŋina adolunio iŋes diyete epuke, tema Aija, “Tolomu tooma aberu a Yeroboam; kaanukiro itusubuna iyoŋ meere aberu a Yeroboam? Tolomu, anerae ekecikitae ayoŋ alimokin iyoŋ ŋakiro ŋuna apipilak.

⁷Ape tolimok Yeroboam ebe, ‘Ebala Ekapolon Akuj ŋina a Ŋisirael: Abu ayoŋ eketopoloo iyoŋ alokidiŋ ŋituŋa, eketuruwo iyoŋ ekarikon a ŋituŋa kaŋ a Ŋisirael,

⁸ido abu eela apukan aneni a ŋituŋa a Daudi aŋuna ka ainakin neni kon, nai nyikwaanikina iyoŋ ka Daudi eketiyan kaŋ, ŋolo abu kiwuap ŋuna abu ayoŋ ecik iŋes, abu iŋes ekewuap ayoŋ a etau keŋ a daadaŋ, itiyae ŋuna iyookino bon alokiŋaren kaŋ.

⁹Itiya iyoŋ ŋuna aronok, akilo ŋituŋa daadaŋ ŋulu ke ekiŋaren. Itiyau iyoŋ aŋuna kon ŋakujo ŋace, ŋakujo ŋuna itiyaunitae a ŋasuwa; ikitoŋoo iyoŋ ayoŋ ka ikimana kaku kon.

¹⁰Aŋun, ayauni ayoŋ ŋuna aronok neni a ŋituŋa a ekal a Yeroboam. Amunyari ayoŋ aneni a Yeroboam ŋikilyok daadaŋ, ŋipi ka ŋulu nyerae ŋipi alo Isirael. Ecunyari ayoŋ ŋituŋa a ekal a Yeroboam lopite ŋolo icunyia ituŋanan aoret todaun daadaŋ.

¹¹Enyamete ŋiŋokwo ŋituŋa a Yeroboam ŋulu etwanikinete lotaun, ido enyamete ŋikyeny ŋulu eporete ŋituŋa ŋulu etwanikinete nariet; anerae adau Ekapolon alimun ŋun.’

¹²Aŋun, torotok a ne, toboŋo lore kon. Apaki ŋina idolio iyoŋ lotaun kus, iridakini edya.

¹³Igworete Ŋisirael daadaŋ aŋuna keŋ ido tonuka iŋes, anerae iŋes bon alokal a Yeroboam iwuakinio nakipany aŋuna araakar iŋes bon alokal a Yeroboam italakarit Akuj ŋina a Ŋisirael.

¹⁴Elemuni Ekapolon nakoloŋit na ka esaa lopei lo erwosit ece kipuka Ŋisirael, emunyari erwosit ŋol ŋituŋa a ekal a Yeroboam.

¹⁵“Isicani Ekapolon Ŋisirael emaranikinete lopite ŋolo iloilookinio ekuwuam eoot anakipi, elemari Ekapolon Ŋisirael anakwap keŋ a ŋina ajokan a ŋina abu iŋes inak atapapaa kec, ido ielari ikes yaye aŋolol ŋina enyaritae Eupurate, anerae apotu ikes kitoŋoa Ekapolon aŋuna etiyauniata ŋitorubei a akuj a ŋina anyaritae Asera.

¹⁶Ipotori Ekapolon Ŋisirael aŋuna a asecit a ŋina etiya Yeroboam, ido abu torikok Ŋisirael nasecit.”

¹⁷Tonyou nai aberu a Yeroboam torotok a nen, bu tari Tirisa. Ani edoluni iŋes lopuke a akuj keŋ, kiridak edya.

¹⁸Tonuka Ŋisirael daadaŋ edya ŋol, kigworo aŋuna keŋ lopite ŋolo alimunitere anakirot ke Ekapolon, a ŋina abu Ekapolon kirwor aneni ka Aija a ekadwaran keŋ.

¹⁹Ŋiticisyo a Yeroboam ŋuluce daadaŋ, epite ŋolo kejio ka epite ŋolo kipukator, igiritae lokitaabo ŋolo a ŋakiro a ŋirwosi a Ŋisirael.

²⁰Abu Yeroboam kipuka Isirael ŋikaru ŋatomoniarei ka ŋiarei ido, abu totwana. Abu lokoku keŋ Nadab kilunyokin lokicoloŋ keŋ, kipuka Isirael.

²¹Apaki ŋin arae Reoboam lokoku a Solomon epukat Yudaya. Arae ŋikaru a Reoboam ŋatomoniomwon ka epei apaki ŋina esyakinia akipuka Yudaya, ido abu iŋes kipuka Yudaya alo Yerusalem ŋikaru ŋitomon ka ŋikanikaarei. Kipuka iŋes Yudaya alotaun a ŋolo abu Ekapolon toseu toyakaun ekiro keŋ alotaunio a daadaŋ a ŋulu a ŋikabilae a Ŋisirael. Arae ekiro a toto a Reoboam Naama, arae iŋes Amonait.

²²Apotu ŋituŋa a Yudaya daŋ kitiyata ŋuna aronok alokiŋaren Ekapolon, apotu ikes kitiyata ŋuna aronon nooi akilo ŋuna etiyato atapapaa kec.

²³Apotu ŋituŋa a Yudaya daŋ toduko aŋuna kec ŋakiboisyo ŋunamukur, kiwuanakis erae ŋakujo kec ŋamoru ka ŋitorubei ka akuj a ŋina enyaritae Asera lomukur ŋulu aoyak daadaŋ ka lokito ŋulu alibak daadaŋ.

²⁴Ŋuna aronok nabo nooi, ayakasi ŋimalaae ka ŋamalaae nakiboisyo ŋun, ŋuna elipyata ŋituŋa alo Yudaya. Abu Reoboam kisyak akitiya ŋakiro ŋuna aronok ŋuna etiyaete ŋituŋa ŋulu abu Akuj kirita anakwapin kec a ŋuna abu iŋes inak Ŋisirael.

²⁵Alokaru a ŋolo a ŋikan ipukat erwosit Reoboam Yudaya abu Sisak erwosit a Ijipit torem Yerusalem;

²⁶Kiwok ebari ŋolo ayai Kai ke Ekapolon ka ebari ŋolo ayai kai ke erwosit, ya ibore daadaŋ alo Yerusalem, ya tari ŋaupala daadaŋ ŋuna etiyat Solomon a egolid.

²⁷Aŋun, abu erwosit Reoboam kitiyau ŋaupala ŋace, a eburonis kilunyok neni a ŋuna aponi tolemarae; inak iŋes ŋun neni a ŋulu apolokinito ŋulu eteete ŋipukei a akai ke erwosit.

²⁸Apaki daadaŋ ŋina alosyo erwosit Kai ke Ekapolon, atiŋeneneete ŋiketeok keŋ ŋaupala, torukosi ka iŋes, ani ekaku kinyakasi ŋaupala nagule ŋina eyokiyere akai a erwosit.

²⁹Ŋiticisyo nai a Reoboam daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya.

³⁰Apotu Reoboam ka Yeroboam torubakis ejiete.

³¹Abu Reoboam totwan, ido aponi tonukae lotaun a Daudi neni anukitae atapapaa keŋ. Arae ekiro a toto keŋ Naama ŋina arae Amonait. Abu lokoku keŋ Abiyam kilunyokin lokicoloŋ keŋ kipuka Yudaya.